Demokraatit sinnerlugit Kommunalbestyrelsimi ilaasortap Nivi Olsenip Kommuneqarfik Sermersuumi kommunalbestyrelsimi sulinngiffeqarallarnini marlunngormat qaammatinik sisamanik sivitsorpaa. Marsip aallaqqaataani uternissani pilersaarutigeqqaarsimagaluarpaa. Maannali juulip aallaqqaataanut kinguartippoq.
Taamatut sivitsuineratigut Suleqatigiisitsisunit Michael Rosingi Nivi Olssenimut sinniisuusoq Kommunalbestyrelsimiiginnarallarnissaanik kinguneqarpoq.
Nivi Olsenip borgmesterip tulliatut siullertut inissisimaneranut Randi Evaldsenip ivertinneqarsimanera atuutiinnarallassaaq, Henrik Rachlevilu Meeqqanut Atuarfeqarnermullu Ataatsimiititami siulittaasuuinnarallassalluni.