Innuttaasunut

Illunik aserfallassimasunik isaterineq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersuup Tasiilap nunaqarfiini illut najugassatut naleqqukkunnaartut isatigassatut nalunaarsorlugit aallartippai.

– Nalinginnaasumik atuineq nungullariartornerlu allanilluunniit peqquteqartumik illut atorneqarsinnaanngimmata iluarsartornissaat akilersinnaanngilaq, pilersaarutinut siunnersorti Ivan Falck Petersen oqarpoq.

Tunumi nunaqarfinniit Tasiilamut nuuttut amerlapput. Sumiiffinni arlalinni illut inoqanngillat. Illut BSU aqqutigalugu, nammineq illuliat illulluunniit Iserit-mit pigineqartut eqqartorneqarput.

– Illut ilaat akornuteqanngillat. Illut ilaat atorneqarsimanngillat iliuuseqarfigineqarsimanatillu tamannalu peqqutaalluni sukkasuumik aserfallakkiartorput. Illut kommunimit pigineqartut aserfallattut isaternissaat eqqartorneqarput.

Illunut isatigassanut iluarsagassanulluunniit piginnittut iluarsartuussissanersut isaterneqassanersulluunniit paasiniaaffiginiarlugit saaffigineqarput.

– Illup isaternissaanut kommunimit akilerneqarsinnaanera neqeroorutigaarput. Neqeroorulli nunaqarfimmi torersaanerup nalaanniinnaq atuutinneqarpoq.

– Kuummiuni illut inuinnarnit pigineqartut sisamat kommunimiillu pigineqartut pingasut isaterneqassapput. Taakkua saniatigut Iserit-mut Namminersorlutik Oqartussanullu ataavartumik illut pillugit paasiniaavugut. Illumut kina piginnittuua sumullu atorneqarpa? Illu suli atorneqassappat illuliornermut malittarisassat malinneqarnissaat peqqussutaavoq. Illunik piginnittut namminneq aalajangissavaat aserfallatsaaliussanerlutik isaterinissamulluunniit neqeroorummut akuersissanerlutik, Ivan Falck Petersen nangippoq.

Illut pitsaassusaat nikerartorujussuuvoq. Piginnittut nunaqarfimmit nuunnikuunerat, iluarsartuussinissamulluunniit pilersaaruteqannginnerat, akissaqannginneralluunniit peqqutaalluni illut arlallit aserfallakkiartorput.

Kommunip illuutai aamma piffissamut naleqqukkunnaarsimanerat peqqutigalugu atorneqarunnaarsimapput. Illut tamakku atoqqinneqannginnerini oqartussanit iluarsaanneqarnissaat piumasaqaatigineqarpoq, amerlanertigulli akilersinnaaneq ajorlutik.