- Marsip 18-anni 2020 nal. 16.00 Nuummi periusissat Danmarkimi periuserineqartut asserluinnaat atuutsinneqalerput. Erseqqissaatigineqassaaq, malittarisassat nutaat Nuummi kisimik atuutissammata, nunallu sinnerani malittarisassat allannguuteqanngikkallartut. Nuummi periusissat nutaat tassaapput:
Aaqqissuussinerit, pisussallu allat inunnik qulit sinnerlugit peqataasullit inerteqqutigineqarput.
- Marsip 18-at 2020 nal. 16.00 aallarnerfigalugu – aaqqissuussinerni, pisuni, sammisaqartitsinerni assigisaanniluunniit inunnik qulit sinnerlugit peqataasulinni peqataanissaq inerteqqutigineqalerpoq. Inerteqqutaavoq illup iluani silamilu aammalu pisortat namminersortullu aaqqissuussaat, pisussallu allat.
- Inerteqquteqarnermi imaanngilaq inuit qulit sinnillit pisarnertut najuunnissaat assersuutigalugu pisiniarfinni, pisiniarfissuarni, mittarfinni imaluunniit qimuttuitsoqarfimmiinnissaat. Aamma taamaappoq, tamat angallassissutaannik atuinermi (qimuttuitsuni, bussini, timmisartuni, ikaartaatili allanilu) nalinginnaasumillu suliffimminni najuuttunut atuutinngillat. Inerteqquteqarneq aamma atuutinngilaq, politikkikkut assigisaanilluunniit isummanik saqqummiussisoqarnissaanut tunngasunik katersuutsitsinerit, tamakkununnga ilanngullugit akerliussutsimik takutitsinerit imaluunniit politikkikkut ataatsimiititsinerit.
- Aalajangersimasumik namminerisamik angerlarsimaffiit pineqanngillat. Taamaattorli sakkortuumik kaammattuutigineqarpoq pilersaarutaasumik namminerisamik ataatsimuualaartitsinerit allallu inunnit qulit sinnerlugit peqataaffigineqartut, tamaat eqqarsaatigalugu peqataasussat sapinngisamik ikilisarneqassammata, eqqiluisaarnissamullu tunngatillugu peqqinnissamut oqartussat tamanut innersuussutaat malinneqassapput, qanippallaassanngilagut kiisalu naleqquttumik pissusilersorluta.
- Tamatuma saniatigut politiit -marsip 18-iat 2020 nal. 16.00 – sumiiffinni tamanit najorneqartuni akulerussinnaatitaalerput, inuit qulit sinneqartut sumiiffimmi tassani ataatsimoorpata, COVID-19-millu tunillatsinnissamut immikkut ulorianaateqarpata. Politiit akulerussinnaanerinut tunngasoq inuit akornanniinnerit amerlassusiinik qanippallaannginnissamik peqqinnissamut oqartussaasut tamanut innersuussutaat naapertorlugit pissammata.
Natklubbit, imerniartarfiit, neriniartarfiit cafét allallu matussapput.
- Marsip 18-at 2020 nal. 16.00 aallarnerfigalugu – natklubbit, qitittarfiit, barit, imerniartarfiit, vandpipecaféet allallu matugallarneqassapput.
- Marsip 18-at 2020 nal. 16.00 aallarnerfigalugu – neriniartarfinni caféni allanilu isertoqqaqqusaajunnaarallarpoq. Neriniartarfiit caféllu nerisassanik imigassanillu suli pajuttuisinnaatitaapput (take away allallu).
- Neriniartarfiit cafét allallu nerisassanik imigassanillu pajuttuisartut imaaliussapput:
– Sulisut tamarmik peqqinnissamut oqartussat eqqiluisaaqqissaarnissamik naleqquttumillu pissusilersornissamik innersuussutaannik malinneqqissaarnissaq qulakkeerneqassaaq.
