Services

Apummik Ilusilersuinissaq amerlasuunit tapersersorneqarpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Aningaasanik tapersiisorpassuaqarneratigut Nuummi apummik ilusilersuinissaq piviusunngussaaq

Marsip 21-ianiit 24-ianut holdit 30-it imminnut unammissapput, apummik ilusilersuinermi saqqummiussinermi kusanarneqqusaannermi. Taamatut ingerlasoqarnerani kikkut tamarmik aggersinnaallutillu malinnaajartorsinnaapput, apummillu ilusilersukkat aallaqqaataanit naanissaata tungaanut alutorsaatigiartorlugit.

“Kommuneqarfik Sermersuup sivisuumik apummik ilusilersuisarnerup pilerseqqinnissaa anguniarsimavaa, kiisami piffissanngorpoq!” Laila Lund Altinbas, Nuuk Apummik ilusilersuineq 2019-mut suliniutimut aaqqissuisoq oqarpoq. Kommuni ilusilersuinissamut aaqqissuinermi pilersitsisuuvoq, Nuummi Eqqumiitsulianik Saqqummersitsivimmiittumi allaffimmik atukkiussamit Laila suliniummut peqataasunut ataqatigiissaarisuuvoq.

Oqaluttuarporlu ukioq manna festivalertoqarnissaanut Nuummi Najukkami Ataatsimiititaliaq pilersaarusioqataasuusoq, siulliullutillu pilersaarummut aningaasaliisuullutik. Kingornagut aningaasaliisorpassuillu allat ilusilersuineq piviusunngortinniarlugu ilanngussorput. Aningaassaliisut sakkussanik atortussanillu akileeqataasuupput, kajumissutsimik peqataasunut nioqqutissanik nerisassanillu.

“Assigiinngitsorpassuarnit ikiorneqarpugut, illoqarfimmiillu tapersersorneqarnerput tamakkiisumik malugisinnaavarput. Tapiissutaannarniunngitsorli. Ilaatigut Nuummi umiarsualivik ilusilersuinermut inissamik atugassiivoq, materialegårdilu kommunimeersut umiarsualivimmut ilusilersuiffissamut apummik issoqqaarissumik sanajartorlutik aggerumaarput. Ikiuuttorpassuaqarnera nuannaarutigeqaarput, kajumissutsimillu iliuuseqaqataarusuttut tapertaaqataasimanngitsuuppata aaqqissugaq iluatsissimanavianngikkaluarpoq,” Laila oqarpoq.

Ilusilersuinermut nuannersunngortitseqataarusukkuit kajumissutsimik peqataanissamut uunga qinnuteqarsinnaavutit snow@sermersooq.gl

Ilusilersuineq najukkami ilaqutariinnit, nunani tamalaanit titartaasartunit kiisalu akissarsiutigalugu qiperuisartuniit nunarsuarmi tamaneersunit peqataaffigineqareernikuuvoq, kikkut tamarmik tikilluaqqusaallutillu peqataanissamut qinnuteqarsinnaallutik. Apummik ilusilersuinermut nalunaarnissamut aaqqissuussinermullu tunngasunik nittartagaani atuakkit snow.gl