Innuttaasunut

Qinigassanngortittunut tunngasut paasisaqarfigikkit

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Uani atuarsinnaavatit qinigassanngortittut imminnut ilisaritinneri, aammalu Nuummi Najukkami Ataatsimiititaliami sunik suliaqumanerminnik nassuiaataat.

Qinigassanngortittut allattorsimaffiat

Nuuk qeqqa

Søren Hans Lynge, 62-inik ukiulik

Illoqarfiup qusassarnissaanut soqutiginnippunga, aammalu innuttaaqatikka tusarussavakka, suut iluarsineqarsinnaanersut aallutissallugu. Qinikkat nunaqatikkalu akornanni inissisimaneq atorluarlugu, pisortanut apuukkusutat tusaarusussavakka. Soqutigisamalu ilagaat, ikuallaaviup siunissami, suli atorluarneqarnissaa, kiisalu piginnittut ingerlatsisullu.

Mette-Sofie Jørgensen, 52-inik ukiulik

Mette-Sofie Jørgensen-mik ateqarpunga  52-nik ukioqarlunga, allaffissornermillu ilinniagaliullunga. Najukkami ataatsimiisitaliami qinigassanngortinninnut ilaatigut makkuninnga suliniuteqarusullunga qinigassanngortippunga:

– Peqatigiiffiit illuutissaannik pilersitinissaq
– Innarluutillit timersortinneqartarnerannik pimoorullugu suliniutit
– Illoqarfiup qeqqani illoqannginnersaq inuppassuit ataatsimoorfigisinnaasaat, innuttaasut suleqatigalugit ilusilersorneqartussaq.

Jakob-Peter Berthelsen, 56-inik ukiulik

Uanga ateqarpunga Jakob-Peter Berthelsen Nuummi najugaqarpunga. 
Nuummi najukkami ataatsimiitsitaliamut qinigassanngortippunga piumassuseqarpunga suleqataarususseqarama. 
Makkua suliniutiginiarpakka: Meeqqaniit utoqqarnut assigiinngitsunik saamisaqartitsisarnissamut, meeqqeriviit atuarfiit inuusuttunullu ornittakkani piorsarsimassutsikkut siuarsaanissaq, soorlu:

makkuusinnaapput utoqqaat aammalu assiginngitsuni sulinermik misilittagaqarluartut meeqqerivinnut, atuarfinnuut aammalu inuusuttut ornittagaani pilersaarusiorluaqqamik aaqqissuussinikkut saammisaqatigiissinnaaneq. Nuup illoqarfiani issiarfiisinnaasut tamakkiisumik inissilluarnissaat, piorsarsimassutsikkut tunngasunik nipilersorneq, isiginnaartitsineq erinarsortitsinerillu aaqqissuulluakkamik tamanut ammasumik ingerlanneqartarnissaat.

Naleraq Olsen Eugenius, 32-inik ukiulik

Nuup illoqarfia qaammarsartigu, ingammik ukiukkut. 
Uanga illoqarfipput qalipaasersorusuppara qulliit atorlugit. Ukiorput takisooq tarnimut oqimaassinnaasoq, qaammarsartigu taava ukioq qalipaatigilluni kikkunnut tamanut nuannernerulissaaq. Ingammik blok-it sanioqquttuartillugit, meeqqanut, takornarianut inunnullu kikkunnut tamanut illoqarfik qaammarsartigu.

Allan Hassig, 52-inik ukiulik

Inuit katerisimaartinneqartarnissaat sulissutiginiarpara, ataatsimoornermik nukittuunngortitsisartut, soorlu juullerpalaartitsinerit illoqarfimmi immikkoortortani tamani, gløgg, juullerpaluttunik tuniniaanerit aammalu nuannersunik ileqqoqalersitsinissaq. 
Illoqarfimmi meeqqanut inuusuttunullu timersornikkut pitsaasunik peqqinnartunillu suliaqarnissaq sulissutigerusuppara – nerisassat peqqinnartut, allatut timersuutinik aaqqissuussinerit, apummi arsaannerit, qamutarluni unamminerit allallu. 
Angallanneq illoqarfimmilu ataatsimoorfiusinnaasut qitiutippakka – aqqutit meeqqanut isumannaatsut/aturfiit tungaannut aqqutit pilersillugit, illoqannginnersat grilleriffiusinnaasut/illut. 
Aammalu illoqarfiup isikkua, aqqutigineqartartuni isikkugissaanerit, naasut, eqqumiitsuliat kulturilu, qanganut nutaatullu kusanartuliat nipilersornerlu.

Malik Miilu Frederiksen, 27-inik ukiulik

Kalaallit Nunaanni illoqarfiit pingaarnersaat Nuuk ineriartortuarnissaanut piumassuseqarpunga allanngueqataarusullunga. 
Nuummi innuttaasut ikalingaluttuinnartut illoqarfippullu Nuuk allingaluttuinnartsillungu ineriartorneq aamma malinnaasariaqarpoq. 
Utoqqaat meeqqat inuusuttut oqimaaqatingiissumik sunngiffimmini sammisassaat oqimaaqatingiimmik agguataarneqassapput.

Tage James Kreutzman Frederiksen, 72-inik ukiulik

Inuiaqatigiinnut tunngasunik suliaqarnissaq oqallitsitsisarnissarlu soqutigaakka. Matumani ukiuni qulini borgmesteritut sulinikuuvunga.

Esmar Bergstrøm, 55-inik ukiulik

55-nik ukioqarpunga, katinnikuuvunga inersimasunillu meeraqarlunga, ernutaqarlungalu.
Nuummi 1970-imili najugaqarpunga, angallammi naalakkatut ilinniarsimasuuvunga Nuullu eqqaani angalasarlunga aammalu imarsiornermut tunngasunik atuartitsisarlunga. Najukkamut tunngasut soqutigisorujussuuakka, kulturimut timersorneq, pinngortitamullu tunngasut.

