Innuttaasunut

Pisariaqartitsisoqalerpat ikiuunnissamut piareersimavunga

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Coronaqarnerani tamatta suliatta saniatigut suliaqarnissarput pisariaqartinneqarpoq. Qaangiuttoorluni sulinerusinnaavoq, nutaanik suliassinneqarnerusinnaavoq allalli immaqa sulinerminnik aallussiinnarniarlutik pisunut naleqqussartariaqarsinnaapput. Inuiaqatigiinneq ataatsimoorneruvoq, tsamaattumik ataatsimoorluta sassartariaqarlutalu ikiuuttariaqarpugut, aamma naak nalinginnaasumik suliarisartakkanniit allaanerujussuarmik suliaqarnissat pineqaraluarpat. Kommuneqarfik Sermersuumi pingaartillugit sammineqassapput, pissutsini ilungersunartuni maannakkut atuuttuni inuiaqatigiinnut pingaaruteqarluinnartumik sapiitsuliornermik iliuuseqartut. Taamaattut amerlanerusut pisariaqartinneqarput. Pisariaqartinneqarputit.

Ingrid Mølgaard ulluinnarni illulianut, malittarisassanut nalunaarutinullu tunngasunik suliaqartuuvoq. Kommuneqarfik Sermersuumi illuliornermut oqartussaqarfimmi ingeniøritut atorfeqarpoq, aamma kommunimi illulianut nutaanut sanaartornermut akuersissutinik atulersitsinissamullu akuersissutit suliarinissaat isumagisaralugit. Kommunimi inissianik nutaanik ininillu inuussutissarsiuteqartunit pisariaqartitsiffiup nalaani atorfik nalinginnaasumik pingaaruteqartuuvoq. Ingridip ilinniagaa siulleq ingeniøritut ilinniagaanngilaq.  Ingeniøritut ilinnialinngikkallarami sapaatit-akunnerini tulliuttuni pisariaqartinneqalereersimasussatut atorfeqarnikuuvoq. Tassami peqqinnissamut assistentiuvoq.

Kommuneqarfik Sermersuup upalungaarsimatitaani sulisut pingaaruteqarluinnartut ilagivaat isumaginninnermut peqqinnissamullu assistentit.

”Kalaallit Nunaanni Covid-19-imik qanoq sakkortutigisumik eqqugaagaluarutta innuttaasut utoqqaat innarluutillillu paaqqutarisussaavagut. Taamaattumik sulisut ulluinnarni ‘pingaaruteqarluinnartuunngitsuni’ suliaqartut allanik suliaqartinnissaat soqutigisaraarput, assersuutigalugu utoqqaat illuini imaluunniit angerlarsimaffimmi ikiortqarfimmi sulisut napparsimalissagaluarpata”, taama oqarpoq Sanarfinermut Avatangiisinullu Ingerlatsivimmi Upalungaarsimasuni stabschefi, Alex Nørskov.

Taamaalilluni Ingrid Mølgaardip allaffimmi sulisarneq allamik taarserlugu utoqqaat illuini  imaluunniit napparsimmavimmi sulineq pisariaqalissappat piareersimaffigivaa.

”Ikiuussinnaasut amigaataalissappata soorunalimi ikiuunnissannut piareersimavunga. Taamatummi ilinniarsimasuuvunga misilittagaqarfigalugulu, taamaattumik utoqqaat pisariaqartitsilerpata ikiuunnissaq pissusissamisuuginnarpoq”, Ingrid Mølgaard oqarpoq.

Allaffissornikkut suliaqartut amerlanerpaat assigalugit Ingrid Kommuneqarfik Sermersuup suliffiup iluani jobbankimut allatsinnikuuvoq. Coronap tunillaassuunnerata nalaani suliassaqarfinni pingaaruteqarluinnartuni sulisut amigaataalissagaluarpata sulisut pinngitsoorneqarsinnaasut suliartoqquneqarsinnaapput. Nammineq ilimagivaa ajornartuuinnissaq sioqqullugu utoqqarnik sullissisunut suliartoqquneqarnissani.

”Sunngiffinni Utoqqaat Illuanni Ippiarsummi piffissami aalajangersimasumi taartaasarnikuuvunga, taamaattumik ilisarisimavaannga. Pigaartuutitaanissara qanillilerunnarsivoq”, Ingrid Mølgaard oqarpoq.