Nunaqarfimmi Aqutsisut siulittaasuat Manassinnguak Noahsen naapertorlugu, Qeqertarsuatsiaat ineriartortinneqarnissaanni nunaqarfimmiut tunniusimallutik pimoorussisinnaanerat pisariaqartinneqarpoq. Qujanartumik illoqarfimmi meeqqat nukissaqarluartuummata periarfissaqarneq takunngitsoorneqarsinnaanngilaq.
Pitsaaliuineq aamma peqqissuutitsinissaq pillugit ataatsimiititaq assut tupaallatsinneqarsimavoq, Qeqertarsuatsiaani immikkoortoqarfiup allaffianiitillutik ulluni marlunni nunaqarfimmi tikeraarnerminnik eqikkaanerminni. Meeqqat allagartarsualisartut tassanngaannaq silatitinnut pipput, allagartarsuit “Meeqqat pisinnaatitaaffii”-nik allassimasut, allallu meeqqat imigassamik aalakoornartortalimmik atornerluisunut illersorneqarnissaminik pisinnaatitaaffeqartut.
Meeqqat taamatut iliuuseqarnermikkut, nunaqarfimmi ungasinnerusoq eqqarsaatigalugu nunaqarfiup pisariaqartitaa, tassalu iliuuseqarluarsinnaaneq takutippaat, taamatullu anersaaqarnissaaq tikeraarnerup pilersaarusiorneqarnerani isumaavoq.
”Suliniutip ”Qeqertarsuatsiaani inuunerinneq aamma isumalimmik inuuneqarneq”-rup siunertarivaa, innuttaasut piumassusiannik inuiaqatigiinnik ineriartortitsinerup ikortartorneqarnissaa” Maritha Eugenius, Qinikkanut allatseqarfimmi siunnersortaasoq, oqaluttuarpoq.
Innuttaasut nammineq piumassuseqarnerat Qeqertarsuatsiaat ineriartortinneqarnissaanut aalajangiisuulluinnartussaavoq, nunaqarfimmi aqutsisut siulittaasuat aamma immikkoortoqarfimmi aqutsisoq oqarput.
”Innuttaasut qulaatiinnaarlugit aalajangiisoqartassagaluarpat qanorlu iliorlutik aallartitsillutillu ingerlatsissanersut naalakkersoraluarutsigit tamanna iluaqutaanavianngilaq” nunaqarfimmi aqutsisut siulittaasuat Manassinnguak Noahsen oqarpoq.
Ineriartortitsinissaq innuttaasut nammatassarivaat
Suleqatigiissitaq innuttaasunik ataatsimeeqateqarpoq, ataatsimiinnermilu innuttaasut namminneq suliniuteqartartussaanerat paaseqatigiissutigineqarpoq. Aamma piumassuseqarneq annertoorujussuuvoq, naak aqqutaa ajornaatsuinnaanngikkaluartoq.
Ajornartorsiutit ilaatigut ilagisimavaat nunaqarfimmi ataatsimoorfiusinnaasumik tunngavissaaleqineq, naak siusinnerusukkut ataatsimoorfeqartarsimagaluarlutik.
Peqatigitillugu innuttaasunit paasiuminaatsuusimavoq malittarisassat inatsisillu suut atuuttuunersut pillugit, aamma aaqqissuussat suut aamma peqatigiiffiit tapiiffigineqarnissamik qinnuteqarsinnaanerinut tunngasut.
Nunaqarfik kusanarnerusoq aamma sammisassaqarnerusoq
Inooqataanermut tunngavissiuussinerup ingerlanneqarnerani Qeqertarsuatsiaat pitsanngorsaaffigineqariikatappoq. Ukiuni kingullerni illut isariaannaat 15-it piiarneqarsimapput, atuarfik nutaanik igalaartaarpoq, timersortarfillu fitness-ertarfittaarpoq kiisalu nipilersortartussamaatinut sungiusartarfeqalerpoq.