Christina Tønder Bell, 40-inik ukiulik

Najukkami Ataatsimiititaliamut qinigassanngortippunga, illoqarfiup ineriartornissaa innuttaasut qanimut suleqatiginerisigut ingerlanneqarnissaa kissaatigigakku. Upperaara – innuttasut tamatta – ataatsimoorluta illoqarfik pilersissinnaagipput teknikki aamma teknikkikkut ineriartorneq inuttut ineriartornermut tasioqatigiissillugit ingerlanneqarsinnaasoq. 
Soqutigisakka tassaapput kommunip innuttaasullu kajumissutsiminnik suleqataasartut suleqatigiissinnissaat, illoqarfiup piujuartitsinikkut nukittorsarnissaa aammalu illoqarfiup innuttaasut aallaavigalugit illoqarfiup ineriartortinnissaa, imaappoq pinngortitamut ajornanngitsumik appakaassinnaaneq aammalu asiartarfiit sukisaarsaartarfiit, illoqarfimmilu naapittarfiit qulakkeerneqarnissaat.

Johanne B. Tobiassen, 47-inik ukiulik

Uani allaaserisamik pissarsinngilagut.

Holger Kristiansen, 65-inik ukiulik

Inuiaqatigiinnut tunngasut soqutigisaraakka inuiaqatigiinnilu sullissineq nuannarisaralugu. Innuttaasut sinnerlugit taakkulu sullikkusullugit qinigassanngortippunga.

Gorm Geisler Vold, 50-inik ukiulik

Uanga ateqarpunga Gorm Geisler Vold, 50-inik ukioqarpunga, marlunnik meeraqarpunga aammalu aapparma meerai marluupput, Aaqami tullersortitut atorfeqarpunga. Tuapannguani najugaqarpunga taavalu 70-ikkunnilu ukiut 40-t sinnerlugit Nuummi najugaqarpunga. Nuummi sunngiffimmi meeqqanut inuusuttunullu periarfissagissaarnerulernissaq sulissutigerusuppara, pinnguartarfinnik pilersitsisoqarnissaa, meeqqanullu mikisunut sisorartarfeqarnikkut angallannikkullu isumannaallisaasoqarnissaa. Ilaqutariit pissakinnerusut sisoraatinik/cykkilinik/skateboardinik allanillu atukkiunneqartarnissaat. Sanap/arsaattarfiup qanittunilu allani eqqaani majuartaateeraliortoqarnissaa. Nuup illoqarfia kusassarlugu illoqarfiullu qeqqa pilersaarusiorlugu ataqatigiissumik pisuinnaat angallaffiattut pisiniarfeqarfilittut, biilinut uninngatitsisarfiit illorsuarniittut illorsuillu portusuut ataqatigiinnerulersillugit. 
Nuuk illoqarfiussaaq kusanartoq nuannersoq.

Kristen “Miilu” Møller Mikiassen, 58-inik ukiulik

Kristen Møller Mikiassen-mik ateqarpunga, ulluinnarni Miilu, 58-nik ukioqarpunga, Nuummi inunngornikuuvunga alliartorlungalu, typoteknikeritut ilinniarsimavunga, ullumikkullu Infodesign-imi grafikeritut sulillunga. 
Uanga suliniutissatut pingaarnertut uannut pingaarnertut taarusuppara Nuup illoqarfiani iniisiaqarfiit eqqaanni innuttaasut sunngiffinni anerasaarfigisinnaasaasa pitsanngorsarnissaat, assersuutitut taarusuppara, soorlu narsarsuarmi blokkit akorngini nunaminertat iluamik atorneqanngitsut aaqqissuussaasumik iluarsartuunnerisisigut innuttaasut silami ataatsimoorfigerujoorsinnaasaat, soorlun taakkua Qinngutsinni takusinnaagigut (Suloqqami). 
Aammalu najugaqaqatgiiffiit eqqaanni soorlu utoqqaat illuata eqqaa ullumikkut atorneqanngitsut illoqannginnersamerngit utoqqarnut naleqquttunik aaqqissuulluakkanik ilusilersukkanik aneerasaarfigisinnaasaat issiavilersuinikkut. 
Tassa uanga pingaarnertut taasinnaasakka maannakkut soorunami allarpassuarnik peqaraluarpoq 
aaqqeeqataaffigerusussinnaasannik, sumiiffimmi ataatsimiititaliamut qinigaassagaluaruma 
peqataaffigilluarsinnaasannik.

Erni Kristiansen, 29-inik ukiulik

Erni Kristiansen 29 år ilinniartitsisutut ilinniarnikuuvunga massakkut ungdomskonsulentitut sulivunga. 2010-miit kajumissutsinnik sammisassaqartitsinerit ingerlattarpakka assullu nuannaralugit. Qinigaassaguma meeqqanut, inuusuttunut, inersimasunut ilaqutariinnullu sammisassat akeqanngitsut amerlanerulernissaat sulissutigissavakka illoqarfiullu tikikkuminarnerulernissaa periarfissat illoqarfiullu isikkua Nuummiut sanaluttartut allallu piginnaanilissuit peqatigalugit inerisaaqataaffigerusuppara.

