Services

Coronap ajornartoortitsinerani: Qimarnguimmukaasut amerlaqisut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Coronamik nalaataqarnitsinni sunniutaasoq ilungersunartoq ulluni kingullerni malunniuppoq. Nuummi arnanut nakuuserfigineqarsimasunut qimarnguik ulluni kingullerni ulikkaaqqajuarpoq, tamannalu ulluinnarni qaqutigoortuuvoq. Nalinginnaasumik taamatut amerlatigisut qimarnguimmukartarnerat sapaatip -akunnerisa naaneranni pisarpoq.

”Ernumanartuuvoq sapaatip-akunnera ataasiunngitsorluunniit innuttaasut angerlarsimaannarnissaannik piumaffigineqarnerisa kingorna qimarnguimmut saaffiginnittut amerlassutsimikkut taamatut amerleriataapilussimanerat. Sapaatip-akunnerini aggersuni saaffiginnittut amerleriaqqinnissaat annilaanngatigivarput”, Meeqqanut Ilaqutariinnullu Ingerlatsivimmi pisortaq Martha Lund Olsen oqarpoq.

Qimarnguik massakkut ulikkaaqqammat, massakkullu pisup naaffeqanngiusarnera pissutigalugu, Meeqqanut Ilaqutariinnullu Ingerlatsivik ippassaq inissanik amerliliivoq, ininik saniatigut attartornikkut, taakkulu illoqarfimmi najukkami allamiipput.