Nittartagaq nutaaq Sammisassat.gl aqqutigalugu peqatigiiffiit innuttaasullu ajornannginnerusumik peqatigiiffiit neqeroorutaannik malinnaasinnaalerlutillu paasissutissanik pissarsisinnaalissapput. Nittartagaq innuttaasup tamakkiisumik peqatigiiffilerinermut isaariaatut atuutissaaq, peqatigiiffiillu paasissutissiissutiminnik sammisassaatiminnillu aqutsinissaat ajornannginnerulissalluni
Peqatigiiffimmik ingerlatsineq piffissamik nukissamillu atuiffiusarsinnaavoq. Nittartagaq nutaaq aqqutigalugu – Sammisassat.gl – maanna peqatigiiffimmik ingerlatsineq ajornannginnerulersinneqassaaq. Nittartakkami peqatigiiffiit suliassaminnik aallussinissaannut piffissamik atugassaannik periarfissinneqassapput. Taamatut nassuiaateqarpoq Akannguaq Lennert Peqqinneq Susassaqartitsinerlu pillugit immikkoortortami aqutsisuusoq:
– Nalunngilarput, peqatigiiffiit piffissarujussuaq atorlugu allaffissornermut tunngasunik suliaqartartut. Badmintornertartut klubbiannut ilaasortaagaanni, soorunami badmintonerneq salliutinneqarusussaaq, excel-arkinik ilaasortaanermullu akiliutinik suliaqarnissaminngarnit. Nassuiaatigaa, nittartagaq nutaaq aqqutigalugu peqatigiiffimmik ingerlatsineq ajornannginnerulersinniarsarineqartoq.
Nittartakkami Sammisassat.gl-imi peqatigiiffiit ilaasortat akiliutaannik aqutsisinnaapput, pisortanit tapiissutinik qinnuteqaateqarsinnaallutik, sammisassallu pillugit ilaasortaminnut paasissutissiisinnaallutik. Imaappoq, suliassat amerlanertigut assigiinngitsorpassuartigut aqunneqarsimasut maanna systemimut ataatsimut katersorneqarput. Taamaaliornikkut peqatigiiffinnut, innuttaasunut kommunimullu ajornannginnerulersitsisoqassaaq.
Innuttaasut uunga Sammisassat.gl makkuninnga ujartuisinnaapput, Nuummi peqatigiiffinnut ilaasortanngorniarsinnaapput ilaasortaajunnaarniarlutilluunniit, tamakkulu saniatigut ilaasortaanertik nakkutigalugu. Peqatigiiffiit namminneq akisussaaffigaat nittartakkami paasissutissaatiminnik nutarterinissartik. Ungasinnerusoq eqqarsaatigalugu Sammisassat.gl aqqutigalugu aamma peqatigiiffinnit ilaasortaniillu, ilaasortaanermut akiliutinik nakkutiginninnermut atorneqarsinnaalissaaq.
– Soorunami neriuutigaarput peqaqatigiiffiit saaffiginnittarfittaamik atorluaajumaartut. Aqutsinerup peqatigiiffimmiinnaq ajornannginnerulersinnissaa kisimi eqqarsaatigineqanngilaq. Aamma peqatigiiffiit innuttaasunut saqquminerulersinneqarnissaat siunniupparput, taamaalillutik innuttaasut suli amerlanerit Nuummi peqatigiiffinnut ilaasortanngorusulersinneqassammata. Taamaassappalli aamma peqatigiiffiit namminneq Sammisassat.gl-imut immersueqataanissaat pisariaqarpoq, Peqqinneq Susassaqartitsinerlu pillugit immikkoortortami aqutsisoq Akannguaq Lennert qungujulluni oqarpoq.
Nittartagaq uani nassaarisinnaavat.