Innuttaasunut

Kalattuunut qitigitsi franskillu kinguleraannik kinguleralioritsi

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Multi-Kulti-rtoqarnerani Illorput sammisassanik assigiinngitsunik sammisassaqartitsissaaq, Sushiliornermik, franskit kinguleraannik kinguleraliornermut ilinniarsinnaavutit imaluunniit kammalaatitit kalattuut qiteqatigalugit

Illorput-mi kulturilerisutut sulisoq Lena oqaluttuarpoq, “Eqqarsarpugut unnummi tassani Kalattuut line dance-ernerlu  ingerlanneqassasut neriuutigaarpullu kalaallit nunani allamiullu peqataarusussasut”.

“Neriuppunga aaqqissuussap inuppassuit kajungilersissagai inuillu allamiut inuiaqatigiinnut ilaanertik malugissagaat” Lena oqarpoq.

Jeppe qaqqarmiu

Isiginnaagassiaq Jappa Illorput-mi takutinneqassaaq. Nunatta isiginnaartitsivia neqerooruteqarpoq isiginnaagassaq Jappa takutissallugu. Isiginnaartitsineq Holbergip isiginnaagassiaanik Jeppe qaqqarmiumik Nunatta isiginnaartitsivianit kalaallisuunngorlugu takutinneqassaaq. Lena oqaluttuarpoq “Eqqarsaataavoq ilaqutariinnut unnuk ingerlanneqassasoq. Qallunaat oqaluttuaatigaat kalaallisuunngortitaq Nunattalu isiginnaartitsisarfianit Multi-Kulti-mut tulluutsipparput”.

Nerisassat nunanit allanit

Illorput neriniartarfik Isikkivimmi igasut suleqatigaat. Tamaani japanimiut sushiliaat, thailandimiut panangiliaat filipinerillu pølseliaat saqqummiunneqassapput. Ooqattaagassaqassaaq nerisassianullu ilitsersuuteqassalluni. Ilaatigut sushiliornermut periarfissaqassaaq.

“Neriuppugut takkuttoqarluassasoq, nerisassiat nutaat ilinniarlugit ataatsimullu suliaralugit nuanneqigami. Nerisassiat aamma kulturini allaneersuupput pigiliuteriikkavut, Multi-Kulti-mullu tulluussorivagut”, Lena oqaluttuarpoq.

Illorput Multi-Kulti-mut akuummat nuannaarutigaa. “Periarfissaqaqaarmi inuppassuit pissanganartut ilinniarnissaannut, nunanit allaninngaaneersunik nerisassiornermut ilitsersuutinik misiliilluni”, oqarpoq.

Ullormi kingullermi franskit kinguleraannik kinguleraliornissamut periarfissaqassaartaaq. Simon Harrisson Ulluinnarni Neriniartarfimmi Sarfalimmi igasuusoq, aggerluni franskit kinguleraliortaasiannik mamartunik ilinniartitsissaaq.

Puisip amianik nunarsuaq

Illorput-mi Multi-Kulti-rtoqarnerani puisip amianik sanaamik nunap asseqassaaq.

“Isumassarsiaq tassaavoq, nunanit allaninngaanneeraanni, taava suminngaaneernerluni nalunaaqutserneqarsinnaavoq, takuneqarsinnaalissaaq inuiaassutsit qanoq amerlatigisut Nuummiinnersut”, Lena nassuiaavoq.

Multi-Kulti naammassippat nunap assiga puisip amianik sanaaq Illorput-mi nivinngarneqassaaq.

Multi-Kulti pillugu annerusumik uani atuarsinnaavutit