Innuttaasunut

Eqqaavilerinermut tunngatillugu mumisitsisoqalerpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Ullumikkut illoqarfippassuit nunaqarfippassuillu kusanaatsortaqartarput. Tassaallutik eqqaavissuit ukiorpassuarni annertusiartortartut, tamannali allanngortinniarneqalerpoq. Nunatsinni kommunit tallimaasut isumaqatigiissuteqarsimapput kommunini ataatsimoortumik eqqagassaleriffeqalissasoq ESANI A/S (Eqqaavilerineq Sulisoqarneq Atoqqiineq Nukissiuuteqaarnermilu Ingerlatseqatigiiffik), tassuunalu siunissami eqqagassat avatangiisit eqqarsaatigalugit eqqortumik passunneqartalernissaat qulakkeerneqassasoq.

Eqqaavileriffimmi pisortaagallartumik atorfinitsitsisoqaqqammerpoq. Tassaavoq Kommuneqarfik Sermersuumi ingerlatsinermut avatangiisinullu ingerlatsisoq, Frank Rasmussen, taassumalu atorfik qangalili pilerigisarsimasamisut oqaatigaa.

”Nalunngilara eqqumiitsoq, eqqagassalerineq pilerigisarsimagakku, kisianni suliassaq pissanganarluinnartuuvoq, nuna tamakkerlugu iluaqusiisorujussuusinnaasoq. Aningaasaqarneq avatangiiserlu eqqarsaatigalugit, Frank Rasmussen oqarpoq.

Eqqaavileriffiup ilaatigut suliarissavai ikuallaasarfiit marluk ingerlatinneqarnissaat. Ataaseq Sisimiuni ataaserlu Nuummi. Taakkua nuna tamakkerlugu illoqarfinniit nunaqarfinniillu eqqagassanik tigooraaffiussapput.

Ullumikkut Nunatsinni eqqaavileriffiit ingerlanneqartut mikisut pisoqalisimasullu ajornartorsiutaapput, ikuallaaniaraannilu teknikkikkut atortutigut qulakkeerinniffiusinnaanngitsut, silaannarmik mingutsitsinnginnissamut piumasaqaatinut naammassinnittussamik inuiaqatigiinni nutaaliaasuni naleqassutsimut akuerineqarsinnaasumik naammassinniffiusinnaanngitsut. Tamannarpiaq pillugu kommunit tamarmik immikkut ikuallaasarfeqarnermikkut tamarmik immikkut naammattunik ikuallatassaateqannginnerisa kingunerisaanik eqqakkat ikuallaasarfinnut marlunnut katersornissaat pisariaqalersimavoq.

Ikuallaaserfiit qanorluunniit Nuummut Sisimiunullu inissinneqaraluarpata pingaartuuvoq erseqqissaatigissallugu, ESANI A/S tassaammat kommuninit ataatsimoorullugu ingerlanneqartoq. Imaappoq eqqakkat ikuallaasarfinnut assartorneqarnerini akit, ikuallaasarfiit ingerlanneqarnerinut aningaasartuutit, aningaasaliissuteqarnermi aningaasartuutit aammalu kissamik tunisinermit isertitarineqarsinnaasut ataatsimoortumik naatsorsuuteqarfigineqassapput, taamaasillunilu kommunini eqqagassanik igitsisarnermi assigiimmik akeqartitsissutaasinnaanissaanut tunngaviliisuussalluni.  Imaappoq assersuutigalugu Avannaata Kommuniata eqqakkat ataatsit iginniarunigit Qeqqata Kommuniani akiligassaanit amerlanerunavianngillat.

Eqqagassalerinermi aaqqissuussineq nutaaq kommunit ileqqaarniuteqarnerattut isigineqassanngilaq. Nunatsinni illoqarfinni nunaqarfinnilu eqqakkat eqiterneqartassapput poortorneqarlutillu ikuallaasarfimmut assartorneqarsinnaaniassammata, taamaattumik Frank Rasmussenip ilimagivaa, suliffinnik annaasaqartoqassanngitsoq.

”Illoqarfinni mikinersusuni nunaqarfinnilu immikkoortiterinermut poortuinermullu sulisunik atorfissaqartitsiuassaagut. Ileqqaarutissaq tassaavoq nuna tamakkerlugu eqqakkanik ikuallaasarnikkut kissamik atorluaalersinnaagatta, taamaasillunilu naleqassutsinik annertusititsissalluni” Frank Rasmussen oqarpoq.

Pilersaarutit malillugit naatsorsuutigineqarpoq, Sisimiuni ikuallaasarfik nutaaq 2022-mi naammassineqassasoq taavalu Nuummi 2023-imi.