Aviaq Brandt, 37-inik ukiulik

Nuummiuuvunga Nuuk qulingiluanik allanik peqateqarlunga Nuummik ineriartortitseqataarusuttoq. Tassa uanga. Innutaasut ersarinnerusumik namminneq illoqarfitsinni oqariartuuteqarsinnaalernerannik illersuisuuvunga, allaallu ima qanitsigisumik illoqarfiit immikkuutitaarlugit agguarsimasumik. Taamaammat uanga Nuuk sinnerlugu qinigassanngortippunga. Illoqarfiga asvara, illoqarfitsinnilu suut aalajangiiffigineqassanersut pillugit isummersortalunga. Nuuk ineriartornissaminut periarfissarpassuaqarpoq – illoqarfik siuarsarfiusoq. Illit Najukkami Ataatsimiititaliami ilaasortassatut qinerumma, Nuuk sorpassuartigut ineriartortitseqataaffiginissaanut peqataasinnaalissaanga. Tassaasinnaapput Aqqaluks Pladsimi kusassaanerit, illoqarfimmi ataatsimoorfissat, inuusuttunut utoqqarnullu sammisassat amerlanerit. Maani Nuummi inunngorlungalu Avannarlerni peroriartorpunga maannakkullu Gertrud Raskip Aqqutaani najugaqarlunga. Tassani angerlarsimaffeqarnerusutut misigisarpunga aammalu Najukkami Ataatsimiititaliami ilaasortat ilaattut qinigaassaguma nuannarissaqaara. Qinerumma maniguullunga suliassara suliarissavara Nuummilu innuttaasut tamarmik iluaqutissaannik sulissuteqarnissara nuannarissallugu.

Ujammiugaq Engell, 32-inik ukiulik

Inuiaqatigiit pitsaasumik ineriartortinnissaat suleqataaffigerusukkakku qinigassanngortippunga, kulturi angisuunut mikisunut, inuusuttunut utoqqarnullu qitiutillugu.

Jesper Søndergaard Olesen, 51-inik ukiulik

Jesper Olsenimik ateqarpunga. 
Nuliaqarpunga Lise, marlunnik paneqarpugut angajulleq 15-nik ukioqarpoq, ASK-imilu 10. klassemi atuartuulluni, nukarleq 11-nik qaammateqarpoq Qapiarfiusaamilu najugaqarfitsinni meeraaqqerivimmiittarpoq. 
Nuummut nuuppunga ukiut 19-ingajaat matuma siornali Nakorsiartarfimmilu nakorsatut atorfeqarlunga. Maaji Nuannersuutiguk pilersitseqataaffigalugulu ineriartortitseqataaffigaara. Majuartaateqarfinni siulersuisunut ilaasortaavunga naluttarfimmilu Malik-mi atuisunut siunnersuisooqatigiinnut ilaasortaallunga, taakkunani marlunni meeqqat akeqanngitsumik sisorartarnissaat/nalukkiartarnissaat suleqataaffigalugu. 
Nuummi Najukkami Ataatsimiititaliami uanga qineqqusaarninni amerlanerusunik periarfissaqartitsilernissaq sulissutiginiarpara, aammalu kikkut tamarmik pinngortitamut ajornannginnerusumik atuisalernissaat suleqataaffigerusullugu. Pingaartumik utoqqaat pitsorluttullu qitiutillugit, assersuutigalugu Kuannginnguit tungaannut aqquteeraliortitsinikkut.

Nadia Aviaq Olsen, 25-inik ukiulik

Matumuuna qineqqusaarutikka naatsumik:

  1. Ilinniartunut illu; Nuuk ilinniartoqarfiuvoq, assiginngitsunik ilinniagaqarfeqarfiit ataatsimut illoqartinneqarsinnaapput imminnut oqaloqatigiittarfissaannik, nutaaliornissamullu tunngsunik suliniuteqarfigisinnaasaannik. 
  2. Pinngortitaq eriagisaq; Nuuk illoqarfissuuvoq, pinngortitarlu asseqanngitsoq nuannersorlu ungasippallaalaartumik najugaqarfigaarput. Taamaalilluni pinngortitaq eriagisassaq pilersinneqarsinnaavoq innuttaasut pinngortitami biilinit allanillu akornusersorneqaratik pisuttuarfigisinnaasaat eqqissisimaarfigisinnaasaallu.
  3. Ilaqutariinnut timersortitsisarneq
    Nuummi timersortarfivut iligiilluni timersoqatigiittartunut piffissani aalajangersimasuni TAAMAALLAAT atugassiaapput, innuttaasunut timersornermik aallusserusuttunut piffissat aalajangersimasut periarfissagissallugit ajornakusoortarpoq. Taamaattumik timersornermik aallutaqarusuttunut nutaanut timigissartarnissaq pilersitseqataaffigerusunnarpoq.
  4. Kulturikkut aaqqissuussinerit; 
    Assigiinngitsunik suleqateqarluni aaqqissuussinerit, soorlu nunatta isiginnaartitsisarfiata innuttaasullu suleqatigiissinnerisigut – Nuummi innuttaasunut tamanut qanorluunniit ukiulinnut iluaqutaasussamik.

Magdalene Kirstine D. Fontain, 62-inik ukiulik

62-inik ukioqarpunga, siusinaartumik pensionisiaqarpunga Nuullu illoqarfiata ineriartortinnissaanut suleqataarusullunga. Meeqqat atuarfianni timersuutinik arfineq-marlunni assigiinngitsuni dommeriusarnikuuvunga, aammalu Aasianni, Sisimiuni Nuummilu atuarfinni tamani atuartitsisarnikuullunga. Kalaallisut, qallunaatut, tuluttut, tyskisullu oqaluttarpunga aammalu norskisut svenskisullu paasisinnaallunga. Pitsaanerusumik atuartitsinissaq sunngiffimmilu timersornikkut susassaqartitsinissaq qitiutillugit sulissuteqarusuppunga, isumaqarpungalu kalaallisut kulturitta atorluarneqarnerunissaa tammatsaalinissaalu qitiutinneqartariaqartoq. Nammineq ´ulu´atortarpara anaanannit kingornutara aammalu eqalunnik iganeq, tarajorterineq panertiterinerlu suliarisarlugit.

