Innuttaasunut

Eqqagassatit ima isumagilluassavatit

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Sap. ak. tamaasa angerlarsimaffitsinnut eqqagassanik aallertoqaraangat eqqagassanik katersineq kingornalu suliarineqarneri ulluinnarni eqqarsaatigiuippavut. Aatsaalli eqqagassat aaneqanngitsoorsimagaangata, eqqakkat ilinissaarunneri malugilersarparput taava qanoq iliortoqassava?

Qaammat una Sermersuumi Eqqagassaleriffik, kommunimi eqqagassalerisut eqqaavilerisullu eqqagassavit aaneqarnissaanut qanoq qulakkeerinnittarnersut ilinnullu qanoq pisariillisaannerusinnaanerit pillugu suliniuteqarput.

Eqqagassanik aallertarnerit aalaakkaanerusut.

Nuummi eqqagassanik piffissaalluartillugu katersinerit malunnartumik allannguuteqarput pitsanngorlutillu. Tamannalu eqqagassalerisumit chippimik nalunaarsuinermik atuutsitsilerup kinguneraa.   Nuummiinnaq sap. ak. tamaasa eqqaavilerisut eqqaaviit 3.000-inik ikinnerunngitsut imaartarpaat, taamaammat adresserpassuit nakkutigisassaapput. Kommunimi eqqakkanik katersinissamut aaqqissuussamut allatsissimasut tamarmik eqqaaviisa iluanni chippeqartitsinikkut eqqaavilerisunit adressit tamakkerneqarsimanersut eqqaaviillu tamarmik imaarneqarsimasut takuneqarsinnaapput. Eqqaaviit tamakkerlugit imaarneqarsimanerannik allassimasoqaraangat eqqaavilerisut ullormut suliaat aatsaat naammassisarput.

Isorartuneq, aput eqqaaviillu tammarsimasut.

Nuummi chippilersuinikkut aaqqissuussaqaraluartoq eqqaavilerisut adressinut tamanut aallertarnerat pisariitsuinnaanngilaq. Tamanna ilaatigut eqqaavilerisut biiliisa uninngavigisartagaaniit eqqaaviit ungasippallaarnerinik, aputaajaasoqarsimannginneranik imaluunniit eqqaaviit quinut imaarneqarsinnaanatik ilineqarsimanerannik, peqquteqarsinnaavoq.   Innuttaasutut pissusissamisoorpoq, eqqaavitta immitsinnut pisariitsuunissaannik kissaateqarluta inissittarneri. Pingaaruteqarporli kommunip eqqagassat pillugit malittarisassaqarnera eqqaamassallugu, tassani eqqaavivit sumi inissisimanissaanik illillu eqqagassavit aaneqarnissaanut qanoq pisussaaffeqarnersutit allassimavoq. Malittarisassat taakku tamanut eqqaavinnik imaarsisarnerit naleqquttuunissaat qulakkiissavaat ataatsikkullu eqqaavilerisut suliffimminni atugaasa naammaginarnissaat qulakkiissallugu.

Innuttaasutut pisussaaffeqarpugut.

Inuinnarnut eqqagassat pillugit malittarisassat malillugit innuttaasutut pisussaaffigaarput qulakkiissallugu:

  • Eqqaaviit tikikkuminarnissaat annerpaamillu eqqagassalerisut biiliisa uninngavigisartagaanit 50 meterinik ungasissusilimmi inissisimanissaat.
  • Eqqaaviup atorsinnaanissaa, matuata mappertariaanissaa, uumasut timmissallu eqqaavissiunnginnissaat qulakkiissallugu.
  • Eqqakkat isugutattut aamma paaq arsakullu imermik pitarneqarsinnaanngitsumik poorneqassapput, taamaasilluni eqqaavilerisoq eqqaavimmik imaarsinermini ippannginniassammat masatsilluniluunniit.
  • Eqqakkat nuugissut ipittulluunniit, aaneqarnerini angallanneriniluunniit eqqagassanik suliaqartup puussialluunniit ajoqusersinnaajunnaarlugit poortorneqarsimanissaat.
  • Eqqaavilerisoq quaalluni ajoqusinnginniassammat eqqaaviup tungaanut aqqut aputaajarneqassaaq imaluunniit siorarterneqarsimassalluni.

Innuttaasutut pisussaaffivut isumagisinnaagutsigit eqqaavilerisunut sulineq pisariillisassavarput isumannaannerulersillugu.

Eqqagassanik aallertitsisarneq aallertitsinermilluunniit unitsitsineq nalunaarutigineqassaaq.

Kommunip illoqarfiini nunaqarfiinilu innuttaasutut kommunimi najugaqartutut, Nuummiissappallu namminersortunut, eqqagassanut aallertartunut nalunaarnissatsinnik pisussaaffeqarpugut. Tassa imaappoq, adressimut allamut nuunnermi eqqaavilerisunut aamma anartarfinnut imaartakkanut, imikoorfimmut katersivinnullu isumaginnittussanut nalunaarutiginissaa nammineq isumagissavarput.   Nittartakkakkut Sullisivik.gl-ikkut Nemid atorlugu atornaguluunniit eqqagassanik aallertitsisarnermut  pisariinnerusumik nalunaartoqarsinnaavoq.

Tassani aamma eqqakkanik katersinermut aaqqissuussaq allanngortissinnaavat, soorlu sap. ak.  eqqagassanik aallertarnerit akulikillisinnissaanik imaluunniit akuttusinissaanik kissaateqaruit, eqqaavilluunniit ilasimappata ikilisimappataluunniit nalunaarutiginnissaannut periarfissaqarputit.

