Charlotte Pike Ittoqqortoormiineersup kommunalbestyrelsimiinnermini nuannersut nuanninnginnerillu misigisarsimavai, ukiunili aggersuni pitsanngoriaateqarumaartoq qularutiginngilaa.
Charlotte Kommuneqarfik Sermersuumi Kommunalbestyrelsimi 2013-imit 2017-imut ilaasortaasimavoq. Taassuma kingorna sinniisutut qinigaavoq 2018-imilu aggustimit kommunalbestyrelsimut ilaasortaalerluni Malene Lynge taarserlugu.
2009-mi kommunit kattussuutinneqarmata annerusumik soqutigisimanngikkaluarpaa. Taamaattoq ingerlaannaq maluginiarsimavaa qitiusumut aaqqissuussineq sakkortusisoq. Allanngortoqarnera malugisimavaa, innuttaasunullu sullissineq qangatut ikkunnaarsimavoq. Innuttaasunut sullissivimmut saaffiginnikkaanni kingusiinnarujussuakkut akissuteqartoqartalerpoq. Maannali taamaakkunnaarpoq.
– Ullumikkut allaanerusumik ingerlatsisoqarpoq pitsaanerulerlunilu, Charlotte oqaluttuarpoq.
Aamma malugaa ullumikkut ukiut qulit matuma siornanut naleqqiullugu innuttaasut tusaaniarneqarnerulersimanerat, aamma pissutsit suli pitsanngortinniarneqarneri nalunngilaa.
Ugguarnaraali meeqqat atuarfianni atuartut 8. Klassemut killikkaangamik atuartut angerlarsimaffiannut elevhjemmimut aallartinneqartarmata, isumaqarlunilu illoqarfimmi najukkami meeqqat atuarfiat naammassisinnaasariaqartoq.
Kommunalbestyrelsimi sulinermini suliaq tamanna sorsuutigisimavaa. Sulili iluatsinnagu.
-Aamma qaqeqqinnissaa ilimaginngilara, tassami suliaq taanna iluatsinnginnakku inuttut ajutoornertut tigunikuugakku, Charlotte oqarpoq.
Siunissarli eqqarsaatigalugu isumalluarpoq. Kommunalbestyrelsimi suleqqinnissani qilanaaraa.
–Ukiuni aggersuni sorpassuarnik pisoqartussaavoq pissutsillu pitsanngorsaaviginiarlugit suliuaannarpugut, Charlotte oqaluttuarpoq.