Rigmor Thaarup E. M. Høegh, 66-inik ukiulik

Najukkami Ataatsimiititaliamut qinigassanngortippunga Nuup siunissaa ilusilersueqataaffigerusullugu, Nuummilu meeqqanut, angajoqqaanut inuusuttunut utoqqarnullu ataatsimoorluta ineriartorneq nukittorsaaqataaffigerusullugu, aammalu Nuummi innuttaasut qinikkat oqartussaqarfiillu ammasumik oqaloqatigiittarnissaat angorusullugu.

Esther Karen Kirsten Hammeken, 65-inik ukiulik

Uannut pinaveersaartitsineq pingaarneruvoq siunissamullu aqqutissaalluni. Tamanna uanga pingaarteqaara. Ilaqutariinnut pilersaarusiorneq ilaqutariittullu inuunissamut pilersaarusiorneq, naartuneq, meeqqeriviit, aammalu naartusut immikkut pisariaqartitsisut eqqarsaatigalugit. Inuunerup ingerlarngini assigiinngitsuni pinaveersaartitsinermut tunngasut eqqarsaatigisariaqarput – aamma utoqqalinitsinni, pingaaruteqartorujussuuvoq ataqqinartumik ataqqinnittumillu utoqqaliartornissarput. Qulaani taasakka tamarmik imminnut ataqatigiipput, aammalu Najukkami Ataatsimiititaliami sulissutigineqartarsinnaallutik.

Moses Masik Marcussen-Mølgaard, 18-inik ukiulik

Unga peqatikka sullikkusuppakka, assersuutigalugu innuttaasut ilinniarnertuunngorniarfimmi atuartut imaluunniit tassannga naammassinneqammersut. Tassami Nuummi innuttaaqataasutut misiginarneq ajorpoq taamatut ukioqartilluni, puigorneqartutullu misigisimanartarluni. Taamaattumik inuusuttunut sammisassat amerlarnerusariaqarput.

(Ari) Hansine P. Rasmussen, 51-inik ukiulik

Uani allaaserisamik pissarsinngilagut.

Najâraq Egede, 57-inik ukiulik

Nuummiuuvunga, tusagassiortutut ilinniagaqarpunga, kulturimulli tunngassuteqartumik ukiorpassuarni kingullerni suliaqarlunga. Illoqarfik inunngorfiga najoruminarnerulersikkusoqaara, pingaartumik aalassarluttut eqqarsaatigalugit. Nammineq inersimasunngoreersumik innarluutilimmik erneqarpunga, taamaammallu paasinikuullugu qanoq innarluutilittagut innorluutilittagullu periarfissalutsigisut. Iliuuseqaqataarusoqaanga illoqarfitta nutaanngitsortaa nutaartaalu eqqarsaatigalugit.

Helene Ululinanguaq Kleist, 43-inik ukiulik

Meeqqat atuareernerup kingorna sammisassat amerlisarnissaat, imigassartaqanngitsumik akeqanngitsumillu ilaqutariinnut sammisassaqarnerulernissaa, perorsaanermullu tunngatillugu ilaqutariittut peqqinnarnerusumik inuusoqalernissaanut qaammarsaasoqarnerulernissaa angorusuppakka.

Nuussuaq

Hans-Peter Ananiassen, 51-inik ukiulik

Hans-Peter Ananiassenimik ateqarpunga 51-inik ukioqarlunga, massakkullu Royal Greenlandip qullersaqarfiani saaffiginnittarfimmi sulisuullunga. 
Uanga angerlarsimaffeqanngitsuunikuuvunga, taamaattumik maani kommuniimini angerlarsimaffeqanngitsut sullinneqarnissaanik suliaqarusuppunga. Angerlarsimaffeqanngikkallarama qinikkanut qulliunerusunut (Inatsisartunut Naalakkersuisunullu) piffissami 2009 – 2013 angerlarsimaffeqanngitsunut aningaasaliissutissanut akuerisitseqataanikuuvunga. Siullermik 7,5 millionit kingornalu tapiliutissanik 2,5 millioningajannik (katillugit 9,9 million koruuninik) taakulu tamarmik Nuummi atorneqareerput ullumi. Immikkoortoqarfimmi qinikkat aqqutigalugit kommuunimi atorfilittat angerlarsimaffeqanngitsut atugaanik paasisaqarnerulernissaannut suleqataarusuppunga. Angerlarsimaffeqanngitsut kommuunimut saaffiginninnissaminnut ajukkuttarput imaluunniit kisittarput, ilaatigullu ikiorneqaleraangamik “tupattarput” kigaatsorsuarmillu “nunamut kiviartortarput”. Taamaattumik angerlarsimaffeqanngitsut inuusukaajunerusut amerlavallaat kommuneqarfiup unnuisarfiani artorsaateqartarput ikiorneqarnissaminnik kiisalu kaammattorneqarnissaminnik amigaateqartarput. Naak “Frelsens Hær” kiisalu Kofoeds Skole Nuuk ulluinnakkut ornittagarivaat, tassaniitillutillu annertunerusumik suniarnerlutik inissittarput. Allaffissornerullu iluanni angerlarsimaffeqanngitsut sullinneqarnerat annertuumik eqaallisartariaqarpoq angerlarsimaffeqanngitsunullu saaffigiuminarsinnaasumik peqartariaqarpoq.

Kajpeter Møller-Heinrich, 30-inik ukiulik

Nuummi najukkami ataatsimiititaliamut qinigassanngortippunga. Nuuk illoqarfittut ineriartorneranut sunniuteqaqataallunga ineriartortitseqataarusukkama. innuttaasut qanimut suleqatigalugit illoqarfik amigaataanik pilersitsivigiortorneqarnissaa. silami sammisassat amerlillugit, silami periarfissat amerlisillugit. illoqarfipput uummarissarlugu innuttaasut peqatigalugit, susassaqartitsusullu peqatigiiffiit suleqatigalugit aaqqissuusseqataaffigisinnaassaannik. Nuuk illoqarfik tassaasariaqarpoq, Kalaallit inuiaat illoqarfiat pingaarneq ineriartortoq,sineriammiunit tamanit najoruminartoq toqqissisimanartorlu.

