Innuttaasunut

Sap. ak. 18-mi sammisassarpassuit

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kalaallit Nunaanni imigassartaqanngitsumik sapaatip akunnera, Kommuneqarfik Sermersuumi allatut nutaamik isikkoqalerpoq imaqalerlunilu.

Siornatigut sapaatip akunnera 18-mi imigassartortarnerup ulorianassusaanik saqqummiussisarnikuuvugt. Ukioq manna sammisassanik pissanganartunik peqqinnartunillu periarfissiissuugut aamma takutinniarlugu imigassartaqanngikkaluamik qanoq nuannisaaqatigiittoqarsinnaanera, pitsaaliuinermik siunnersorti Kristian Rosing oqarpoq.

Ukioq manna sapaatip akunnera 18, qulequtaqartinneqarpoq ”Meeqqap inuunera aallartilluartoq” aammalu ”Anaana ataata qujanaq”, ilaqutariittut qanillinerulernissaq periarfissikkumallugu. Misilittakkat takutippaat ilaquttat asannittut pitsaasullu atonerluilernissamut illersuutitsialaasut. Taamaattumik ilaqutariittut ataqatigiinnissamut sukasaaqataarusuppugut. Ilaqutariit amerlasuut ataatsimut sammisaqaqatigiittalernissaq eqqarsaatiginikuunngilaat. Taamaasiornissamut isumassarsiortitseqataarusuppugut.

Misilinneqarsinnaasut ilagaat, immami ikkattumi aqqarneq, sassarsinnaanissamut ilinniarluni workshop-i, meeraaqqanut naluttitsineq aammalu sexologimit saqqummiussineq, sammisassat ilamerngi eqqaassagaani.

Immeriumatuugaanni, naluttarfik Malik assigiinngitsunik 7-nik sammisassaqartitsissaaq, soorlu vandpolo, annaassiniarnermik ilinniarneq, nallorissarneq allarpassuillu.

Misilinneqarsinnaasut allat aamma ilagaat, Inuit Dene Games, sisorarneq, immaqaluunniit ilaquttat kammalaatillu ilagalugit arpanneq Katuap silataani maj-ip 2.-ni aallartittussaq.

Pisussat uani takukkit: Sapaatip Akunnera 18