Innuttaasunut

Nersussuaq Eqqaavissuarmioq Knora eqqagassallu annertuut amerlangaaramik taaffiunngitsut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Nersussuup orange-ap Holland-imeersup qanoq ililluni Nuummi eqqagassanut aarnuanngorsimanerata oqaluttuassartaa.

Immaqa Knora takoreerluguluunniit tusareerpat. Knora tassaavoq Kommuneqarfik Sermersuup eqqagassanut nersussua nutaaq. Ullut tamaasa nikorfajuarpoq Nuummi Sermersuup Eqqakkanik tigooraavimmut eqqakkanik assigiinngitsunik allaat 17.500 tons sinnerlugit tunniussiniartunik nakkutilliiutigaluni, Sermersuup Eqqakkanik tigooraaviani oktobarip qaammataata ingerlanerani tigooqqakkat ilaannit. 

Sermersuup Eqqakkanik tigooraaviata qaammammut killiffimmik paasissutissiisarneq atuartarpat. Maannali nersussuaq eqqaavissuarmioq Knora Nuummilu eqqagassanik annertuunik katersineq pineqarpoq.

Knora eqqakkanut annertuunut aarnuanngorsimanera

Tassaana Knora Tigooraavimmi qaammatit arfinillit matuma siorna igitatut tunniunneqartoq kisianni tassa nuannaarutigeqisatsinnik aammami Knora-mut qujanartumik tigummiinnarniarlugu toqqagarput, eqqakkallu nersussuanit atserlugu nutaamillusooq inuunermik tunigipput. Igiinnarnissaa saperatsigu, aammami taama iliornerput peqqissimissutiginngisaannarparput, Knora tassaammat nersussuaq nallerneqarsinnaanngitsoq.  

Takuuk imaakkami sunaaffa Knora-p eqqagassat nuannarilluinnarai imami nuannaritigai erngiinnaq Sermersuup Eqqagassanik tigooraaviani Nuummi ukiaanerani eqqagassat annertuut katersornissaat pillugu pilersaarusiuleratta  aarnussatut atorneqarusuppoq. Taamaattumik oktobarip qaammataani illoqarfiup iluani sumi tamani Knora takusarpat, kommunip nittartagaani Facebook-milu eqqagassat annertuut katersornissaannut ussassaarinermi atatillugu. Knora-mmi illit eqqagassaatitit annertuut perusuppai paatsoornikkut aqquserngup eqqaani inissisimannginniassammata. 

Knora nersussuaq eqqaavissuarmioq nuannersuutitsivoq

Sermersuumi Eqqakkanik tigooraavimmi Materielgårdemilu sulisut pikkorissorsuit peqatigalugit oktobarip qaammataata ingerlanerani illoqarfiit pingaarnersaannit eqqagassat annertuut 11 tons sinnerlugit katersorpaat. Najugaqarfiit 115 sinnerlugit neqeroorut atorsimagaat takuneqarsinnaavoq tassa najukkamik eqqaanut eqqagassanik aalleqqusillutik. Aamma takusinnaavarput inissianik peqatigiiffiit arlallit ukiaq iluatsillugu kælderit qaliarpaallu iluarsaassimagaat kingornalu eqqagassat katersorlugit aasussanngortittaraat. Tamanna assorsuaq nuannaarutigaarput. 

Pi(muuh)russineq iluaqutaavoq

Kommuneqarfik Sermersuup taamarsuaq eqqagassat annertuut katersornissaannut pingaartitsineranut tunngaviuvoq eqqagassat illit pigisatit aaneqarnissaannut ikiuisoq.  Knora imaappoq, soorlu tassa nersussuaq atoqqitaq, nalinginnaasumik nuannarilluinnarpaa nutaanngitsut nutaatut ilernissaat. Taamaattumik kaammattuutigaa, innuttaasugut eqqarsaatigilaassagipput eqqagassat aaneqartussat nutaatut atorneqarsinnaanersut inunnullu allanut nuannaarutaasinnaanersut. Aammami tuniniarnissaat eqqarsaatigisinnaavatit imaluunniit Facebook-kkut aaneqartussanngorlugit innersuussisinnaasutit.  

