Coronaqarnerani tamatta suliatta saniatigut suliaqarnissarput pisariaqartinneqarpoq. Qaangiuttoorluni sulinerusinnaavoq, nutaanik suliassinneqarnerusinnaavoq allalli immaqa sulinerminnik aallussiinnarniarlutik pisunut naleqqussartariaqarsinnaapput. Inuiaqatigiinneq ataatsimoorneruvoq, tsamaattumik ataatsimoorluta sassartariaqarlutalu ikiuuttariaqarpugut, aamma naak nalinginnaasumik suliarisartakkanniit allaanerujussuarmik suliaqarnissat pineqaraluarpat. Kommuneqarfik Sermersuumi pingaartillugit sammineqassapput, pissutsini ilungersunartuni maannakkut atuuttuni inuiaqatigiinnut pingaaruteqarluinnartumik sapiitsuliornermik iliuuseqartut. Taamaattut amerlanerusut pisariaqartinneqarput. Pisariaqartinneqarputit.
Atuarfimmi klassimi atuarneq unikkallaraluartoq, atuarneq qarasaasiakkut ingerlanneqaannarpoq. Teknologi iluaqutigalugu atuartut suliassaqartinneqaannarsinnaapput, tamannalu pisariaqartinneqartoq ilinniartitsisut isumaqarput.
Pinterest, Zoom, Showbie allarpassuillu. Tamakkuupput app-it programmillu piffissami sivikitsuararsuarmi ilinniartitsisut sakkussaasivianniittut pingaarnerpaat ilaat. Programmit taakkua atorlugit alimasissumit ilinniartitsisoqarsinnaavoq, taamaattumillu coronavirusimik nalaataqarnermi immitsinnut qanippallaarnaveertussaanerput pissutigalugu pingaaruteqartorujussuupput.
”Fagini tamangajanni atuartitsisarpunga. Atuartitsinerup ingerlatiinnarnissaa pingaaruteqarpoq, meeqqammi ilikkagaqartussaapput, qanorluunniit inuiaqatigiit unittoortigigaluarpata. Ataatsimoornerput suli malugissavaat, naak immitsinnut ungasikkaluarluta”, Bikki Rosing Kleemann, Kangillinnguit Atuarfianni 2.b-mi klasselæreri oqarpoq.
Ilinniartitsisut ilikkagaqaqaat
Coronavirus atuarfinnillu matusineq sukkasoorujussuarmik pivoq, taamaattumillu nutaamik atuartitseriaaseqalernissamut sukkasoorujussuarmik naleqqussartoqartariaqarsimavoq.
”Uanga nammineq aamma sorpassuarnik nutaanik ilikkagaqarpunga, sukkangaarmallu allaat sapaatip akunnerata naanera puigoraluarpa, Bikki Rosing Kleemann oqarpoq.
Taavalu nutaanik ilikkagaqarnermut tunngatillugu suleqataa Anne Kristiansen, nammineq 4.b.-ni atuartitsinissaminut tunngasunik naleqqussaasussanngorami, ilisarsilluni anngaavoq.
”Uagut Zoom atorlugu immitsinnut attaveqatigiippugut. Aallaqqaammut inuit 19-iulluta qarasaasiakkut-oqaloqatigiippugut, amerlavallaarlutalu. Taamaammat atuartut sisamakkaarlugit oqaloqatigiittalerpugut, Anne Kristiansen oqarpoq.
Marluullutik suliassamik pingaarnersaata ingerlatiinnarnissaat nuannaarutigeqaat: Meerartatta ilinniartinneqarnissaat.