”Nutaamik sukumiinerusumillu systemitaarnitsigut allaffissornikkut ajornanginnerulissooq”, Kommuneqarfik Sermersuumi Meeqqanut Atuarfeqarnermullu Ingerlatsivimmi fagschefi Frederik Lundblad oqarpoq.
Digitaaliusumik atortorissaarutitaarnissaq Kommuneqarfik Sermersuumi sivitsortumik pilersaarutaasimavoq, tassani peqatigiiffiit timersortarfiillu imminnut ingerlattut ataatsimut systemimi katersorneqarlutik, innuttaasunit allaffissonikkullu takuneqariaannanngorlugit, taamaalilluni inniminnernissai tamanut ajornaannerulerluni. Pisaarinissaannut aqqut sivisukulussimavoq.
”Systemi pisariaqartitatsinnut tamanut atorsinnaasoq sivitsortumik ujartorparput, paasinartarporli systemit amerlasuut ataasiinnarmik piginnaasallit, taava systeminik allanik tapertaasinnaasunik ujartueqqittarpugut,” Frederik Lundblad oqaluttuarpoq.
Aaqqiissutaavorlu BRND, tassani takuneqarsinnaallutik peqatigiiffiit allattorsimaffii, inniminniisarfik tapiissutinullu systemiat, sammisassanut iserfiit, tassani takuneqarsinnaallutik kommunimi peqatigiiffiit, sammisassat, illuutit halillu, piffissat.gl-mi piffissat atorneqanngitsut innuttaasunit inniminnerneqarsinnaallutik, infoskærme ilanngullugit.
Kommuneqarfik Sermersuumuttaaq aalajangersimasoq pissutaaqataavoq: oqaatsit. Systemi kalaallisut nutserneqarsinnaassaaq.
”Oqaatsit tungaasigut piumasaqaativut ilanngullugit eqqarsaatigineqarmata systemip pisinnaasai tupaallaatigilaarpakka” Frederik Lundblad oqarpoq, itisilerlugulu BRND-mik aaqqiissummut naatsorsuutigisat qaffasissuusut.
”Suut tamarmik ataatsimut takuneqarsinnaanissai siunertaasimavoq, taamaalilluni kommune innuttaasunit tikikkuminarninngorlugu – aammalu kommunimit aningaasaliissutit qanoq agguaanneqartarnerat ammanerusumik takuneqarsinnaanngorlugit”.
Systemi tamarmi Kommuneqarfik Sermersuumi takuneqarsinnaalissaaq kingusinnerpaamik aggustimi 2019.