– Inuit COVID-19-ip ersiutaannik peqartut pillugit angerlarsimasariaqarnissaannik paasissutissiissutinik allagarsiissuteqartoqassaaq.
– Eqqiluisaaqqissaarnissamik naleqquttumillu pissusilersornissamik paasissutissiissutinik allagarsiisoqartassaaq.
– Sapinngisaq tamaat imeq qaqorsaat aamma/imaluunniit assannut sprit pisinianut aamma saqqumitinneqassapput.
– Isumannaarneqassaaq, pisiniat naammattumik ungasissuseqarnissaat. Aamma taamaappoq silami tunuleriiaarnermi.
Pisiniarfissuit allallu matuneqarput
- Marsip 18-at 2020 nal. 16.00 aallarnerfigalugu pisiniarfissuarni, stormagasinani, qulisalinni allanilu inuit amerlasuut najuuffigisaanniittut inerteqqutaalerallarput. Nerisassanik nioqquteqartarfiit nakorsaataarniarfiit pisiniarfissuarniittut allaniittullu aammalu toqqaannartumik taakkununnga isertarfiit inerteqquteqarfigineqanngillat, aamma taamaappoq tamat angallaffiinut toqqaannartumik isertarfiit.
Illup iluani timersortarfiit susassaqartitsiviit allallu matuneqarput
- Marsip 18-at 2020 nal. 16.00 aallarnerfigalugu – illup iluani timersortarfiit susassaqartitsiviit allallu matuneqarallarput, taakkununnga ilanngullugit bade- og legelande, filmertarfiit, isiginnaartitsisarfiit, timigissartarfiit palersaartarfiillu. Inerteqquteqarnermut ilaanngillat sungiusaqqittarfiit peqqinnissaqarfinnut, utoqqaat illuinut, timimik sungiusaasunut allanullu attuumassuteqartut.
Nuummi pisiniarfinnut, pisiniarfissuarnut allanullu piumasaqaatit nutaat
- Pisiniarfeqarfiit suliffeqarfiillu pisiniarfinnut attuumassuteqartut imaaliussapput:
– Minnerpaamik 4 m2 pisiniamut ataatsimut naatsorsuutigineqarnissaa qulakkeerneqassaaq.
– Sulisut tamarmik peqqinnissamut oqartussat eqqiluisaaqqissaarnissamik naleqquttumillu pissusilersornissamik innersuussutaannik malinneqqissaarnissaaq qulakkeerneqassaaq.
– Inuit COVID-19-ip ersiutaannik peqartut pillugit angerlarsimasariaqarnissaannik paasissutissiissutinik allagarsiisoqartassaaq.
– Paasissutissiissutinik allagarsiisoqassaaq eqqiluisaarluarnissamut tunngasunik, tamallu isersimasarfiini naleqquttumik pissusilertoqarnisaanut tunngasunik.
– Sapinngisaq tamaat pisinianut aamma sassaalliutigineqassapput, imeq aammalu qaqorsaat aamma/imaluunniit assannut sprit.
– Nerisassat poortorneqarsimanngitsut tuniniarneqarpata aaqqateqarnissaq qulakkeerneqassaaq.
– Pisiniat qanippallaannginnissaat qulakkeerneqassaaq – aamma tunuleriiaarnermi. Aamma taamaappoq silami tunuleriiaarnermi.
Inuussutissarsiuteqarfiit mikinerit, pisinianik attaveqarfiusariaqartut.
- Marsip 18-at 2020 nal. 16.00 aallarnerfigalugu – suliffeqarfiit mikinerit kiffartuussiffiusut, kiffartuussisup pisiniallu akornanni qanippallaannginnissamik inerteqquteqarfiunngitsut, taakkununnga ilanngullugit nujalerisut, kakiuisartut, tagiartuisartut, kosmetologit allallu inerteqquteqarfiulerallarput. Peqqinnissaqarfimmi sulisunit akuerisanit sullinneqarneq pineqanngilaq.