Ittoqqortoormiini atuartut piniarnermi ileqqutoqqat malillugit atuartinneqartarput.
”Atuartitsinermi piniarnermi ileqqutoqqat sammingaatsiartarpagut. Ilaatigut nannup amia suliarisimavarput. Imminut illersorniarluni nanoq toqunneqartariaqarsimavoq atuarfimmullu atukkiunneqarallarsimalluni, Ejnar Mikkelsenip Aluarpiani pisortaq Torbjørn Ydegaard oqarpoq.
”Atuartut nannup amia suliarisimavaat qapiarlugu. Ameq Namminersorlutik Oqartussaniit atukkiunneqarsimavoq, tigummissavarpullu iginneqarnissaata tungaanut. Atuartitsinermut atatillugu ilinniutitut atorparput. Maannakkut nannup amia iikkami nivingavoq, inimilu tassani qamutit inissinnikuuvagut, qamutit atortui anullu aamma takuneqarsinnaapput. Inimi tassani atuartut eqqissillutik atuarujoorsinnaapput.
Poorski sioqqullugu ataatsimiititaliat marluk, tassaasut Suliffeqarnermut Isumaginninnermullu ataatsimiititaq kiisalu Meeqqanut Ilaqutariinnullu ataatsimiititaq Ittoqqortoormiiniipput tikeraarnerminnilu ilaatigut Ejnar Mikkelsenip Aluarpia 55-nik atuartuutilik pulaarpaat.
Atuarfiup pisortaa Torbjørn Ydegaard ataatsimiititani ilaasortat oqaloqatigivai atuarfimmilu takornariartillugit.
”Piniarnermi ileqqutoqqat atuartitsinitsinni atorluartarpagut. Timelærimik sulisoqarpugut, taassumap uia 300-t sinnerlugit nannunnikuuvoq taassumalu misilittakkani atuartuutitsinnut ingerlateqqittarpai. Pinngortitaq aamma atorluartaqaarput. Augutsimi septembarimilu nunatta naasui sammisarpagut. Pinngortitami angalaaraagatta aallaammik nassartuaannarpugut. Nannummi illoqarfitsinnut takkuttalernikuupput taamaattumik pinngortitamiinniaraangatta mianersortariaqartarpugut, Torbjørn Ydegaard oqarpoq.
Aamma taassumap eqqaavaa takornarissat illoqarfimmut tikikkaangata atuarfimmut pulaartinneqartalersimasut.
”Takornarissat Ittoqqortoormiinut tikillattaasarput, maangalu pigaangata atuarfitsinnut tikilluaqqusarpagut. Atuartut assigiinngitsunik sanaluttarput takornarissanut tuniniartakkaminnik.
Ejnar Mikkelsenip Aluarpia 8. klassit tikillugit atuartuuteqarpoq. 9. aamma 10. klassemi atuarniaraanni Nuummut atuariartornissaq neqeroorutigineqartarpoq.