Innuttaasunut

Thiiooq; Suli pitsaanerulersinnaavoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersooq ukiunik 10-nngortorsiorpoq. Ukiut 10-t matuma siornatigut kommunit kattussuutsinneqarput, ukiullu taakkua ingerlanerini kommuni Sermersooq ineriartupiloorsimavoq. Alliartorneq, ineriartorneq, pisariillisaanerit periarfissallu nutaat ukiut ingerlanerini pilersinneqarsimapput siunissami kommunip tunngavissai.

Suna killiffiua? Ukiut kingulliit 10-t qanoq ingerlasimappat? Suut ingerlalluarpat aamma suut ingerlalluannginneruppat? Kommunimi politikerit isumaat pillugit aperivagut.

Ulluni tulliuttuni nittartakkatsinni kommunit kattussuutsinneqarnerat pillugu politikerit isumaat atuarneqarsinnaapput.

Thiiooq Knudsenip Paamiuni innuttaasut amerlinissaat kissaatigaa kommunalbestyrelsimilu sulineq ilaatigut oqimaassinnaasaraluartoq ilisimavaa kingorna tamarmik iluatsissaqqaartut.

Kommunit kattussuutsinneqarnissaat 1998-imili eqqarsaataalersimasoq eqqaamavaa. Taamani ataatsimiinnerpassuit pisarput taamanilu pilersaarutaavoq kommunerujussuaq kommuninut ataasiakkaanut naleqqiullugu pitsaanerujumaartoq. Isuma tassaasimavoq kommunimut ataatsimut aaqqiisoqassasoq tamannalu innuttaasunut oqinnerulersitsissasoq. Kommunilli kattussuutsinneqarnerisigut suut tamarmik oqinnerulersimasutut isuma isumaqatiginngilaa.

”Innuttaasuulluni kommunerujussuanngornerup kingorna saaffiginninniartarnerput ajornarnerulersimavoq”, Thiiooq Knudsen oqaluttuarpoq. Ilerasuuteqanngilaq, kommunerujussuarmullu ilaaneq akuerisimallugu, illoqarfiilli minnerit aamma alliartortinneqassasut kissaatigaa.

Kommunimut saaffiginnittarnerup piffissap ingerlanerani pitsaanerulernissaa neriuutigaa. ”Saaffiginnissutit sapaatip akunneranik ullunilluunniit 14-inik sivisutigisumik utaqqeqqaartoqartarnissaa pisariaqanngilaq, tamannalu aaqqinneqartariaqarpoq”, Thiiooq Knudsen oqarpoq.

Kommunalbestyrelsimut ilaanini nuannaraa, aamma ilaanni oqittuinnaasanngikkaluartoq.

”Ataatsimiittaqaagut, ilaannikkut qulequttat oqimaatsupilussuusinnaasarput”, Thiiooq Knudsen oqarpoq nangillunilu,”qujanartumik aamma nuannisarnissarput piffissaqarfigisarparput, periarfissarpassuillu assigiinngitsut oqaluuserisarlutigit”.

Thiiuup takorluugaa tassaavoq ukiuni aggersuni inuit amerlanerusut Paamiunut nutseralissasut. Paamiuni amerlasuut saattuarniartarmata qujamasuutigaa, taakkumi illoqarfimmik uumatitsisuummata. ”Suliaat imaannaanngeqaaq Paamiunullu nutarsaaniarnermut tapertaalluartuullutik”, Thiiooq Knudsen oqaluttuarpoq.