Innuttaasunut

Aalborgip ulloqartinneqarnera: Siunissamut isummat nutaat

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Ukiut kingulliit sisamat Aalborg Kommune Kommuneqarfik Sermersoorlu piviusumik pisussaaffiusumillu suleqatigiinnermi isumaqatigiissuteqarput.  Ilaatigut isumaqatigiissutip kinguneraa Aalborgimi kalaallit suliffeqanngitsut angerlarnissaannut ikiorneqartarnerat, aamma Sermersuup Aalborg Kommunianit isumaginninnermut siunnersortinik attartorsinnaanerat kiisalu Sermersuumi suliffeqarfiiit akeqanngitsumik EU-mit tapisiassat pillugit siunnersorneqartarnerat.   Nuummi Aalborgip ulloqartinneqarneranut atatillugu isumaqatigiissut taanna nutarterneqassaaq.

Borgmesteriugallartoq Uju Petersen Aalborgip borgmesteria Thomas Kastrup-Larsen peqatigalugu aammali kommuninit taakkuninnga marluusuni politikerit arlallit atorfilittallu ippassaq sisamanngorneq augustip ulluisa 15-t Katuami politikkikkut workshoppertinneqarput.  Suleqatigiinnerup ineriartortinnissaa qanoq isumassarsiffiusinnaanersoq siunertaavoq taamaalilluni siunissami kommunimi innuttaasunut  iluaqutaanerulersinnaanissaa pillugu. 

”Kommunitsinnut Aalborg suleqatiginera assorsuaq isumaqarpoq nuannerporlu takullugu taama isumassarsianik amerlatigisunik susassaqarfinnut nutaanut suleqatigiissinnaanerput”, Uju Petersen oqarpoq. 

Ilaatigut isumassarsiat eqqartorneqartut tassaapput ataatsimoorussamik teknologi qorsuk pillugu testcenteri, atuarfeqarfiit pillugit suleqatigiinneq aamma illoqarfiup pilersaarusiorneranut tunngasut pillugit suleqatigiinneq. 

Kommunit taakku marluullutik maanna isumassarsiat suliarinissaat ingerlatiinnassavaat nutaamik suleqatigiinnissamik isumaqatigiissummut ilanngullugit.