Tasiilami innuttaasut ataasinngorpat 21. januar 2019, katsorsaavittaap Artsarnerup ammaanersiorneqarneranut aggersarneqarput. Artsarner atsiunneqarsimavoq innuttaasunit siunnersuutit 16-it akornannit.
Unnukkut ussernartoq tikiuttarpoq, imerusunneq inukkarusunnerlu, kisianni unnukkut silagitsillugu arsarnerit takuneqarsinnaapput, ilaat qaamanerupput ilaallu taarnerullutik, ilaallu kipisaqattaarsinnaasarlutik, arsarnerit isiginnaarlugit isummerfigineqarsinnaasut, tassa inuuneq taamatut ilungersortigisinnaavoq qaammartarlunilu taartissinnaasarpoq
Artsarner imigassamik, aanngajaarniutinik aningaasanoornermillu atornerliunermut katsorsaavittut atorneqassaaq, taassumalu saniatigut meeqqat kinguaassiutitigut atornerlugaasimasut kinguaassiuutitigullu atornerlugaasimasunut kingunerlutsitsisunut katsorsartinnissamut periarfissaqartitsissalluni. Pisariaqartillugu innuttaasullu soqutiginnissappata Artsarner arnanut højskoletut aamma atorneqarsinnaassaaq.
“Katsorsaavittaap atulerneratigut Tasiilami innuttaasut, ilaquttatik suliffitillu qimannagit katsorsarneqarsinnaanissaminnik periarfississavai. Tamanna innuttaasunut alloriarneruvoq annertooq”, Suliffeqarnermut Isumaginninnermullu Ataatsimiititami siulittaasoq Charlotte Ludvigsen oqarpoq.
Artsarner illumi B-1094-imiippoq meeqqeriviusimasup Amaagajaap illutaani. Tasiilaq nutaamik meeqqerivittaarmat illu allamut atorneqarsinnaalersimavoq.