Ukiuni kingullerni Nuna tamakkerlugu arsaattarfiit ivigaaraasallit amerliartupiloorput, mannakkullu Kuummiini innuttaasut arsaattarfittaarnissaannut aningaasanik immikkoortitsisoqarpoq.
Isikkamik arsaattarneq ukiuni makkunani Kalaallit Nunaanni ineriartortorujussuuvoq Kommuneqarfik Sermersoorlu ineriartoqataavoq.
Ukiut pingasut matuma siorna Kalaallit Nunaanni arsaattarfik ivigaaraasalik angisooq ataasiinnaavoq massakkulli amerlangaarmata assannik marlunnik kisinneqarsinnaanngillat. Taakkua ilasussanngorput taannalu Kuummiiniissaaq, arsaattartut K-64 nunaanni.
”Inooqqataanermut timersornikkullu sunniuteqarluassaaq. Arsaattartut arlaqatut suliniutigineqartoq nuannareqaat Kalaallit Nunaannilu pissartanngorniarluni anngunnissamut periarfissaqarnerulissaagut” Erik Angenold K64-imi siulittaasoq oqarpoq.
Piareersarnerit aningaasaliinnerillu inissinneqareerput.
Kommunalbestyrelse isumaqatigiillutik, 2020-mut missingersuutit akuersissutigaat, akuerisassat arlaqartut ilaanni Kuummiini ivigaaraasalimmik arsaattarfiliortoqarnissaanut 3,4 mio koruuninik aningaasaliisoqarpoq.
Piareersaalluni manissaanerit kussiniliornerillu isumagineqareerput massakkullu pingaarnerpaatut ivigaaraasat ikkunneqarnissaat kiserngoruppoq.
Taamaasillunilu najukkami arsaattartunut sungiusarnissamut periarfissagissaanerulissapput.
Danmarkimi illup iluani arsaannermi ajugaasoqartoq.
Arsaattartut kattuffiat KAK illup iluani arsaannermik (futsal) aamma ingerlatsisartoq, nalaatsornerinnarmik iluatsitsinermik nutaarsiassiivoq. Finlandimi Nordic Futsal Cupimik ingerlatsisoqaqqammerpoq, marlunngormat Kalaallit Nunaat Danmarkimut 4-3-mik ajugaavoq.