Services

Tunumi aalisarnermik inuussutissarsiorneq nukittorsarneqassaaq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Tunumi piniarnermut aalisarnermullu inuussutissarsiuteqarnerup siuarsarneqarnissaanik qulakkeerisoqarnissaa pillugu Aalisarnermut, Piniarnermut Nunalerinermullu Naalakkersuisoqarfiup aamma Kommuneqarfik Sermersuup siunnerfigisaq pillugu siunnerfigeqatigiinnissamut isumaqatigiissut atsiorpaat.

Tallimanngormat ualikkut isumaqatigiissut borgmester Asii Chemnitz Narupimit aamma Aalisarnermut Piniarnermut Nunalerinermullu Naalakkersuisoqarfimmit Naalakkersuisumit, Jens Immanuelsenimit  atsiorneqarpoq.

Isumaqatigiissut Tasiilami eqqaanilu aalisartunut piniartunullu annertuumik sunniuteqassaaq. Suleqatigiinnit anguniarneqarpoq Tasiilami piaartumik tunitsivimmik pilersitsisoqassasoq, namminersortut suleqatigalugit. Tunitsivik tunisassiorfillu pilersinnissai siunnerfigeqatigiinnissamut isumaqatigiissut  pilersaarutigineqarpoq, namminersorlutillu sulisut aningaasanut inatsisit aqqutigalugit ingerlatsinissamut tapiissutinik qinnuteqarsinnaalernissaanut periarfissaqalissallutik.

Kommuneqarfik Sermersuup piniartuunermiit aalisartuunermut ikaarsaariarnerup qitiutinneqarnissaanut pikkorissartitsisoqartarnissaa isumagissavaa.

Asii Chemnitz Narup Jens Immanuelsennilu Tunumi aalisarnerup ineriartornissaa malinnaavigissallugu qilanaarutigaat.

“Aalisarnermik inuussutissarsiorneq periarfissarpassuaqarpoq, tunitsiviullu nunaqqatigiinnut pitsaasumik sunniuteqarnissaanut isumalluaqaluta. Immikkoortumi sulisussaqartillugu suliffissanik amerlanernik pilersitsinissaa qularnanngilaq, kisianni suliffissatut periarfissat killeqarlutik.”

Ittoqqoortoormiit tullinnguuppoq

Tasiilami suliniutit nutaat suliarinerani saniatigut suleqatigiit Ittoqqortoormiini piniarnermi inuussutissarsiornerup ineriartortinneqarnissaa sulissutigissavaat. 

“Suleqatigiissitamik periarfissanik ujartuisussanik pilersitsiniarpugut, Tunumi aalisarnermik piniarnermillu inuussutissarsiornerup ineriartortinnissaanut suleqatigiinnit tapersersuisinnaasunik. Pisariaqartitsineq naapertorlugu suleqatigiissitat ukiumut minnerpaamik marloriarlutik naapittassapput”, Asii Chemnitz Narup Jens Immanuelsennilu oqarput.

Aalisarnermut, Piniarnermut Nunalerinermullu Naalakkersuisoqarfiup aamma Kommuneqarfik Sermersuup Tunumi aalisarnermik piniarnermillu inuussutissarsiuteqarnerup ineriartortinnissaanut nammineq suliffiutillit peqataatinneqarnissaat kissaatigaat. Tamatumani namminersortut pioreersut nutaallu tunitsivimmik suliffissanillu nutaanik pilersitsinissamut peqataarusuttut pineqarput.