Tasiilami ivigaaraasartalimmik arsaattarfik innuttaasunit nuannarineqarluarpoq.
Ukioq kingulleq Tasiilami ivigaaraasartalimmik arsaattarfik siulleq sananeqarpoq, arsaattarfillu meeqqanit, inuusuttunit inersimasunillu nuannarineqarluarpoq.
”Arsaattarfik nuannarineqaqaaq atuisoqartuaannangajallunilu. Soqutigineqangaarmat pilerngunneqartarpoq, taamaattumillu skemaliortariaqarsimavugut, tassanilu timersoqatigiit salliutissimavagut, sunngiffimmi susassaqartitsinermi siunnersorti Gert Ignatiussen oqarpoq.
Ivigaasaarartalimmik arsaattarfik Kommuneqarfik Sermersuumiit ingerlanneqarpoq.
”Ulluni makkunani tunumi arsamik unammersuaartoqarpoq illoqarfippullu inuppaalussuaqarpoq. Nuanneqaaq takullugu arsaattarfik taamak nuannarineqartigisoq”.
Ivigaasaarartap tippitaa 65×100 meteriuvoq arsaaffittaalu 61×94 meteriulluni.
Gert Ignatiussen Kommuneqarfik Sermersuumi suleqatini peqatigalugit illoqarfimmi assigiinngitsunik sammisassaqartitsisarpoq.
”Ukiumoortumik pilersaarusiortarpugut innuttaasullu susassaqartitsisarnerput nuannarilluartarpaat. Qanittumi sommermarked ingerlassavarput, tassanilu eqqarsaataavoq silami nerrivinnik ilioraanissaq, taava innuttaasut sukujunnik tuniniaasinnaassapput. Ukiumut marloriarluta marked ingerlattarparput. Aasakkut ukiukkullu”.
Qaammatip tulliani kommuni asimut asiartitsissaaq, tassanilu kikkulluunniit peqataasinnaapput.
”Maannakkut angallatissatsinnik ujaasivugut. Akianut asiartitsiniaraluarpugut, angallanniarnerlu iluatsissanngippat illoqarfiup eqqaani asiartitsiinnassaagut, pisuinnarnut orninneqarsinnaasumut”.
Peqatigiiffilerineq
Gert Ignatiussen qeqaqqammerluni peqatigiiffilerinermut saappoq.
”Blå Korsinut ilannguppunga sivitsunngitsorlu siulersuisunut qinigaavunga. Taamaattumik suliffiga, sunngiffimmi suleqataaneq nuannareqaara. Tasiilami nunaqarfinnilu peqatigiiffiit attaveqarfigisarpakka. Ukiumut marloriarluta peqatigiiffiit naapittarpagut oqaloqatigalugit sumullu killinnersut paasiniaaffigisarlutigit. Peqatigiiffiit ilaat unittooqqapput allallu ingerlalluarlutik. Tasiilami nunaqarfinnilu peqatigiiffiit maannakkut 23-t missaanniipput, timersoqatigiiffiit, erinarsoqatigiiffiit il. il.”
Gert Ignatiussenip kissaatigigaluarpaa nunaqarfinni suli sammisassaqarnerussasoq.
”Kulusummi katersortarfik maannakkut kommunimit akisussaaffigineqarpoq, kissarneq kommunimiit akilerneqartarpoq nunaqarfinnilu aqutsisut suleqatigalugit susassaqartitsisarpugut. Nunaqarfiit allat ilanngunnissaat kissaatiginaqaaq, Gert Ignatiussen oqarpoq.