Innuttaasunut

Meeqqat timersornermut saatsinnissaat pingaaruteqarpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Erik Angenold timersoqatigiiffimmi K-64-mi siulittaasuuvoq, taannalu isumaqarpoq meeqqanut inuusuttuaqqanullu sammisassaqartitsinissaq pingaaruteqartuusoq.

”Timersorneq timersornerinnaanngilaq, pitsaaliuinermullu tunngasorujussuulluni. Meeqqat peqqinnartumik sammisaqarnissaat pingaaruteqarpoq”.

Erik Angenold K64-mi (Kuummiut 64) siulittaasuuvoq ulluinnarnilu Piorsaavik Tasiilami aqutsisuulluni.

Tallimanngornerit tamaasa ”nuannaffik” timersortarfimmi ingerlanneqartarpoq, tassanilu meeqqat 14-15-t tungaannut ukiullit peqataasarput.

”Tasiilami meeqqat inuusuttullu nuannaffik ingerlanneqaraangat nuannarisaqaat. Takkuttut amerlajuaannarput, ingammik ukiukkut. Maani meeqqat eqqissisimaartarput nuannisartarlutillu. Isikkamik arsartarput, assammik arsartarput, arpattagiartarput allanilluunniit timersuutinik sammisaqartarlutik. Haali immikkoortunut pingasunut avittarparput. Nukarlernut, akullernut anginernullu. Anginerit arsarneq soqutiginerusarpaat minnerillu høvdingebold arpattagiarnerluunniit soqutiginerusarlugu”.

Aasakkut meeqqat 20-25-t missaanniittarput ukiukkullu meeqqat 100-t missaanniittarlutik.

”Ernikka aamma peqataasarput. Arfineq marluniit qulingiluap tungaanut ingerlattarparput, ilaannikkullu ernikka arfininngulaaginnartoq timersortarfiliartarput qilanaartangaaramik. Meerarpassuit qilanaangaarlutik takkutijaartarput”.  

Nuannaffik Kommuneqarfik Sermersuumit ingerlanneqartarpoq illoqarfimmi peqatigiiffiit peqatigalugit.

”Naak Tasiilami peqatigiiffiit amerlangaluartut K64-nangajak kisiartaalluni aaqqissueqataasarpoq. Nuannissangaluarpoq peqatigiiffiit amerlanerit peqataasaraluarpata, Erik Angenold oqarpoq.

”Tunumi arsarmik unammersuaarnerit peqatigiiffitta aamma aaqqissuussarai. Inuiattut ullorsiortatta aamma assigiinngitsunik aaqqissuivugut. Timersoqatigiiffiit siuarsarnissaat pingaartitaraarput, kiisalu aamma illoqarfimmi nunaqarfimmilu sammisassaqartitsiniarneq aamma pingaartitaralutigu, Erik Angenold oqarpoq.

K64 100-t missaannik ilaasortaqarpoq.