Anthon Joelsen ukiuni qulingiluanngulersuni Kommuneqarfik Sermersuumi aatsisartutut sulivoq, kommunimilu ilisimalluarneqalernikuulluni.
Suleqatini pingasut peqatigalugit kommunimiit allakkat isaasut anisullu isumagisarivaat.
”Suliffiup ilua nuannersuuvoq, suleqatigullu ilutsinni suleqatigiilluartarnerput uannut nuannerlunilu pingaaruteqarpoq.”
Ukiuni qulingiluanngulersuni Athon Joelsen aatsisartutut sulisimanermini pisoqarfiusimaqaaq.
”Qujanartumik digitalisering ineriartormat, siullermik allakkat agguaassassat amerlanerusarnikooqaat, massakkullu ulapittaraluarluta ulapinnginneruvugut.”
Anthon Joelsen suleqatinilu suliartoraangamik kommunep immikkoortortaqarfiinut assigiinngitsunut allakkanik aallerneq agguaannerlu suliarinerusarpaat.
”Naak takuneqarpiarneq ajoraluarluta maaniippugut. Ullormut marloriaq immikkoortortaqarfinnut allakkisartarpugut, taamaammat ulapittaqaagut, qujanartumillu suleqatigiilluartaratta.”
Allakkisarneq, atortussanillu inniminniineq aatsisartut kisimik ulapputigineq ajorpaat. Viceværtit qanimut suleqatigisarpaat.
”Massakkut viceværtit ilaat sulinngiffeqarmat, viceværti ikiussavara. Kommunep pequmaasivianut ilisivimmik aallissaagut. Ullumikkullu pingasut tungaanut ikiussavara, taamaaseriarlunga soraarnissama tungaanut suleqatikka orneqqissavakka.”
”Ullorlu naatinnagu aamma allaffiit nerrivissaat arfineq pingasut katitissavagut,” Anthon Joelsen oqarpoq.
Kommunemi aatsisartut assigiinngitsorpassuarnik aamma suliaqartarput, kommune ammarlugulu matusarpaat, taavalu ammanerata nalaani eqqissisimasumik isersimasoqartarnissaa suliassaata ilagisarlugu, soorluttaaq erfalasumik amusineq aamma isumagineqartartoq.