Folketingsvalgimut qinersineq aallartereerpoq – unnugu kingusinnerusukkut kikkut marluk Nunarput sinnerlugu folketingimut ilaasortanngussanersut takussallugu pissanganarpoq.
”Qinersineq ammarpoq”, taama oqarpoq qinersinermi aqutsisoq Frederik Lundblad nal qulingiluanngormat.
Nuummi Illorsuaq Timersortarfik inunnik ulikkaarpoq, aammalu folketingimut qineqqusaartut arlallit najuupput. Nalunaaqutaq qulingiluanngormat, qinersiartortut amerlasuut taasiffissanut taasiartorlutik sassarrapput.
Frederik Lundblad aappassaaneerluni qinersinermi aqutsisuuvoq.
”Suleqatigiinnut peqataalluni tamatigut pissangarnartarpoq. Ukioq manna taasiartortarfiit iserfissat arfineq marluussasut toqqarsimavarput, innuttaasunut piuminarnerulersillugu, tulleriiaattut amerlannginniassammata. Nalunaaqutaq 20 nallerniariarpat, taava allakkatigut taasinerit kisillugit aallartissaagut, tamatumalu kingornagut taasinerit immikkoortiterlugit aallartissaagut. Siullermik taasinerit partiikkuutaarlugit agguataassavagut, taassuma kingornagut taasinerit qineqqusaartut kikkuuneri najoqqutaralugit immikkoortitissallugit. Taamaaliorluni sukkanarnerusarpoq”, Frederik Lundblad oqarpoq.
2015-imi kingullermik folketingimut qinersinersisoqarmat taasisinnaasut 50 procentii qinersiartorput.