Leif Saandvig Emmanuelsen, 52-inik ukiulik

Matumuuna Nuummi najukkami ataatsimiititaliamut qinigassanngortippunga isumaqarama Nuummi najugaqarnera ima sivitsotigisoq, akisussaaqataanermut alloriarnissamut piffissanngorsimasoq. 
Nuup immikkoortuani Nuussuarmi Illorput Cafe-tut aaqqissuunneqarluni innuttaasunit orninneqarsinnaasunngortinnissaa anguniassavara, ilaatigut nipitunngitsumik nipilersornikkut, erinarsoqatigiinnikkut isiginnaagassiaaqqanillu assigisaanillu aaqqissuussiffigineqarsinnaasunngortillugu. 
Nipiliuutinik naleqquttunik qullilersorsinnaaneranullu periarfissanik pilersorneratigut anersaakkut pisuunngorsarfissatut naleqqussarnissaa suliniutigissavara. Sulisuussussat akissarsiaqassapput. Nipilersortut aliikkusersuisut allallu pikialaartitsinermi saaffigineqarlutik takutitsisut akissarsiassaqartinnissaat pisariaqarpoq. 
Aaqqissuussinermut pisortaqassaaq (arrangement kordinator). Kulturhuseeqqatut atuussinnaassaaq.

Hanne Saandvig Emmanuelsen, 47-inik ukiulik

Uanga Najukkami Ataatsimiititaliamut qinigassanngortippunga, Nuummi meeqqat inuusuttullu allaanerusumik ilikkagassani periarfissagissaarnerulerniassammata, taamaasillunilu qamuuna timikkullu inariartuutaaniassammata. Assersuutigalugu qalipaaneq, assarsorneq, nipilersorneq, erinarsorneq, qitinneq assigisaallu. Naluneqanngilaq, allatigut ilikkagassani periarfissaqaraanni aamma atuagarsornikkut pitsaasunik angusaqarfiusartoq, aammalumi meeqqat inuusuttullu siunissaraavut, taamaattumik tamanna pingaartittariaqarpoq.

Poul Petersen, 45-inik ukiulik

Nuuk illoqarfittut pissanganarlunilu eqeersimaarfiujuaannarnissaa peqataaffigerusuppara, pisoqartitsiffissatut, suliniuteqarfissatut avatangiisinullu inissaqartitsiffiusoq. Amerlasuunik nukittuunillu attaveqaateqalernissaq sulissutigerusuppara, peqatigiiffippassuarnik, illoqarfiup immikkoortortaani timersornermik suliaqartunik suleqateqarneq nukittorsarlugu. Aamma najukkami ataatsimiititaliami illoqarfiup pilerinartuuinnarnissaa saligaatsuujuarnissaalu pillugit sulineq nanginneqassaaq, taamaattumillu avatangiisit, saliisarnerlu illoqarfiup ilisarnaatigissagai. 
Tamatumani ukiorpassuarni peqatigiiffinni suleqataasarninni ilisimalikkat tunuliaqutaraakka aammalu timersornermut suliniutinullu tunngasunik ilisimasaqarnera.

Sikem Andreassen, 63-inik ukiulik

Pissanganartuummat ammalu, soqutiginarmat illoqarfitsinni suleqataarusukkama. Nammineq soqutigisakka makkuupput.Timersorneq-Eqqumiitsulianik sammisaqarneq-Kultorikkut inerisaaneq. 
Taassumap saniatiugut, kajumissutimik suleqataaniq angisuunut mikisunullu peqataaffigisarnikuuvakka, aammalu kommunip aaqqissugaani ikiuuttarnikuullunga. Soorlu utoqqaat –aammalu meeqqat.

Karen Marie Nathansen, 59-inik ukiulik

Nuussuarmi sunngiffimmi sammisassat amerlanerit. Karen Marie Nathansenimik ateqarpunga. Psykologitut ilinniarsimasuuvunga. 59-inik ukioqarpunga. Klaus Georg Hansen uigivara. Inersimasunik pingasunik qitornaqarpugut, Aka, Malik aamma Kunuk, taavalu ernuttatsinnut Kuluk aamma Ujumut aanaajuvunga. 
Sulininni meeqqat ilaqutariillu kivitseqataaffigisarpakka. Ukiorpassuarni siulersuisuni sulineq kajumissutsimillu suleqataaneq ingerlattarnikuuakka. Maannakkut Kalaallit Røde Korsianni pulaartartuni suleqataavunga. Najukkami Ataatsimiititaliami meeqqanut inuusuttunullu sammisassanik pilersitseqataanissaq sulissutigerusuppara. Nuussuarmi meeqqanut sunngiffimmi sammisassat amerlisarnissaat suleqataaffigerusuppara.

Peter Tuusi Motzfeldt, 45-inik ukiulik

Ukiuni 24-ni TV-mi Radiomilu aallakaatitassiornermik, Kulturikkullu illorsuarmi aaqqissuussani suleqataasarnera pingaarnertut tunuliaqutaralugit, Najukkami Ataatsimiititaliami suleqataanissamut kajumissuseqarnera nalunaarutigaara. Allat peqatigalugit Nuummioqatit tamakkiisumik isigalugit agguataarisinnaanissaq sullissinissarlu pingaartilluinnarlugit anguniagaqaqataaffigersuppara. Illoqarfitsinni soqutigisagut assigiinngisitaaqisut aallaavigalugit naapissinnaanerput atortigu.

