Naluttarfik Malimmik atorluaasut ilagaat 73-nik ukiulik Rebekka Olsvig Nuummeersoq.
”Naluttarfiliartarnera nuannareqaara. Sapaatip-akunneranut arlaleriarlunga nalukkiartarpunga. Ilaanni kisima ilaanneeriarlungalu ernutara ilagalugu. Timigissarneq nuannersuuvoq, nukissaqarlualersitsisarlunilu.
Nuummi pisimasunut nuannernerpaanut ilaavoq 2003-mi naluttarfittaarneq. Taannaagami innuttaasunut nuannaarutissiilluartoq, pingaartumik ilaqutariinnut meerartalinnut”.
Rebekka Olsvig ukiorpassuarni namminersorluni inuussutissarsiummik ingerlataqarsimavoq. Ukiuni arlalinni kukkunersiuisitsisarfiutini ingerlatarisimavaa soraarninngornissami tungaanut.
”Inuunera soraarninngornera pissutigiinnarlugu tamaanga uniinnanngilaq. Soraarninngornerma kinguninnguagut nallukattanik pinnguaatigineqartartut ilaat bridge aliikkutarisalerpara. Sulisarallarama kisitsisilerisorujussuusarpunga, aammalu qarasara sulisiinnarniaraangakku sapaatip akunneranut ataasiarlunga nallukattanik pinnguaat bridge sammisarpara. Sapaatip akunnerata ataatsip ingerlanerani sussanerlugu tamatigut pilersaarusiortarpara. Sammisaqaannavinnissara isumagisarpara, ilaatigut Quassussuup eqqaani pisuttuarnreq, badmintonerneq, angalaarneq imaluunniit sisorarneq. Arfininngornerit tamaasa Nuussuup Timersortarfiani Red Barnet-imut kajumissutsinnik suleqataasarpunga, tassanilu ilaqutariit ikiortariallit assigiinngitsunik sammisaqartinneqaraangata ikiuuttarlunga ”.
Rebekka siorna Kalaallit Nunaanni Red Barnetip immikkoortortaqarfianit meeqqanut ilaqutariinnullu ikiortarialinnut sullissilluarsimanera pillugu nersornaaserneqarpoq.
”Allanngueqataasinnaaneq nuannersuuvoq. Aamma isumaqarpunga siunissamut anguniagalersortarneq pingaaruteqartoq. Ukiut marlussuit matuma siornali imminut neriorsorpunga tuluttut ilinniarniarlunga. Taamanimiilli tuluit oqaasii ilikkarumallugit oqaatsinik ilinniarniarlunga angalasalerpunga. Aamma erinarsornissara nuannariuaannartarpara, taamaammat piffissap ilaani erinarsoqatigiittartut Nordisk kor ilaasortanngorfigaara. Aamma pisummik angalaartarnissara anguniarlugu aallartikkama nunanut allanut pissanganartorpassuarnut angalaartalerpunga, inuppassuillu nutaat ilisarisimasarilerlugit. Aasamut pisoqatigiittartut tikeraartussaapput, taakku uanga illuma qanittuani tupersimaassapput taavalu ataatsimoorluta angalaaqatigiittarnissarput eqqarsaatigivarput. Anguniarusutama ilaasa ilagivaat noqartilimmik nipilersortalernissara. Anguniagarerusutara taanna suli angunngilara, taamaammat sungiusarlugu aallartitariaqarpunga”, Rebekka Olsvig illarluni oqarpoq.
Rebekka Olsvig ukiut 16-it matuma siornagut uillaramili naluttalerpoq.
”Taamanikkut imminut neriorsorpunga imminut mattutissanngitsunga uniinnarlungalu. Aammami meeraqarpunga ernutaqarlunga isumassugassannik. Taamaattumik ukioq tamaat nalukkiartarnissamut isissutissamik pisinissara aalajangiunnikuuara, taamaasillungalu taamanimiilli naluttarfik atorluartalerlugu. Naluttarfik ammaqqaarmalli sapaatip akunneranut ataasiarlunga imermi eqaarsaaqatigiittartunut ilannguppunga, tamannalu timinnut iluarusunnermik misinnarpoq.
Ernutara naluttartut klubbiannut ilaasartoq siullermik nalukkiaqatigisalernikuuara. Ilaannikkut akunnerpassuit naluttarfimmittarnikuuvugut, taava naloqatigiilluta nuannisarujoortarpugut taqussatsinnillu nereqatigittarluta. Soraarninngorsimasut naluttarfiliartarnissaannik kaammattorusoqaakka. Inuunerinnarami timillu aalatittuarnissaanut iluaqutaalluni”, Rebekka Olsvig unnersiorpoq.
Soraarninngorsimasut amerlasuut maaniittarput
Naluttarfik Malimmi ittuusoq, Bruno Heilmann oqarpoq, soraarninngorsimasorpassuit timigissariartorlutik takkuttartut.
”Soraarninngorsimasut ataasinngornermiit tallimanngornermut akeqanngitsumik nalukkiartarnissaat neqeroorutigaarput, tamannalu amerlasuut atorluartarpaat. 2018-imi 2.441-t maaniittarsimasut nalunaarsorsimasuutigaavut.
Naluttarneq iluaqutissarpassuaqarpoq. Siullermik timi tamaat atortarpoq aammalu nukiit ujallullu aalatittarlugit. Taavalu aappaattut uffartarfiit puaasartartut assut iluaqutaasarput. Tamanna avatimikkut gigtertunut iluaqutaalluartarpoq aallu ingerlaneranut aallartilluaatigisarlugu. Aamma sauna helsekabinelu pigaavut utoqqarnit akeqanngitsumik atorluarneqarsinnaasut”, Bruno Heilmann oqarpoq.
Naluttarfik Malik siorna 130.000-init isersimasoqarsimavoq, imaappoq Nuummi innuttaasut tamakkerlugit arfineq-marloriaataasa amerlaqataannit.