Kommuneqarfik Sermersooq taamatuttaaq Sustainable Now “Tasiilami suleqatigiippugut”-mik taallugu ineriartortitsinermut suliniummik ukiuni arfineq-pingasuni ingerlanneqartussamik pilersitsipput.
Tasiilami nunaqarfiinilu meeqqat inuusuttullu inuuniarnermikkut atugaasa pitsanngorsarneqarnissaasa tamatumalu malitsigisaanik toqqissisimanerusumik isumannaannerusumillu peroriartornissaasa qulakkeerneqarnissaat siunertaavoq.
”Innuttaasut namminneq isumassarsiaat tunngavigalugit sullissisoqartarnissaa tamatumanilu innuttaasut salliunneqarnissaminnut namminneq iliuuseqartarnissaat sunniuteqartarnissaallu pingaaruteqartuusut erseqqissaatigissallugu pingaaruteqarpoq. Peqqinnissaqarfimmi, kommunimi, politeeqarfimmi, inuusuttut kulturikkut illorsuaanni il.il. sulisut Sustainable Now-imeersunit oqaloqatigineqarusupput, neriuppugullu taakku Tasiilamut tikippata innuttaasunit tikilluaqquneqarluarumaartut”, Meeqqanut Ilaqutariinnullu pisortaq Martha Lund Olsen oqarpoq.
Sustainable Now-imeersut aggustip 17-ianiit 27-ata tungaanut Tasiilamiissapput.
”Tunumi innuttaasorpassuit isumaqarput najukkaminni ingerlatsinerit Kitaanit aqunneqartartut, kitaanit timmisartumik tikeriarlutik aaqqissuussaanikkut ukiup affaata ingerlanerani allannguiartupallariarlutik aallaqqittartut, tamannalu pissutigalugu tusaaneqanngitsutut ikioqqugaluarlutillu ikiorneqarneq ajortutut misigisimasarlutik. Suliniummik ukiuni arfineq-pingasunik ingerlanneqartussamik pilersitsinerput ajornartorsiutit qulaani taaneqartut ilarpassuisa anigornissaannut innuttaasullu ineriartortitserusussuseqalernissaannut iluaqutaasinnaassangatipparput”, Martha Lund Olsen oqarpoq.
Borgmester Charlotte Ludvigsenip ineriartortitsinermut suliniummik matumani pineqartumik aallarniinissani qilanaaraa.
”Suliniut ukiuni arlalinni pilersaarusiorneqarpoq, maannalu aallarnerneqartussanngorpoq. Neriuppunga Tunumi innuttaasut namminneq iliuuseqaqataallutillu aaqqiissuteqarnissamut periarfissanik ujartueqataajumaartut. Innuttaasut peqataatinneqassapput, pisussanullu namminneq sunniuteqaqataanissaminnut periarfissaqartinneqassapput, tamatumalu ingerlarngata qanimut malinnaaviginissaa pissanganarpoq”, Charlotte Ludvigsen oqarpoq.
Paasissutissat piviusut:
Sustainable Now taamatuttaaq Kommuneqarfik Sermersooq suleqatigiillutik suliniummik ”Tasiilami suleqatigiippugut”-mik aaqqissuisuussapput.
Sustainable Now Naalagaaffiit Peqatigiit anguniagaat 17-iusut nunarsuarmut tamarmut atuuttut tunngavigalugit meeqqat isumannaatsumik alliartornissaannut ineriartortitsinermik suliaqartuupput. Anguniakkat nunarsuarmut tamarmut atuuttut 17-iusut tunngavigalugit anguniakkat ilaat 169-iusut nunat Naalagaaffiit Peqatigiinni ilaasortat tamarmik 193-iusut nunarsuarmi piitsuussutsip, kaattoqarnerata, assigiinngisitsisoqartarneratalu tamakkiisumik atuukkunnaarsinnissaannut pisussaaffeqartitaanerat, nunarsuarmilu inuit kikkulluunnniit pitsaasumik ilinniagaqarnissaannut peqqinnerulernissaannullu periarfissaqartitsinissaat, suliffinnik naammaginartunik pilersitsisarnissaat aningaasaqarnikkullu patajaannerusumik inissisimalernissaannik qulakkeerinnittarnissamut pisussaaffeqartitaanerat tunngaviupput.
Suliniutit assigiinngitsut suliniummut matumani pineqartumut assingusut nunani allani ingerlanneqartareerput, nunallu taakku inui najukkaminni atukkatigut pissutsit pitsanngorsarneqarnissaannut kajumissutsiminnik suleqataasimapput.
San Diegomi USA-miittumi illoqarfiup ilaa atassuteqaatitigut, isumaginninnerup peqqinnissaqarfiullu tungaasigut aaqqissuussaanermigut ajornartorsiuteqarsimavoq, illoqarfimmilu tassani inuit nuimasut arlallit innuttaasunit inuuniarnermikkut ajornartorsiutilinnit attavagineqarsinnaasunngorlugit katersuutsitaapput. Inuit nuimasuut taakku suleqatigiissitamik kulturikkut isumaginninnikkullu aaqqissuussinerit assigiinngitsut suliniutinik ingerlatsinerni akimmiffeqartarnernut tunngaviusartut anigornissaannut siunnersuisartussamik pilersitsinissaminnut aggersarneqarput.
Taamatuttaaq illoqarfimmi tassani innuttaasut najukkaminni atuarfinni katersuunnermikkut najukkaminni unammillernartut nalaattakkatik pillugit oqallissinnaasarnissaat suliniutini ukkatarineqarpoq. Toqqissisimaneq, peqqinneq, ilinniartitaaneq illoqarfiullu aaqqissuussaanerata tungaatigut ineriartortitsineq illoqarfiup immikkoortuini innuttaasunit sammineqartarsimapput.
Ingammik inuusuttut atukkatigut toqqissisimasuunissamut, peqqissuunissamut, ilinniartitaanermut pitsaanerusunik periarfissaqartitnnissaannik illoqarfiullu ineriartortinneqarnissaanik kajumissutsiminnik aallarneerusuttut suliniutilerinermik aqutsinermillu pikkorissartinneqarput. Inuusuttut taakku najukkaminni piorsaanermut aaqqiissuteqarniarnermi ineriartortitseqataasinnaasutut isigineqarput. Taamatuttaaq inuusuttunik angerlarsimaffinni, atuarfinni aqqusinernilu aaqqiagiinnginnernik pitsaaliuisartussanik pikkorissartitsisoqartalerpoq.