Innuttaasunut

Blok 1: Isaterineq maanna aallartippoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Nuuk Centerip sanianiittoq aserfallannikooqisorlu Blok 1, oqaluttuaannanngulerpoq. Tallimanngornermi 12. juuli blokki ukiuni kingullerni marlunni inoqarsimanngitsoq isaterneqarluni aallartinneqassaaq. 

Blok 1-imik piginnittuussuseq Namminersorlutik Oqartussaniik Kommuneqarfik Sermersuumut tunniunneqarnikuuvoq.

Blokki ukiuni kingullerni marlussunni inoqarsimanngitsoq maanna isaterneqartussanngorpoq, tamannalu borgmesterimut nuannaarutaavoq.

”Blok 1 sivisuumik inoqarnani uninnganikuummat, isaterneqalernera nuannaarutigaara, taamaasilluni illoqarfiup qeqqani kusassaataasussamik nutaamik sanaartorfiusinnaanngussammat.” Borgmester Charlotte Ludvigseni oqarpoq.

Kommunip illoqarfimmik nutarterinermik suliaqartussatut ingerlatseqatigiiffik Siorasiorfik-Nuuk City Development aamma sanaartornermi siunnersorti Orbicon Arctic A/S nammineq toqqarnikuuai.

”Isaterinerup suliarineqarnerani eqqaamiuusunut Nuuk Centerimilu pisinianut sapinngisamik akornutaavallaannginnissaa sulissutigissavarput”, pisortaaneq Jens B Frederiksen oqarpoq.

Isaterineq 12. juli aallartinneqassaaq, aatsaalli sapaatip akunneri arlallit qaaniuppata suliaq ersarinnerulissaaq. Siullermilli blokkimi atortut ikuallassinnaasut, ledningit eqqakkallu avatangiisinik mingutsitsisinnaasut piiarneqaqqaassapput. Isaterineq oktobarimi naammassissangatinneqarpoq, sumiiffimmilu sanaartorneq 1. novembarimi 2019 pissasoq naatsorsuutigineqarpoq. Kingo A/S isaterisuussaaq.