Innuttaasunut

Qassutitoqqat issiavittut nutaamik atorfissartaarput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Qassutit qalullu atorunnaakkat Nuup qeqqani kommuunip allaffeqarfiata silataani issiavittut atorneqalerput.

Qassutit, qalut ningittakkallu 32 tonsit missigi immikkoortiterneqarlutik, salinneqarsimapput agguarneqarlutillu. Tassani plastikkimik tunisassiornermi atugassatut ilanngunneqartarput. Maannalu silami issiavissatut aamma.

Qassutitoqqat sannaasa karraasaat salitat tassaapput tunisassiornermi atorneqalersartut. Kissanneqartarput, aatsinneqarlutik kuitsivimmullu kuineqartarlutik. Kommuunip suleqatigisaata Plastix A/S-ip karraasat salittarpai, qassutinit qalunillu mingunnartuusinnaasut tunisassianut nutaanut ingerlateqqinneqannginniassamata.

Plastikkip minguitsup atorneqarneratigut, issiaviit atorneqarunnaarpata sequtserneqarsinnaassapput allanullu atoqqinneqarlutik. Taamaammat plastikki issiavittut atorfissaaruppat atoqqinneqarsinnaalluni.

Aalisarnermi atortut atorunnaakkat siornatigut ajornartorsiutaasarsimapput, isumatusaartumik suliarineqarnissaat ajornakusoortuummat – nunamilu eqqaavissuarni igitanut ilaatiinnarneqartarlutik.

”Eqqakkat eqqaavissuarnut igiinnarneqartartut millisinneqarnissaat tamaviaarluta sulissutigaarput. Aalisarnermi atortut matumani annertupput nuannaarutigaarpullu suliniummi uumannga taamatut angusaqarsinnaasimagatta, nalunnginnatsigut qanoq ajornartorsiutaasinnaatigisut. Ingammik silaannarmut imaanullu qimaannarneqarsimagaangata,” Jonas Søndergaard, Kommuneqarfik Sermersuumi nakkutilliisoq oqarpoq.

Ajornartorsiut Kommuneqarfik Sermersuumiinnaq uppataanngilaq. Namminersorlutik Oqartussat suliniaqatigiiffiillu allat, plastikkimik eqqakkat, soorlu qassutit ningittakkallu imartatsinnit salinneqarnissaannik suliniutinik allartitsisimapput.