Najugaqarfiutigalugu katsorsaanermik neqerooruteqartarfimmi ilaqutariit toqqissisimasumik avatangiiseqarnissaat meeqqallu ineriartornerata atugarissaarnissaatalu qitiutinnissaa pingaartinneqarpoq
Decembarip qaammataani ataasinngornermi siullermi najugaqarfiutigalugu katsorsaanermik neqerooruteqartarfik nutaaq ammaanersiorneqarpoq – Kuserneq. Katsorsaanermi aqutsisoq Solveig Mølgaardip soqutiginnillutik takkussimasut tikilluaqquai suleqatinilu Kusernermik ineriartortitseqataasut nersualaarlugit. Tikilluaqqusinermittaaq Meeqqanut Ilaqutariinnullu Pisortaq Martha Lund Olsen aamma Nuummi Meeqqanut Ilaqutariinnullu Sullissivimmi Immikkoortortaqarfimmi aqutsisoq Kirsten Brandt Davidsen najuupput, taakkua aamma neqerooruteqartarfiup ammaanersiorneqarnera nuannaarutigeqaat.
Najugaqarfiutigalugu katsorsaanermik neqerooruteqartarfimmi nutaamik periuseqartoqassaaq. Init oqaloqateqartarfittut najugaqartunit katsorsaasunillu atorneqarsinnaasut eqqissisimanarput toqqissisimanarlutillu. Inersuarmi najugaqartut ataatsimut oqaloqatigiissinnaapput nuannersumillu ataatsimooqqatigiillutik. Meeqqanuttaaq malugissutsinut tunngasunik pinnguarfiusinnaasumik misigisassarfiorfissamik ineqarpoq