Jan Petersen, 54-inik ukiulik

Iluatsillugu qineqqusaalaaraanni sunngiffik sammiuarnikuullugu ilikkagaqarfiginikuullugulu ingerlateqqikkusutanik qineqqusaaqatikkalu peqartigaluta… 
Tamatumuuna sunngiffiup silarsuaa kinguaariit pingasukkaanik sammisassaqarfiusoq qularnanngitsumik tamatta pilerigaarput… 
Rullestollerussigutta Akianut ipukkutta ulluinnarlugu sap ak naanersioriarlugu lejrerluta immaqalu skattejagt… 
Kalasseqatigiilaartarluniaasiit nuannertassasoq atortorissaarussuit sungiusarlugit qulerujussuit isummersorutta pilersaarusiorutta iliuuseqarutta tamaasa SANA Ippiarsuk ilinniarfiit atuarfiit meeqqeriviit katersortarfimmeeqatigilluarsinnaapput… 
Qaquk Narsaq Qoornoq here we come…

Gerda Birthe Thala Knudsen, 62-inik ukiulik

Uani allaaserisamik pissarsinngilagut.

Malik Andersen, 23-inik ukiulik

Mikisunnguanik sulaqarnissaq takorluugaraara, isumassariat annikitsut. Illoqarfik amerlasuunik workshoppertarfilik aaqqissuussiffigineqartartorlu, attaveqaatinik pilersitsiffiusoq, innuttaasunut qanilaarnermi kissalaarnermillu pilersitsiffiusoq.

Finn Meinel, 51-inik ukiulik

Uani allaaserisamik pissarsinngilagut.

Ida Mathiassen, 45-inik ukiulik

Qineqqusaarninnut tunngavigivara maani Nuummi ineriartortitseqataarusukkama. 
Timersornerup tungaatigut kaammattoqatigiinneq kajungernartoq ammaanneqartariaqarpoq. Timersortan­ngitsut timersortalernissaannut periarfissaat ersarinnerusariaqarput. Taamaasilluni ataatsimoorneq timik­kut tarnikkullu ineriartorfiusoq inuiaat peqqinnerulernissaannut aqqutissaassammat. Utoqqarnut meeqqa­nullu aaqqissuussinerit, timersortitsinerit ataatsimooqatigiisitsinerillu kulturikkut inooriaatsikkullu ineriar­tuutaasussat amerlanerusariaqarput. Atuarfeqarneq pillugu inuiaat tamatta susassareqatigiinnerussaagut.

Agnetha Mikka Petersen, 63-inik ukiulik

  1. Innuttaasunut sammisassat amerlanerit
  2. Innuttaasut qanorluunniit ukioqaraluartut peqqinnarnerusumik sammisassaqartinnissaat

Mikisoq P. Kreutzmann, 49-inik ukiulik

Sassarpunga Nuummi Najukkami Ataatsimititaliamut soqutigigakku Nuup ineriartorneranut suleqataanissara, nammineq nuup ineriartorneranut malinnaanikuullunga, suli ineriartortsitassarpassuaqarmat pitsanngorsagassaqarlunilu, innuttaasunullu nuannersunik atugasaqartsitsisinnaaneq illoqarfiup iluani ineriartortsitsiteqataaffigerusullugu. Nuuk innuttaasunut tikeraanullu nuannersooqqullugu.

Malîna Johnsen, 53-inik ukiulik

Aajukua pingaarnertut taarusutakka:

  1. Utoqqaat kiserliortut pulaartartoqalernissaat, soorlu sulisunik pilersitsinikkut pulaartartutut.
  2. Meeqqat ilaqutariit sammisassanik assigiinngitsunik nutaanik periarfissaqarnerulernissaat, soorlu taasinnaavara naluttarfik ilallugu pinnguartarfiit sisoortarfiit pilersillugit inersimasullu eqqissisimaarfigisinnaasaannik meeqqanut immikkoortumik pilersitsineq. Ullumikkut naluttarfik mikivallaalersutut isikkoqarpoq innuttaasut amerliartormata malinnaasariaqarmata aamma tamakkua.

Siornatigut marloriarlunga allagaqarnikuuvunga siunnersuusiortarlunga, soorlu blok P-p inissisimaffiginikuusaa sumut atorneqarsinnaaneranut aamma siunnersuummik allagaqarnikuusunga. Sorpassuit eqqartorneqarsinnaapput annikigisoornartarluni ilaanni utoqqaat ilaqutariittullu aallanngikkaluarluni sumunngarsinnaanerit killeqarsinnaasarmata, taamaammat eqqarsaatersorfigisarpakka ukioq kaajallallugu aliikkutassaqartoqarsinnaaneq inussivik naluttarfillu pinngikkaluarlugit aamma allanik eqqarsartoqarsinnaammat.

Ane Berthelsen, 40-inik ukiulik

Uani allaaserisamik pissarsinngilagut.

Pavia Kristian V. J. Kristensen, 67-inik ukiulik

Uani allaaserisamik pissarsinngilagut.

Birger Poppel, 68-inik ukiulik

1984-mili Nuussuarmi najugaqarpunga illoqarfiullu sukkasuumik ineriartornera malinnaaffigalugu. Najukkami Ataatsimiititaliami ilaasortatut innuttaasut akuutinneqarluarnissaat sulissutigissavara, ilaatigut najukkami ataatsimiititaliaq kommunalbestyrelsemut immikkoortortanilu innuttaasut, suliniaqatigiiffiit suliffeqarfiillu ataqatigiissillugit. Sulissutigisassama ilaat:

  1. Nuuk eqqaani takornariaqarnerup atasinnaasup (bæredygtig) ineriartortinnissaa, kulturi, pinngortitaq misigisassallu allat isumannaarlugit. Takornariat amerligaluttuinnarput taakkulu kommunip aningaasaqarneranut tapertaalluassapput. Pinngortitaq eriagalugu.
  2. Sammisassanik pilersitsineq inuiaqatigiinnut tamanut, ilaatigut kulturip iluani neqeroorutigineqareersut inerisaqqinnerani;
  3. Utoqqaat innuttaasut pisinnaasaat misilittagaallu atorluarlugit, ilaatigut meeqqerivinni atuarfinnilu;
  4. Angerlarsimaffeqanngitsut atugarisaasa pitsanngorsaavigalugit, ilaatigut inunnik isumaginninnermi sullitaqartut aalajangiisartut akornanni inissiaatileqatigiiffiillu akornanni attaveqarnermik pilersitsineq, inissiat toqqissisimanartut anguniarlugit.

