Meeqqanut Ilaqutariinnullu Ingerlatsivik pikkorissartitsimmat angajoqqaarsiat 40-t peqataaffigisaannik inunnguuseralugu imigassamik akornutit pillugit ilinniartitsissutigineqarput. Tamannalu peqataaffigalugu pissarsilluarfiusoq peqataasut ilaat, attaveqaqatigiinnermut immikkoortortap oqaloqatigisaa unnersiorpoq.
Sapaatip akunnerata siuliani angajoqqaarsiat 40-t Nuummi pikkorissartinneqarput, tassanilu sammineqarpoq meeqqat inuusuttullu inunnguuseralugu imigassamik akornusersimasut. Ataasinngorneq marlunngornerlu pikkorissarnermut tassunga assingusumik kommunimi sullissisut pikkorissartinneqarput.
”Pikkorissarneq torrassuuvoq naleqqullunilu – pingaartumik atuagarsornerinnaannginnera pissutigalugu. Pikkorissartitsisut pisuni assigiinngitsuni erseqqissunik assersuusiortarput, uagut ilisarisinnaasatsinnik, kisialli qanoq ililluta suliarissanerlugu nalornissutigisarsimasatsinnik. Maanna tamanna paasisaqarfigineruarput”, taama oqarpoq angajoqqaarsiat ilaat, Maja Nielsen.
Angajoqqaarsiat suleqatigiikkuutaanut naleqqussaqqissaakkanik najoqqutassaqarlutik ingerlatsipput, kisianni allaanngilaq sullissisunut tunngasuusoq, taamaattumik suliamik ilinniarsimasut atortagaat atorneqarput, pikkorissaqataasut najukkaminni atorsinnaasaat.
”Paasisimasaqarnerulerutta, taava meeqqat inuusuttullu suli annertunerusumik ikiorsinnaalissavagut”, Maja Nielsen oqarpoq.
Nuummi pikkorissarnerup saniatigut Tasiilami sulisut angajoqqaarsiallu sapaatip akunnerani matumani pikkorissartinneqassapput.