– Inuusuttunut kulturikkut illutut atussaaq uagut inuusuttut peqatigalugit ineriartortitassarput aamma ilusilersugassarput, taama oqarpoq illup aqutsisua, Mia Skifte Lynge
Ungasinngitsumi Tasiilami Inuusuttunut kulturikkut illuata ammaanersiorneranut atatillugu innuttaasunut kaffillertoqarpoq. Inuit 50-it missaat aqqusaarput, kaffillertoqarpoq, the aamma kaagit.
Inuusuttunut kulturikkut illu utaqqiisaarutaagallarpoq aasarulu Tasiilami nutaarluinnarmik Inuusuttunut kulturikkut illu sanaartorneqalissaaq.
– Maanna alloriarneq siulleq alloreerparput, nuannaarutigaarpullu kiisami illuuteqalersimagatta taamaalilluta suliniutit ilaat piareersarneqarsmasut piviusunngortissinnaalerpagut. Illup pinngorartitsinissamut, aallarnisaanermut, aaqqissuussinernut imaluunniit inuusuttoqatit allat ilagalugit sukisaarsarnissamut inissaqalersitsivoq. Uatsinnut pingaaruteqarpoq inuusuttut namminneq isummatik atorlugit iliuuseqarsinnaalermata. Siunissaq eqqarsaatigalugu inuusuttut namminneq Inuusuttunut kulturikkut illu pilersissavaat ingerlallugulu, oqarpoq Mia Skifte Lynge.
Maanna akunnerit ikittunnguit ammasarluni aallartittoqarsimavoq, pilersaarutaavorlu inuusuttut namminneq piffissap sinnerani iliuuseqartitsisassasut.
– Inuusuttut annertuumik oqartussaaqataapput. Uagut ulluinnarni sulisuusugut nal. 8-16-ip akornanni sulisussatut eqqsarsaataavugut, aamma soorunami aaqqissuussat ilaannik piareersaasassaagut, kisianni inuit naatsorsuutigissavaat nal. 16-ip kingorna sulineq ajortussaagatta. Taama ingerlassaagut innuttaasut illumik piginneqataasutut misigilerniassammata akisussaaffimmillu tigusisinnaaniassammata, kiisalu kikkulluunniit aaqqissuusserusuttut piareersaanissaannik ammaasserusukkatta, oqarpoq Mia Skifte Lynge.
Inuusuttut kulturikkut illuat inuusuttunut naatsersuussaavoq, siunissamilu aamma illoqarfiup utoqqartai, inunnut ataasiakkaat kiisalu meeqqeriviit eqqarsaatigalugit iliuuseqartarnissanik ataatsimuualaartarnernillu pilersaaruteqartoqarpoq.