Innuttaasunut

Maligassiuisut ilinniartunut legatinnattut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Borgmesterip Kommuneqarfik Sermersuup ilinniartunut legatia 2019 GUX-imi ilinniarnertuunut marlunnut tunniuppaa.

Ilinniarnertuunngorlaat, ilaqutaat ilinniartitsisuilu Nuummi GUX-ip aulaani soraarummeerluni naammassinermut katersuussimapput. Borgmesteri Charlotte Ludvigsen peqataavoq Kommuneqarfik Sermersuullu ilinniartunut legatia ilinniarnertuunut inuusuttunut marlunnut, Nicholas Ricard Rosing Petersenimut aamma Rasmus Kristian Ilannquaq Peter Josefsenimut tunniullugu, taakku atuartitsissutini immikkut ittumik angusaqarsimapput, ikinngutaalluartuullutik aamma maligassiuisuullutik.

Borgmesterip oqalugiarnermi aallaqqaataani ilinniagaqarlutik naammassisaqartartut nersualaarpai, nangillunilu, “naatsumik oqaatigalugu Ilinniagaqarneq ilissi inuusuttut siunissassinnut pingaaruteqarluinnarpoq – taamaattumillu aamma nuannertaqaaq, ulluni ullumitut ittuni inuit eqiasuillutik ilinniagaqarnissaminnik toqqaasimasut, imminnullu matunik amerlanerusunik ammaassisut, nalliuttorsiutigisinnaasaratsigit.”

”Sunaluunniit kissaatigisarsi ilinniarsinnaavarsi, toqqaaginnassaasi anguniagaqarlusilu, taava anguniakkasi sinnattusilu piviusunngorsinnaapput” borgmester Charlotte Ludvigsen oqarpoq, erseqqissaavorli ilinniarnermik periarfissanillu sorsuuteqarneq imaannaanngissinnaasartoq qasunarlunilu, nangipporlu, ”Kisianni ilissi unammisassat unammillertarussigit, imminnullu taamaattumik tunillusi, taava ilungersuutisi  inuunissi sinnerani kusanarlutik ilissinnut uteqattaartassapput.”

GUX-imi ilinniartitsisut Nicholas Ricard Rosing Petersen aamma Rasmus Kristian Ilannquaq Peter Josefsen ilinniartunut legatinnannissaannut innersuussisimapput.

Nicholas Ricard Rosing Petersen ilinniartunut legatimik tunineqarnissaminik innersuunneqarpoq inuugami assut tamatigoorluinnartoq – ilinniarnertooq pikkorilluinnassuseqartoq, ikinngutaalluinnartorlu atuaqatiminut akisussaassusermik tigusisartoq. Nipilersortarpoq, titarsaasarpoq qalipaasarlunilu, aamma illoqarfimmi sammisassani peqataalluartarpoq aamma inooqataanikkut tunngassuteqartunut amerlasuunut peqataasarluni.

Rasmus Kristian Ilannquaq Peter Josefsen ilinniartunut legatimik tunineqarnissaminik innersuunneqarpoq iluatsilluartumik ingerlasimagami. Ilinniagaqarnissani pillugu nammineq akisussaassusermik tigusisimavoq, ilinniartunullu allanut maligassiuisunngorsimalluni. Inuttut atukkani pissutigalugit ilinniarnertuunngorniarfimmit, 3.G-p aallartinnerani uniinnangajassimavoq, kisiannili kusanarluinnartumik ilinniarnertuutut soraarummeersimalluni. Piumassuseqarluaraanni qanoq angusaqarluarsinnaassuseqarnermut assersuutissaavoq.