Innuttaasunut

Eqqaaniut: Nuummi Kalaallit Nunaannilu malunnaateqarnerpaat ilaat annaavarput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Anders Brønsip siusippallaamik qimagussimaneranik tusagaq, tupannaqisumik aliatsannaqisumillu tiguara paasiuminaatseqalugulu. Eqqarsaatikka siullertut qanigisaasuniipput ikinngutaanilu – taakkununngami aliasunneq annertussaqaaq. Taakkunanngami uagutsinnillumi Anders Brøns tassanngaannartumik ilimagineqanngitsumik qimaguppoq.

Nunatta oqaluttuarisaanerani annerpaat ilaat toqukkut qimaguppoq. Kalaallit Nunaanni inuussutissarsiornikkut angusarissaarfiusimasut annersaannik pilersitsisoq akornatsinniikkunnaarpoq. Tamanna killeqanngiusartumik alianartuuvoq tamattalu aliasunnermik annertuumik eqqugaavugut.

Anders Brøns inuttut ilakkuminartutut ilisimasaqarluartutullu ilisarisimalersimavara ataqqisarilerlugulu. Inuk misilittakkaminik avitseqateqarnissamik piareersimajuartoq inuiaqatigiittullu sumut ingerlariarnissatsinnut isummersuillaqqissoq.

Kalaallit Nunaanni inuussutissarsionermik ingerlataqartunut, kommuunitsinnut Kalaallit Nunaannullu sinniisutut pitsaalluinnartutut eqqaamassavara. Piginnaasat inuusuttatsinni ujartortuakkagut Anders Brønsip tamaasa pigai.

Sullarissuuvoq anguniakkanilu sumorsuaq malinniartarsimavai. Aallarnisaasuusimavoq pikkorissoq, suliffeqarfiillu akuleruffigisarsimasani tamaasa pitsanngorsartuarsinnaasimavai ineriartortillugillu. Tamanna pillugu nunatsinni nunanilu allani annertuumik ataqqineqaatigisimavaa. Tamannali inuttut qaffassimaarutigilersimanngisaannarpaa. Sulinermini qanorluunniit angusarissaartigigaluarluniluunniit, inuusimavoq pitsaasoq maligassiuilluartorlu, ilakkuminartoq inoqatiminullu pitsaasoq.

Tamatumuuna tamatsinnut maligassiuilluartuusimavoq isummersuisorlu. Isummersuut eqqaaniagassarput eqqaamasassarpullu. Isummersuut kinguaariinnut aggersunut tamatta ingerlateqqittariaqagarput.

Tassami nunatta ernerisa annersaasa ilaat qimaguppoq, Kalaallit Nunaatali nutaaliaasup oqaluttuarisaanerani ilaajuassaaq.

Anders Brønsip eqqaaneqarnera ataqqinartuuli

– Asii Chemnitz Narup
Borgmester, Kommuneqarfik Sermersooq