Magdalene Møller, 39-inik ukiulik

Illoqarfitta kusanartumik ineriartortinneqarnissaa, najugaqarfigiuminartuunissaa tikikkuminartuunissaalu suleqataaffigerusuppara. Minnerunngitsumik Nuummi innuttaasut aallaavigalugit ataatsimiitiliami suleqataanissara siunertaraara. Qulequttat pineqartut ataatsimiititaliami sammineqartussat immikkut annerusumik minnerusumilluunniit inissisimanngillat, tamarmik pingaaruteqarmata. Pisariaqartitsineq naapertorlugu siumut isigisumik illoqarfiullu ineriartornera ilutigalugu tulluarsakkanik sammisaqartitsisoqartarnissaa suleqataaffigerusuppara.

Julius J. E. Kristiansen, 43-inik ukiulik

Unaga qinigassanngortippunga ataatsimoorneq ataqatigiinnerlu assigiinngitsunik tunuliaqutaqarluta nukittorsaaqataaffigerusukkakku. Nuummi innuttaasut Kalaallit Nunaat tamakkerlugu nunarsuarmilu allameersunik aggerfeqarput. Tamatiguussuseq tamanna Kalaallit Nunaanni allani nassaassaanngilaq. Periarfissat tamakkua ullumikkornit annertunerusumik atorluarneqartariaqarput.

Qinngorput

Arnannguaq Bolethe P. M. Thiessen, 33-inik ukiulik

Uani allaaserisamik pissarsinngilagut.

Simon Lang, 29-inik ukiulik

Uanga timersorneq pingaarteqaara, periarfissinneqarumalu Nuummi peqatigiiffippassuit pitsaasut tamaasa suleqatigerusuppakka aammalu ataasiakkaanut suli nuannaarnerulersitsinissaq ataatsimoortitsinerulernissarlu suleqataaffigerusullugit. 
Klubbit peqatigiiffiillu ataatsimoornerulersinneqarnissaat suleqataaffigerusuppara sapinngisamik sisammasissumik peqataaffigineqartumik, aammalu Nuummi pingaartumik meeqqanut periarfissat ineriartortitseqataaffigalugillu pitsanngorsaaqataaffigerusullugit. 
Timersorneq uannut qasuersaartitsisarpoq aammalu ikinngutit peqatigalugit imminullu sapersilaartarneq, pinngortitarsuarmik atorluaasut ilagaannga, aammalu timersornerup pingaartumik pinngortitami ingerlanneqarnissaanut pitsanngorsaaqataarusuppunga.

Helena Karen Ane Jensen, 65-inik ukiulik

Helena Jensenimik ateqarpunga 65-inik ukioqarlunga soraarnerullungalu. Sammisartakkakka ukuupput: Biibilimik atuffassineq, Juullip Nipitittagaani siulersusuuneq, allallu. 
Qineqqusaarutiga:

  1. Nuup illoqarfittut soqutiginarsarneqarnissaa, takornarissanut takuniagassat amerlisarlugit (ujaqqat eqqumiitsuliat).
  2. Nuummi qitittartut illutaartinneqarnissaat, ullukkut kikkuniillunnit isersimaartarfiusinnaasoq unnukkut qitittartut paarlakaajaallutik atorsinnaasaat.
  3. Angerlarsimaffeqanngitsut pitsaanerusumik sullinneqarnissaat.

Nukârak Amalie Holm, 57-inik ukiulik

Uani allaaserisamik pissarsinngilagut.

Nivi Møller-Sørensen, 42-inik ukiulik

42-nik ukioqarpunga, katinnikuuvunga uigalgu pingasunik paneqarpugut, 19, 14 aamma 10-nik ukiulik. Oqaatsini ilitsoqqussanni kalaallit oqaasii sallersaapput, oqaatsit ilitsoqqussarinagit nalunngisakka tassaapput qallunaatut takornartatullu oqaaseraakka tuluttut. Najukkami Ataatsimiititaliamut qineqqusaarpunga soqutigigakku. Ukkatarisassakka tassaassapput meeqqat (ukiut siulliit inuusuttuaranngornermut) Nuummi sammisassaqarluarnissaat. Taamaasilluni aserorterisarnerit, atugarissaannginneq, susassaaleqineq kiserliornerlu pinngitsoortinneqarsinnaalissapput. Kalaallit Nunaanni illoqarfimmi annersami siuttuusumilu Najukkami Ataatsimiititaliaq meeqqanut inuusuttunullu initussusermik takutitsissaaq. Illoqarfik annersaq nunat assigiinngitsut akornanni ineriartornermut moderniusumut peqataalluartoq assigiinngitsunillu pisoqartitsisoq. Taamatuttaarlu kalaallit kulturianni pingaartitat puigornagit.

