Kommuneqarfik Sermersuumi maannakkorpiaq angajoqqaarsiaasinnaasut amigaataangaarmata oqartussaaffeqarfimmi sulisut arlallit namminneerlutik meeqqat ikiortariaqartut najugassaqanngitsullu paaqqutarinissaat isumagisariaqarpaat.
”Soorunami qujamasuutigisorujussuuara suleqatitta meeqqat ikiortariaqartut immikkut ikiorniarlugit iliuuseqarnerat, tamannali attatiinnarneqarsinnaanngilaq”, Meeqqanut Ilaqutariinnullu suliassaqarfimmi fagchefi Ellen Magnussen oqarpoq.
Pinartumik meeqqat arfinillit ilaqutariinni inissiffigisinnaasaminnik amigaateqarput, amerlanerujussuilli pisariaqartitsigaluarput, ullumikkut taakku ulloq unnuarlu paaqqinniffinni inissinneqarsimasuupput, pitsaanerussagaluaqaarli takku ilaqutariinni inissaqartuuppata. Pinartumik meeqqat taakku pisariaqartitsisut inoorlaajupput imaluunniit sisamat inorlugit ukioqartuullutik, taakku saniatigut meeraq ataaseq ilungersunartumik nappaateqartoq angerlarsimaffimmik toqqissisimanartumik amigaateqarpoq.
”Siusinnerusukkut piffissat ilaanni ilaqutariit paaqqutaqarsinnaasut amigaataasareerput, maannali taama amerlatigisut aatsaat amigaatigilerpavut. Ilungersunaqaaq, meeqqat taama pisariaqartitsitigisut pitsaasumik neqerooruteqarfigisinnaanagit”, oqarpoq Ellen Magnussen.
Paaqqutarinnissinnaasut taama ilungersunartigisumik amigaataanerat paasinartumik akissutissaqartinngilara imaassinnaavorli ilaqutariit ilaat, arlalinnik paarsaqartut, paarisatik allinerummata saniatigut inoorlaamik paaqqutaqarnissartik tunuarsimaarfigigaat.
Inunnit paarsaqarusuttunit soqutiginnittunillu Paaqqutaqarnermut immikkoortortaq tusagaqarusuttorujussuuvoq. Paasissutissat annertunerusut uani atuarsinnaavatit