Eqqaamasariaqarporli eqqagassat atoqqissinnaasut kisiisa pigineqarmata. Sinneri Eqqagassat tigooraavianukaattussaapput tassani Knora-p sulisullu pikkorissorsuit immikkoortiterneqarnissaat samimminernut, elektroniskiusunut/ igaffimmi atortorissaarutit, errorsisarfimmi atortorissaarutit aamma eqqagassat navianartut atoqqinneqarsinnaasunngorlugit aammali isumannaatsumik suliarineqarnissaat pillugit Danmarkimut nassiuteqqinneqartussat isumagissavaat. Taamaalilluni taamaallaat eqqagassat annertuut ikuallatassat maani Nuummi ikuallaavimmut tunniunneqassapput nukissatut kiassarnermullu atorsinnaalernissaat siunertaalluni soorlu assersuutigalugu naluttarfik Malimmut.  

Ukiumut marloriarluni katersuisarnersuit

Eqqagassanik katersinersuaq oktobarip qaammataani pisoq ukiumut katersinerit kingullersaraat. Katersinersuaq tulliani pissaaq upernassamut, tassani Knora kingumut eqqagassat annertuut suliarinissaannut piareeqqissaaq. Upernassap tungaanut illit nammineq eqqakkanik tigooraavimmukaattassavatit, tassani sulisut ullut tamaasa tigusinissamut piareeqqassapput. 

Eqqagassanik tigooraavik Ikuallaaviup eqqaaniittoq ammasarpoq ataasinngornermiit tallimanngornermut nal. 7.00-17.30 arfininngornikkut nal. 9.00-14.00 kiisalu sapaatikkut nal.11.00-16.00.

Eqqagassat annertuut pillugit imaluunniit eqqagassat nalinginnaasut pillugit arlaannik apeqqutissaqaruit ulluinnarni uunga oqarasuaammut 36 74 11 imaluunniit allallutit uunga affald@sermsooq.gl  saaffiginnissinnaavutit.

___

Knora suminngaaneerpa?

Knora pillugu paasissutissat annikitsuinnaapput, Facebook Sermersooq Affaldscenterilu aqqutigalugu Knorap piginnittorisimasaa kinaanersoq paasivarput tassaasoq Kuno Nygaardi KN Tagdækning-imeersoq, taannalu Ikuallaavimmukarluni Knorap oqaluttuassartaa oqaluttuariartorumallugu piumaqaaq.

Knora Hollandimit pilerfeqarpoq, orangiamik qalipaatigissumik qernertunillu toornilinnik qalipaateqarpoq, KN Tagdækning-imi biilinut orangiamik qalipaatilinnut qernertunillu toornilinnut tulluuttuulluni. Sivitsunngitsorli Knora Danmarkimut pivoq, meeqqanit inersimasuniillu alutorsaatigilluinnarneqarluni.

Knora Danmarki kiappallaarilerlugu suli avannarparterusuttoq – soormi Kalaallit Nunaanukaannaruni? Suliffeqarfik Qapiarfiusaani nutartereqataasussanngormat taamaalilluni Knora ilaalluni maanga apuutikaseqaaq. Taamaalilluni maani eqqissiivillu pisunik alaatsinaarujoortalerpoq, suliarlu naammassimmat tusakkat naapertorlugit meeqqerivimmut tunniunneqarsimavoq. 

Meeqqerivik sorliusimanersoq Tigooraavimmullu apuunnissami tungaanut Knorap aaqqusaarsimasai ilisimasaqarfiginngilavut.

Nersussuaq Knora eqqaavissuarmiunngornera sioqqullugu nalaassimasaanik pissanganganartunik nalunngisaqaruit, taakkuninnga avitseqatigerusukkutsigut uunga nassiuguk  affald@sermersooq.gl