Kommuneqarfik Sermersuumi Meeqqanut Atuarfeqarnermullu Ingerlatsiviup aqutsisutut atorfiit ataatsimik ilavai. Taaguutigissavaa 0-niit 6-inut ukiulinnik sullissinermi fagchefi. Siornatigut atuarfiit meeqqeriviillu immikkoortortamit ataatsimit aqunneqarnikuupput.
”Isertuunneqanngilaq Tasiilaq meeqqeriveqarnermut tunngasut annertuunik suliassaqarfiummata. Taamaammat suliassaqarfimmi tassani aqutsinermut tunngasut sammineqarnissaat annertusiniarparput. Siornatigut meeqqeriviit atuarfiillu ataasiinnarmik aqutsisoqarallarmata, meeqqeriviit maluginiarneqarpallaarneq ajorput”, Meeqqanut Atuarfeqarnermullu Ingerlatsivimmi pisortaq Helene Broberg Berthelsen oqarpoq.
Fagchefi nutaaq tassaavoq Naussunguaq Lyberth, taannalu Namminersorlutik Oqartussani perorsaanermut tunngasunik immikkoortortaqarfimmi aqutsisutut atorfeqarsimavoq. Ilaatigut perorsaasutut, ilinniartitsisutullu ilinniarsimasuuvoq, aammalu perorsaanermut tunngasuni kandidatiulluni. Siornatigut Kommuneqarfik Sermersuumi perorsaasutut sulisimavoq.
”Qularinngilara Naussunguaq Lyberth atorfimmut tassunga naleqquttuusoq. Taassuma tunuliaqutai tunngavigalugit ingerlaannaq suliassaminut isertussaavoq, allannguutissanillu pisariaqartitatsinnik pilersitsilluni”, Helene Broberg Bertelsen unnersiorpoq.