Norgip qeqertaata Svalbardip Issittumi ukioq naallugu takornariaqarsinnaaneq iluatsippaa. Aningaasaqarnermut Ataatsimiititaq qeqertamut paasisassarsiorluni angalaqqammerpoq.
Aningaasaqarnermut Ataatsimiititap ungasinngitsukkut Svalbardimi Longyerbyen tikeraarmassuk suli seqineq nuerpiarneq ajorpoq. Ullup qiterarnerani seqerngup qaqqarsuit portoqisut illoqarfiup avataaniit qinngornerisa alakkalaarpaat kisianni tassa ullup sinnera taartuinnaavoq.
Longyearbyen, illoqarfik Qaanaatut avannarpasitsigisoq qaammatit sisamat kaperlattarpoq kisianni imaanngilaq akunnittarfiit inuttaqanngitsut, imaluunniit timmisartortarnerit killeqartut. Tassami Svalbardimi kaperlattarnera arsarneqarfimmik aqqa taarsersimavaat, aamma arsarneqartarnera takornarianut assorsuaq alutornarnera patsisigalugu. Ajoqutaasinnaasoq qanoq ilillugu pitsanngorsaatinngortinneqarsinnaanersoq takussutissaavoq.
Aningaasaqarnermut Ataatsimiititap Svalbard tikeraarpaa pissutigalugu mittarfeqarneq iluatsittumik aningaasarsiorfissatut ingerlanneqarmat, takornariaqarneq sikkertutullusooq tamaani najugalinnut siuariartortitsisuummat. Svalbard, 2200-nik innuttaqartoq, ukiut tamaasa 89.000-inik takornariaqartalersimasoq Longyearbyen-imut 600-inik ulloq naallugu suliffissanik pilersitsivoq.
”Assorsuaq isumassarsinarpoq takullugu Svalbardimi takornariaqarneq qanoq ineriartortinneqarsimasoq. Ukiut sisamat qaangiuppata Nuuk Svalbarditut ittumik mittarfeqalissaaq. Imaappoq, maanna ineriartorneq pilersaarusiorlugu ulapputtugut takornariaqarnerullu ineriartortinnissaanut pitsaasunik najoqqutassaliorneq suliaralugu”, Kommuneqarfik Sermersuumi borgmester Asii Chemnitz Narup oqarpoq.
Inuulluarniut akigalugu
Svalbardimut tikeraarneq, takornarialerisunut arlalinnut pulaarnermik aamma kinguneqarpoq soorlu assersuutigalugu Hurtigruten Norgemeersoq, taakku Nuummi akunnittarfiliornissamik aamma takornariartaatinut umiarsuarnut talittarfiliornissamik suliaqarniarlutik pilersaartut pulaarneqarput.
Hurtigrutenimit ukiumut Svalbardiinnarmi 300 millionit koruunit tikillugit kaaviiartinneqartarput, Kommuneqarfik Sermersuumut siunnersuutaat ersarippoq: Inuulluarniut akigalugu.
”Uagut maani ullormut takornariat 15.000 koruuninik atuisinnaasut aalluppavut. Tamakkuninnga ulikkaarpoq” Hurtigruten-imi akunnittarfinnut tunngasunut pisortaq Thomas Westergaard Aningaasaqarnermut Ataatsimiititamut oqarpoq.
Tassungalu atatillugu erseqqissaatigaa eqqissisimatitanut atatillugu takornariat namminneq angalanermikkut maleruagassat tamanut atuutsinnerat, kiisalu pinngortitaq uumasoqarneralu illersorniarlugit sakkortuumik maleruagassaqarnera.
Kommuneqarfik Sermersuup ungasinngitsukkut takornariaqarnermut periusissiaq akuersissutigeqqammerpaa maannalu Svalbardimit misilittakkat periusissiap ingerlanneqarnissaanut ilanngunneqassapput.
”Svalbardimi iluanaarutaasumik takornariaqarneq iluatsillugu pilersinneqarpoq pinngortitamik artukkiinngitsumik imaluunniit tamaani najugallit akornusernagit. Kommunitsinni taamatut ineriartortoqarnissaa kissaatigaara”, Asii Chemnitz Narup oqarpoq.