Innuttaasunut

Sermersooq neqerooruteqartitsisarneq pillugu inatsimmik tapersersuivoq:16 millioninik sipaareersimavoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersuup neqerooruteqartitsisarneq pillugu inatsit nutaaq tapersersorpaa, taanna malillugu pisortat neqerooruteqartitsisarneranni atugassarititat  pitsaanerusut aamma pisortanit pigineqartunit pisiniarnerni ammanerulernissaq pilersinneqassapput.

”Ukiuni kingullerni sisamani Kommunqarfik Sermersooq pisiniarnermut politikki erseqqaarissoq atorlugu sulisimavoq, tassani pisiat aamma avataaniit sullinneqarnerit tamarmik tamanut saqqummiunneqarlutik neqerooruteqartitsivigineqartarsimappput. Tamanna kommunip karsianut annertuumik sipaarutissanik kinguneqarsimavoq”, oqarpoq Kommuneqarfik Sermersuumi kommunaldirektøri Lars Møller-Sørensen.

Inatsimmi siunertaavoq unammillernerup pilersinneqarnissaa, taamaalillutik pisiortorfiit tamarmik suliassat pillugit neqeroorsinnaalersillugit, aamma pisortanik niueqateqarnerup paasisimasaqassuseq tunngavigalugu ingerlanneqarnissaa qulakkeerniarlugu. 

EU-mi inatsisit assingusut pisortanit neqerooruteqartitsisarnerni peqataanissamut soqutiginninneq annertooq pilersissimavaat. Unammillernerup annertunerulersup kinguneratut pisortani oqartussaqarfiit koruuninik millionilikkaanik sipaaruteqarsimapput, sipaarutillu atugarissaarneq pillugu suliassaqarfiit allat annertunerusumik pitsaassuseqalernissaannut atugassanngortinneqartarsimapput. Aamma sipaaruteqarfissaalluartoq Kommuneqafik Sermersuumi kiffartuusigasuartarfimmi pisortap Gerth Jakobsenip isumaqataaffigaa:

”Ukiuni kingullerni 4-ni pisiniarnermut politikkerput ukiumut 16 millioni koruuninik sipaarnermik pilersitsisimavoq. Tamatuma aamma kingunerisimavaa ikinnerusunik pisiortorfeqalerneq, ikinnerusunik pitsaanerusunilli pisiassanik toqqagassaqalerneq aamma internettikkut niuersinnaanermik aaqqiissuteqarnermik kinguneqarsimavoq. Minnerunngitsumillu pingaaruteqartoq tassavoq suliffeqarfiutitta pisiniarnermut piffissaq atortagaat annikillisimavoq, pingaarnertullu suliassaminnut piffissaq atornerulersimallugu.”

Tamatumunnga peqatigitillugu inatsit nutaaq aqqutigalugu neqeroortitsisarnermi  naammagittaalliuuteqartarfik pilersinneqassaaq, tassani pisiortorfiit toqqarneqarsimanngitsut neqeroorumminnik suliap misilinneqarnissaanik neqeroorfigineqarnissamik periarfissinneqarsinnaassapput, taamaalilluni suliffeqarfik neqeroorummik tunniussisoq neqeroorutimini suliani pitsaasumik periaaseqarnissaat pillugu pisussaaffilerneqassammata.