Kommuneqarfik Sermersuumi ilaqutariinnut siunnersortit ukioq kaajallallugu kommunimi angalasarput, ilaqutariit imminnik ikiorserlutik ingerlaqqinnissaannut iluaqutissaannik siunnersoriartorlugit
”Ilaqutariit pitsaanerusumik inuuneqarnissaminnik kissaateqartut tamaasa ikiorseriartorlugit ornittarpavut. Taamatut suliaqarneq pissanganartuuvoq, aammalu allanngueqataasinnaagaangatta nuannarisarparput” ilaqutariinnut siunnersorti Maren Heilmann oqarpoq.
Angalaqatigiittartut tassaapput Sofie Rosa Thorleifsen aamma Maren Heilmann. Taakku ilaqutariit ineriartornissaannut pikkorissaasarput, tamatumani samminerusarlugit imminut ikiorsinnaalernissamut ikiorsiinerit, taakkulu arlalinnik imaqartarput. Pikkorissarnermi peqataanermi ilaatigut illit nammineq inuttut ineriartornerit pillugu imminut ilinniassaatit, kisiannili aamma ileqqorissaarnermut tunngasut ilaqutariinnilu naleqartitat pillugit ilikkagaqassallutit: Illit suna atuuffigaajuk, illit nammineq inuttut naleqartitatit suuppat, aammalu illit nammineq qanoq naleqarpit?
“Aamma angerlarsimaffimmi persuttaasarneq sammineqartarpoq. Ilikkagassavit ilagivaat persuttaasarneq angerlarsimaffimmut aappariinnermullu qanoq takkuttarnersoq, aammalu qanoq annertusiartorsinnaanersoq. Uagut nassuiaatigisarparput assersuutigalugu asannileqqaarnermiit persuttarneqarnissap tungaanut qanoq ingerlasoqarsinnaanersoq”, Sofie Rosa Thorleifsen nassuiaavoq.
Pikkorissarnermi aamma meeqqat ineriartortarnerat ilikkagassat ilagivaat, qanoq killilerneqarsinnaanerat, aammalu siunnerfilimmik qanoq attaveqarfigisinnaanerat immissinnullu qanoq attaveqaqatigiilersinnaanersi. Pikkorissarnermi attaveqaqatigiinneq pingaarutillit ilagivaat, taamaattumik oqaloqatiginneriaaseq aamma ilikkagaqarfigissavat, meeqqanillu perorsaanermi sakkussat suunersut ilikkagassat ilagisarpaat. Silarsuaq meeqqat qanoq paasivaat, suna piginnaasarivaat aammalu qanoq ilillutik qamuuna timikkullu ineriartortarpat? Meeqqat mikisunnguunerminniit inuusuttuaranngulernerup tungaanut, meeqqat eqqarsartarnerat paasisaqarfigissavat, tamakkulu qanoq illit iliuuseqarfigisinnaaneritit pillugit paasisaqarfigalugit.
Allanik ikiuniarluta taamaaliortarpugut
”Nunaqarfiit illoqarfiillu ukioq kaajallallugu tikittarpavut, taavalu pikkorissareersimasut malitseqartitsiffiginissaannut periarfissaqartarluta. Allanik ikiorsiisimagaangatta tamatigut nuannertarpoq. Taamaammat taamaaliortarpugut, taamaaliortuaannassallutalu, Maren Heilmann oqaluttuarpoq.
Taanna nangippoq: ”Nuannersorpassuarnik utertitsiffigineqartarpugut, qaammatillu arlalissuit qaangiunnerini inuit naapeqqikkaanni, ingerlariaqqissimanertik oqaluttuarisarpaat, meeqqaminnut pitsaanerusumik attaveqalersimallutik, imaluunniit atornerluijunnaarsimallutik, taamaattumik suut tamarmik naleqarput.”
Ilaqutariinnut pisariaqartitsisunut oqaloqateqartarfik café
”Kommuneqarfik Sermersuumi Inuusuttut Kommunalbestyrelsiat aamma ilaqutariinnik pisariaqartitsisunik oqaloqateqartarfimmik cafémik pilersitsinikuuvoq, taannalu aamma uagut isumagisarparput. Pissanganartorujussuuvoq, ineriartornerlu ilorraap tungaanut saatitseqataaffigisinnaagutsigu nuannaarutigissavarput” Sofie Rosa Thorleifsen nassuiaavoq.
Ilaqutariinnik pisariaqartitsisunik oqaloqateqartitsisarfiit tassaapput meeqqanut femte klassemi anginernilu atuartunut ilaqutaannullu naleqquttut. Oqaloqatiginninnerni holdikkaartarput, apeqqutit assigiinngitsut eqqartorneqarlutillu oqaloqatigiissutigineqartarput, apeqqutaasarluni inuusuttut sunik eqqartugaqarusunnersut. Imaassinnaavoq pinaveersaartitsinermut tunngasut, sunngiffimmi sammisassat tusagassiutiniluunniit sammineqartut ilaat.