Innuttaasunut

300 millionit koruunit nutaamik sanaartornermut, sanaartorfissagissaanermut attaveqaatinullu atugassat

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

2019-imut missingersuutit: Illoqarfiit nunaqarfiillu sanaartornermik nutarterinermillu pilersaaruteqarfiupput.

Kommuneqarfik Sermersuumi aappaagumut missingersuusiornermi sanaartornermut atugassat erseqqissumik taassagaanni 300.076.000 koruuninik annertussuseqarput.

”Qularutiginagu oqarsinnaavunga, aappaagumut missingersuutigut ukiunullu missingersuuteqarfiusuni sanaartornermut aningaasaliissutissanut missingersuutit isumalluarnartuusut. Kommunimi ineriartortitsinissamut anuniakkanik Kommunalbestyrelsimi angusaqarusussuseqaratta pisariaqartutigut aningaasaliivugut. Kommunimut tamarmut tamanna iluaqutaassaaq – illoqarfissuarmi, illoqarfimmi mikinerusumi nunaqarfimmiluunniit najugaqarneq tassani apeqqutaatinneqarani. Illunik nutaanik sanaartorlutalu pioreersunik pisariaqartutigut nutarterissaagut” Asii Chemnitz Narup (IA), Kommuneqarfik Sermersuumi borgmesteri oqarpoq.

2019-imut missingersuutitigut sanaartornermi aningaasaliissuterpassuit ilaat matuma kinguliini takuneqarsinnaapput.

Tamakkiisumik isiginnissinnaaneq

  • Nuummi Tuujummi inissialiornermi inaarsaaneq
  • Nuummi sanaartorfissagissaaneq attaveqaatillu
  • Annertuumik sanaartortoqartillugu, soorlu meeqqeriviliornermi nutaanillu atuarfiliortoqartillugu, siumoortumik akiliinissamut (up-front-betalinger) ileqqaarneq
  • Nuummi Nuutoqqap aamma Tasersuup (Aqqaluks Plads) uummarissarneqarnerat, tassunga ilanngullugu amutsivitoqqami neriniartarfiliornissaq/cafiliornissaq pillugu ininik nutarterineq Nunaqarfiit ineriartortinneqarnissaat pillugu pilersaarut – nutaanik sanaartorneq aamma eqqaavissuarmi takujuminarsaaneq pitsanngorsaanerlu ilanngullugit
  • Kulusummi qatserisartoqarfik
  • Tasiilami angallataasivimmik pilersitsinissaq
  • Tasiilami tunitsivimmik pilersitsinissaq
  • Tasiilami Inuusuttut kulturikkut illuat aningaasaliiffigeqqinneqarnera
  • Kuummiuni arsaattarfik ivigaaraasalik
  • Kommunimi tamarmi arsaattarfiit ivigaaraasalersukkani qullilersuineq