Taamatuttaaq najukkamit nuunnermi eqqagassanik anartarfinniluunniit imaartakkanik aallertarnerup unitsinneqarnissaa eqqaamassavat.  Tamanna sullisivik.gl.-ikkut nalunaarutigineqassaaq. Kommunimut eqqagassanik aallertarneq taamaatissimanngikkukku, aallertoqartarneranut akiliisinneqartuassaatit.

 

Eqqagassat aaneqarsimanngillat– sooruna qanorlu iliussaagut?

Adressinnut eqqagassanik aallertoqarsimannginnera assigiinngitsunik peqquteqarsinnaavoq.

  • Naammaginartumik nalunaaruteqarsimannginneq: Nuummi chippimik aaqqissuussamik nutaamik atuilernitsinni adressinut nutaanut nuunnermi nalunaarsimanngitsut arlallit nalaappavut. Adressit taakkua chippilerneqarsimanngillat taamaattumillu eqqagassanik katersinerup ingerlarnganut ilaajunnaarsimallutik. Tamaattoqarpat, Sullisivik.gl aqqutigalugu eqqagassanut aallertitsisarnermut piaarnerpaamik nalunaassaatit. Nalornissagaluaruit eqqaamallugu, eqqaavippit matuani nipputtartumik qaqortumik ullunik imaarfissatut allassimasumik peqarnersoq misissorsinnaagakku. Kommunimittaaq illoqarfinni nunaqarfinnilu allani, eqqagassatit aaneqartassappata aaneqartarnissaanik nalunaaruteqarnissat pingaaruteqarpoq.
  • Aputaajaasoqarsimanngippat: Eqqaavippit tungaanut aputaajaasoqarsimanngippat eqqaavilerisoq eqqaavimmik imaarsinissaminut isumannanngineranik naliliisinnaavoq. Nuummi taamatut pisoqartillugu Sermersuumi Eqqagassaleriffimmut nalunaartoqartarpoq, tassuuna illit eqqaavippit imaarneqannginneranut paasissutissiisoqartarluni. Eqqaaviit imaarneqarsimanngippat, illit nammineq eqqagassaleriffimmut qaninnerpaamut igikkiartussavatit puussiarsuarmillu nutaamik aallerlutit. Kommunip illoqarfiini nunaqarfiinilu najugaqarlutit eqqagassatit aaneqarsimanngippata najukkanni innuttaasunut sullissivimmut imikkoortortaqarfianulluunniit saaffiginnissaatit.
  • Eqqaaviit ulikkaarpallaarpat: Eqqaaviit ulikkaaqangaarami matusinnaanngippat, eqqaaviit ulikkaaqqavallaarpoq. Taamatut pisoqassappat eqqaavilerisut eqqaaviit tigunngitsoorsinnaavaat. Taamaattumik pingaaruteqarpoq eqqaavippit pissutsit arlallit peqqutaallutik ulikkaaqqavallaannginnissaa. Siullertut eqqaavilerisup puussiarsuaq ulikkaaqqavallaarpat qileruminaatsissavaa.  Eqqaavinni puussiaq saviminermut nermusimasoq 10-15 cm annertutigisoq eqqavilerisumut najummissutaasussaavoq. Aappaattut puussiarsuaq naqittarlugu ulikkaavissimagaanni sipilluni aseroqqajaanerusarpoq tassuunalu tiguneqalernerani eqqakkat nakkakaaginnariaassallutik. Tamanna peqqutaalluni eqqaaviit tiguneqarsimanngippat, puussannik nutaamik ilisisoqarsimassaaq. Nammineq eqqaavippit sapaatip akunnerata ingerlanerani isumatusaartumik immernissaa tassuunalu ulikkaarpallaannginnissaa pisussaaffigivat. Eqqagassavit aaneqarnissaanut utaqqissussinnaanngikkukkit eqqagassalerivimmukaassinnaavatit.
    • Illut mininneqarsimappat: Naggataatigut pingaaruteqarpoq eqqagassanik isumaginnittut inuinnaammata kukkusinnaassarlutillu. Tamanna peqqutaalluni eqqaavilerisup illut qaangiinnarsimappagu imaluunniit taarserneqareersorippagu eqqagassatit pilersaarutaasoq malillugu aaneqanngitsoorsinnaapput.  Tamanna pissappat, eqqaavilerisup eqqaaviit piaarnerpaamik imaariartussavai.

    Eqqaagatta piffissaq eqqorlugu isumagineqarsimannginnerat iluaagisinnaavarput peqqutaasinnaassulli amerlaqaat. Taamaattumik pingaaruteqarpoq Nuummi najugaqaruit Sermersuumi Eqqagassaleriffik saaffigissagit imaluunniit  kommunimi illoqarfinni nunaqarfinnilu allani najugaqaruit innuttaasunut sullissivinnut immikkoortortaqarfimmulluunniit saaffiginninnissat. Tassuuna adressinni eqqagassaativit aaneqarsimannginneranut peqqutaasinnaasut pillugit tusarniaasinnaagavit suleqatigiillutalu aaqqiissutissamik ujartuiniassagatta.

    Uani ikiortissarsiorsinnaavutit.

    Eqqagassat pillugit apeqqutissaqaruit imaluunniit eqqagassalerineq pillugu maalaarutissaqaruit Nuummiillutillu Sermersuumi Eqqagassaleriffik 36 74 11-imut imaluunniit affald@sermersooq.gl.  saaffigissavat. Kommunip illoqarfiini nunaqarfiinilu allani najugaqaruit najukkanni innuttaasunut sullissivimmut imaluunniit immikkoortortaqarfimmut saaffiginnissaatit.