Ukiut pingajussaat Tasiilami juulliaqqami poortukkanik, pinnguarnernik nereqatigiinnernillu aaqqissuussisoqassaaq. Ilaqutariit juullikkut nalaanni ikiorneqarnissamik pisariaqartitsisut nalliuttorsiornermut qaaqqusaasarput
Puulukimineq siataq, rødkålit, naatsiiat kajortumillu miseqqikkat. Tassa Tasiilami katersortarfimmi juulliaqqami inuit 40-t juullerpalaarnermut qaaqqusaaffigisaanut sassaalliutigineqartussat. Qaaqqusat amerlanerpaat meeraapput assigiinngitsunik ukiullit qilanaarutillit. Meeqqat 26-t ukioqanngitsuniit 17-nut ukiullit juullerpalaarnermut peqataassapput. Suliffeqarnermut Isumaginninnermullu Ingerlatsivik kiisalu Tasiilami Meeqqanut Ilaqutariinnullu Immikkoortortaqarfik ilaqutariinnut juulleriartornerani immikkut ikiorneqarnissaminnik pisariaqartitsisunut qaaqqussutissanik nassiussuisuupput.
Nalliuttorsiornerit ualikkut aallartissapput tassani meeqqat kaageeqqanik mus-issapput poortukkanillu pinnguassallutik. Poortukkat Brugsenimit, Navaranamit, NDO-mit aamma Arctic Importimit tunniunneqarput. Arfinermut qaaqqusat juullikkunni ileqquussumik sassaalliutigineqartut malillugit puulukiminertussapput siatamik, rødkålilerlugit, naatiialerlugit kajortumillu miseqqikkanik. Soorunalimi aamma risalamandemik kingulerartussallutik. Juullikkunni nalliuttorsiornermi nerisassat Brugsenimit tunniunneqarput.
Martin Lyngsdal, Tasiilami kantinami ingerlatsisoq aaqqissuussami aallartitsisuuvoq. Aallartitsisutut aaqqissuussanut taamaattunut illoqarfimmiut tamarmik ikiuillaqqinnerat oqaatigissallugu pingaartippaa:
– Tasiilarmiut ikiuuttumasarnerat misigisarpara. Aaqqissuussamut ikiuukkumallutik neqeroortut tamarmik qutsavigingaarpakka.
Ukiut pingajussaani Martin juulliaqqami pisariaqartitsisunut aaqqissuussinermi ingerlatsisuuvoq. Najukkami pisiniarfiit kisimik ikiuutinngillat. Najukkamili innuttaasut aamma qaaqqusat tamarmik juulliaqqami nuannersumik misigisaqarniassammata aaqqissuussamut ikiuukkumallutik neqeroorsimapput. Aaqqissuussamut aallartitsisumut akimaniutaanngilaq nersorneqarniutaananilu:
– Illoqarfimmi meeqqat tamavimmik nuannersumik juullisiornissaat pingaartikkakku aaqqissuussamik aallartitsivunga. Piginnaassakkalu taamatut atorluarsinnaagukkit taava taamatut atorluassavakka, Martin oqarpoq.
Taamatullu eqqarsartariaaseqarneq Tasiilami immikkoortortaqarfimmi chefip Hjørdis Vibergip ilisarilluarpaa. Illoqarfimmi ukiuni arfinilinni najugaqarsimavoq najukkamilu inuaqatigiit ilisimalluarpai.
– Ikiuussimasut tamarmik pikkoreqaat. Allanut iliuuseqarneq tapersersuineq maani Tasiilami nalituvoq. Akimaniutaanngilaq isiginiarneqarnissamulluunniit tunnganani, meeqqalli nuannaarnivimmik kiinaanni takunissamut tunngalluni. Tunniussinnaasat tunniunneqassapput. Taamatullu siunertaqarluni juullernissaanut aaqqissuussaqarneq Martinimit aallartinneqarsimasoq ingerlanneqassaaq.
Tasiilami nammineq kajummissutsiminnik ikiuuttut, suliffeqarfiit namminersortut Kommuneqarfik Sermersuullu suleqatigiinnerat peqqutaalluni aaqqissuussaq piviusunngorsinnaassimavoq. Tamanna aamma Tasiilami immikkoortortaqarfimmi pisortap Hjørdis Vibergip maluginiarsimavaa.
– Tasiilami assut ataatsimuussuseqarpugut sulerusussuseqarnermik tunniusserunnermillu tunngaveqartumik tamannalu nuannaarutigissavarput, oqarpoq.