Meeqqanut inuusuttunullu kinguaassiutitigut atornerluisarneq akiorniarlugu suliniuteqarnissamut Kalaallit Nunaanni borgmesterit tamakkerlutik tallimanngorpat ataatsimiillutik eqqartueqatigiissapput. Naalakkersuisut Siulittaasuat Kim Kielsen kiisalu Naalakkersuisunut Ilaasortaq Martha Abelsen ataatsimeeqataanissamut qaaqquneqarput, kisianni arlaannaalluunniit peqataanissamut ilimasaarisimanngilaq.
Meeqqanik inuusuttunillu kinguaassiutitigut atornerluisarneq akiorniarlugu suliniutit qanoq annertusarneqarsinnaanersut borgmesterinit tamanit tallimanngorpat eqqartorneqassaaq. Ataatsimiinnissaq sioqqullugu Kommuneqarfik Sermersuumi borgmesteri Asii Chemnitz Narup (IA) ima oqaaseqarpoq:
”Misigisimavunga pinngitsaaliisarnerit kommunitut immikkoorluta namminersuutigissagutsigit qangersinnaajunnanngikkivut ataatsimut paaseqatigiissutigigipput, suleqatigiissutigisariaqarpavummi, aamma kinguaassiutitigut atornerluisarnerit inuiaqatigiinnut inuppassuarnullu aserorsaataasut taamaativinniassagutsigit suliniutinut nutaarluinnarnut ammasuusariaqartugut ataatsimut nassuerutigigipput misigisimavunga.”
”Inuiaqatigiittut kinguaariippassuarni kinguaassiutitigut atornerluisarneq piusimasoq uninnanilu ingerlaannartoq tamanna ajorluinnarpoq, inuppassuarnullu aserorsaataalluinnartuusoq nassuerutigisariaqarparput. Nappaatipalaatut illuni inuiaqatigiit ilarujussuanut eqquisoq matumani pineqarpoq. Unitsittariaqarpoq, uangalu inuttut nammineerlunga annertuumik suliniuteqarnissannut piareersimavunga. Ajoraluartumillu nassuerutigisariaqarpara, soorunalimi inuppassuit ataasiakkaat siuariarnissaannut ikiortarpavut – kisianni piffissaasukkut imaluunniit naammattumik ikiueqqajanngilagut. Ajornerpaarlu tassaavoq: Ajorluinnartumik uteqqiattumillu pissusilersorneq unitsissimanngilarput. Kinguaassatta peroriartorlutik inuunerminni ajornartorsiutit taama ittut nalaattariaqassagaat eqqarsaatigissalluguluunniit saperpara.”
”Tallimanngorpat borgmesterit akornanni ammasumik eqqartueqatigiinnissatsinnut assut qilanaarpunga. Iluatsissimannginnerput peqatigiilluta nassuerutigisinnaagutsigu, aamma ataatsimoorluta nassuerutigalugu allatut annertunerusumillu iliuuseqartoqartariaqartoq, Naalakkersuisullu oqaloqatigisinnaagutsigit, kattuffiit kajumissutsiminnik suliniartut peqataatikkutsigit, oqartussat susassaqartut sulisillugit aallaqqaataaniillu mattussinata – taava immaqa pissuseq allanngortissinnaassavarput. Upperilluinnarparali tamanna ataatsimoorluta iliuuseqarfigisassarigipput” Asii Chemnitz Narup naggasiivoq.
Kim Kielsen ataatsimiinnissamut qaaqquneqarpoq, qaaqqusissummulli qisuariaateqarani.
Aammattaaq Martha Abelsen qaaqquneqarpoq, taannali Tasiilamut angalassalluni nalunaarpoq.