Kristian A. B. S. Petersen, 58-inik ukiulik

  1. Nuna ornigassaqqissoq meeqqanut utoqqarnullu
  2. Illut eqqaai saligaasut nasullillu
  3. Najugaqartunut ataatsimiiffiusinnaasut init anginerit

Arnarissoq Fleischer, 43-inik ukiulik

Timersorneq, silamiinneq, pinngortitamiinnerlu nuannarilluartuugakkit anguniarusutassama ilagaat Nuummiunut aqqusineq ulappuffiusoq biileqaqisoq qimallugu nunakkut sissaq sinerlugu pisuinnarnut aqqusiortoqarnissaa (grusvej). 
Arsaattarfeeqqat ivigaaraasanik qallikkat sinaakkusersorlugit qullilersorneqarnissaat, aalajangersimasumillu akisussaasumik nakkutigineqalernissaat sulissutigerusuppara arsaaffeeqqat najoruminartuujuarnissaannik aserfallatsaalinissaanullu qulakkeerisussamik. 
Illoqarfitta ataavartumik najoruminarsarlugu kusassartuarneqarnissa, innuttaasunullu tamanut sammisassarqartuarnissaa uummarissuujuartuunissaalu sulissutigerusutama ilagaat.

Nivi Katrine Christensen, 31-inik ukiulik

Nuuk illoqarfiit pingaarnersaraat – kulturikkut annertuumik pikialaarfiussaaq. Amerlasuut tusartarpakka oqaatigisaraat Nuummi nuannernerpaatut taaneqartartoq kangerlummut angalaarneq – isumaqarpunga Nuummi nuannernerpaaq tassaassasoq Nuuk. Nuuk illoqarfittut tassaassaaq najugaqarfigalugu tulluusimaarutissarput. Taamaasiorsinnaavugut ataatsimoorfigisartakkavut nukittorsarlugit sammillugillu, assersuutigalugu kulturillu aaqqissuussinikkut illoqarfimmilu soqannginnersanik pitsanngorsaanikkut. Illoqarfipput sammissavarput. Tamanna uanga suleqataaffigerusuppara – taamaattumik Najukkami Ataatsimiititaliamut qineqqusaarpunga.

Jutho Maline Sofie Wilche, 61-inik ukiulik

Aajukua Nuummi illoqarfitsinni najukkatsinni qineqqusaarninni sullisigerusutama ilaa:

  1. Inuinnaasut pilersitaannik/sanaavannik/nerisassiaannik tuniiniaarusutaminnilluunniit Ukioq naallugu tuniniaavik ataavarnerusoq aqqutissiuukkusuppara pilersikkusullugulu.
  2. Asi illuaraqarfik aavarfik eqalunniarfik qeqertarpassuit eqqaaviunnginnerat paasitiluugulu saliivigineqarnissaat piaartumik aaqqissuussaasumik suleqateqarnermillu sukumiisumik salinneqarnissaat sulissutigerusuppara.
  3. Illoqarfitta ivikkanik Nunat allaneersunik illuliortitereernermi atorneqarneri naammaginagu (ilami aamma ivikkat inerittuinik sapigallit amerliartuinnarmata) nunatta naasuinik tamatsinnut iluaqutaasinnaasumik taarseriartuaarnissaat suleqataaffigerusuppara.
  4. Innuttaasut imigassartaqqnngitsumik 18-t qaangerlugit ukiullit nuannersunik sammisaqarnerulernissaat sammerusullugulu ammaanneqarnissaa sulissutigerusuppara.

Helene Geisler Kristiansen, 50-inik ukiulik

Uani allaaserisamik pissarsinngilagut.

Dorthe Bidstrup, 52-inik ukiulik

Qinngutsinni meeqqat susassaqarfii pinnguartarfiit, rekreationit amigaataammata. 
Ataatsimoorfiusinnaasunik pilersitserusulluni.

Ilatsiaq Markussen, 24-inik ukiulik

Uani allaaserisamik pissarsinngilagut.

Mats Bjerde, 53-inik ukiulik

Nuummi eqqaani pinngortitaq kusanaqaaq, tupinnaannarluni periarfissarpassuaqarlunilu –kisianni ilisimalluanngikkaanni amgallateqanngikkaanniluunniit tikikkuminaassinnaavoq. Uanga illoqarfimmi innuttaasut tamarmik pinngortitami periarfissaqarnissaat sulissutigerusuppara. Peqatigitillugu illoqarfipput kulturikkut pisuujuvoq, pitsaanerulersinnaavugulli inuusuttortatta tamatumuuna inissaqartinnerisigut. Inuusuttut illoqarfitsinni kulturikkut nukittorsarneqarnissaannut periarfissanik pilersiteqataarusuppunga, illoqarfimmi inuusuttut namminneq pilersitsisinnaaniassammata kulturimillu takutitsillutik – pisoqartitsilluni, aammali peqatigiiffiit, klubbit allallu aqqutigalugit – kikkut tamaasa periarfissaqartillugit.

Angunnguaq Malik Sethsen, 19-inik ukiulik

Najukkami Ataatsimiititaliamut qinigassanngortippunga Nuup ineriartorneranut pitsaasumik sunniuteqaqataarusukkama. Matumani sammineruakka meeqqat inuusuttullu, aammalu meeqqanut inuusuttunullu atuarfiit, kattuffiit allallu meeqqanik inuusuttunillu sullitaqartut suleqatigalugit sammisassanik amerlanersunik pilersitseqataarusullunga, meeqqat inuusuttullu ineriartornissaannut pitsaasunik pilersitsisoqarnissaa qulakkeerniarlugu.

Kirstine Møller, 30-inik ukiulik

Nuummi Najukkami Ataatsimiititaliamut qinigassanngortippunga pitsaasumik allanngueqataarusukkama peqatigitillugulu inuiaqatigiinni akisussaaqataarusukkama. Inuttut atugarisatigut patajaatsuunissaq uummateqarfigaara, isumaqarlungalu kulturerput aqqutigalugu meeqqat inuusuttullu pitsaasumik inuuneqalernissaannut aqqutissiuussisinnaalluta.