Nuummi kulturikkut assigiinngisitaarneq ulluni 4. – 7. april Kommuneqarfik Sermersuup nalliuuttorsiutigissuaa. Ukioq manna Multi Kulti festivali pingajussaat ingerlanneqassooq Nuummilu innuttaasunut 25-it sinnerlugit sammisassaqarumaarluni. Kommuuni suliffeqarfiillu kulturimik sammisaqarfiusut kulturikkut assigiinngisitaarnerup qanoq nalliussitinneqarnissaanut makkunannga neqerooruteqarpoq:
- Attaviit: Ullumikkut oqaluttuarisaanermilu kulturit assigiinngitsut naapittarsimaneri
- Misigisassarsiorit: Kikkut tamarmik nuummioqatiminnik nunamit allameersumik naapitsisinnaapput
- Nerisassat: Nerisassiornermi workshopit, inuiaat allat nerisassiaat kalaallillu nerisassioriaasiat
- Nuannisarneq kulturilu: Kulturip, eqqumiitsuliornerup allatallu pilersitseriaatsit allaanerusumik paasisassarsiorfigalugit
Peqataatikkusuppatsigit
Multi Kultip banneriani nuummiut ilaatinnissaannut periarfissiisimavugut. Nuummiummi assigiinngisitaarnerat bannerimi takutikkusupparput. Taamaammat ullup ingerlanerani, ilissi assissi bannerimi ilaatinnissaannut nalunaarnissamut Facebookimi periarfississavatsigit.