Services

Najukkat nalunaarsorsimaffii pitsanngussapput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Illoqarfimmi innuttaasut arlallit nuunngikkaluarlutik nutaamik najugaqalerput (adresseqalerput)

Assersuutigalugu innuttaasut Nuummi Blok 1-imi najugallit siunissami allagarsiassatik H.J. Rinksvej 10-mut nassiunneqarnissaat piumasarissavaat. Kalaallit Nunaanni Najukkanik Nalunaarsuiffiup pilersinneqarsimanera allannguinermut pissutaavoq, najukkallu tamarmik maanna assigiimmik nalunaarsoreerput.

Kalaallit Nunaanni 30.000 miss. najugaqarfiupput, kingumullu qiviaraanni kommunini assigiinngitsuni assigiinngitsumik nalunaarsorneqartarsimapput suliffeqarfinni pisortanilu assigiinngitsumik periuseqarluni nutarsarneqartarluni. 

Ukiut marluk ingerlanerini suliarineqareerlutik Kalaallit Nunaanni najukkat tamarmik Kalaallit Nunaanni Najukkanik Nalunaarsuiffimmi (GAR) katersorneqareersimapput, maannalu nalunaarsuiffiit assigiiaat atorunnaarsinniarlugit sulissuteqartoqarpoq taamalu kikkut tamarmik najukkanik GAR aqqutigalugit aallersinnaalerniassammata. Tamanna iluaqutissarpassuaqarpoq.

”Suliffeqarfinni pisortanilu, najukkat pillugit nalunaarsuiffimminnik nutarterisarsimasunik, sulinermik sipaaruteqarnissap saniatigut innuttaasut allakkeriviillu ujarlertarnerat ajornannginnerulissaaq. Pingaarnerugunarporli politiit upalungaarsimasullu ikiuiartornissamut atatillugu piaartumik najukkamik nassaarsinnaanissaat”, digitalimik sullissinermut aqutsisoqarfimmi immikkoortortaqarfimmi aqutsisoq Tom Nørregaard Andersen oqarpoq.

Nalunaarsuiffinni nutaani najugaqarfik akuerineqannginnerani inatsisitigut akuerisaanersoq misissorneqarsinnaavortaaq. Assersuutigalugu Pukuffimmi imaluunniit illuni inuussutissarsiornermut taamaallaat atorneqarsinnaasuni najugaqarnissaq inerteqqutaavoq.

Sullissivik.gl atorlugu digitalimik nuunneq ajornanngilaq. Tassani najugaqarfiit allattorsimaffiat innuttaasutut nuuffigineqarsinnaasut allattorsimapput. Najukkatut nalunaarfiginissaanut kissaatigineqartoq allattorsimaffimmiinngippat kommune attavigineqassaaq, taava kommunip najugaq tassaniinnersoq inatsisinullu naapertuunnersoq misissussavaa. Taamaappat allattorsimaffimmut ilanngunneqassaaq.

Najukkanik nalunaarsuiffik GAR Paasissutissat tunngaviusut pillugit programmip ilagaa, taannalu Naalakkersuisut digitalinngortitsinermi periusissiaata ataaniippoq. Ugguuna paasisaqarnerusinnaavutit http://www.digitalimik.gl/ paasissutissallu allat pissarsiarineqarsinnaapput digitalisering@nanoq.gl-ikkut saaffiginninnermi.