Innuttaasunut

Nuuk: Uppernarnerani eqqagassanik angisuunik katersineq naammassilluartoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

53,8 tonsit – 54.000 kilongajaat – eqqagassanik angisuunik katersinerup nalaani kommunip Eqqagassaleriffianut apuuneqarput.

Maajip 22-aniit juunip 28-ata tungaanut innuttaasut illoqarfiup pingaarnersaani illoqarfimmiut najukkami eqqaanni eqqagassanik annertuunik aallertitsinissamik periarfissaqarput. Arlallillu tamanna atorluarsimavaat.

Eqqagassaleriffik piffissami tassani eqqagassanik angisuunik aasassanik 194-inik inniminniiffigitipput. Illuutileqatigiit arlalinnik inissiartallit periarfissaq atorluarlugu najukkami eqqaani ataatsimoorlutik katersaminnik aallertitsinissamik inniminniisut amerlanerpaapput.

Kommuneqarfik Sermersuup kiffartuussinini annertusiallallugu innuttaasut angerlarsimaffiisa eqqannguinut aallertarpoq.  Taamaalilluni pitsorluttut utoqqaallu eqqakkanik angisuunik igitsiartornissamut ajornarkusoortitsisarnerat pillugu ukiami isornartorsiuisoqarnera matussuserlugu.

Aaqqissuussamut eqqakkat immikkoortiterneqarsimanissaat innuttaasorlu najuulluni eqqakkanik issoraaqataanissaa piumasaqaataavoq. Tamannalu amerlanerpaanik malinneqarpoq – sumiiffiilli ilaanni eqqakkanik aatsisartut eqqagassanik immikkoortiterneqanngitsunik inuttaqangitsunillu nalaataqarput.

”Aquttugut eqqakkanik angisuunik katersinitsinni ulapittaqaat, inuillu piumasaqaatitsinnik annikikkaluaqisunik eqquutitsisinnaanngimmata naapertuulluanngissoraara,” Frank Rasmussen, Kommuneqarfik Sermersuumi ingerlatsinermi avatangiisunullu pisortaq oqarpoq.

”Eqqakkanik angisuunik katersinitsinni eqqakkat 53,8 tonsinik oqimaasuseqartut kommunip Eqqagassaleriffianut apuunneqarput, taakkunani atoqqitassatut sequtsigassatulluunniit immikkoortitsikkat poortorneqariarlutik Danmarkimut nassiunneqassapput illoqarfiulluunniit eqqakkanut ikuallaaviani sequtseqqissaariarlugit ikuallanneqassallutik. Eqqakkanik angisuunik katersineq ataatsimut isigalugu iluatsilluarpoq,” Frank Rasmussen naggasiivoq.

Upernarnerani eqqakkanik angisuunik katersineq naammassivoq.  Aqquserngup killinganut illoqarfiulluunniit iluani eqqakkanik ilisiinnarnissaq inerteqqutaaleqqippoq – eqqagassaatitillu angisuut Eqqagassaleriffimmukaanissai nammineq akisussaaffigaatit. Eqqagassanik katersannik aaneqartussatut inniminniisimanngikkuit nammineq peerneqarnissaat akisussaaffigaat  –  Eqqagassaleriffimmut nammineq assartuunerisigut illoqarfimmiluunniit assartuisartunut Eqqagassaleriffimmut assartuinissamik ikioqqullutit attaviginerisigut Eqqagassaleriffimmukaasisinnaavutit.

Eqqagassaleriffik Eqqakkanik ikuallaaviup eqqaaniittoq ulluinnarni nal. 7.00-17.30 kiisalu arfininngornermi nal. 9.00-14.00 akoranni sapaamilu nal. 11-16 akornanni eqqakkanik tunniussiffiusinnaavoq.

Eqqakkanik angisuunik katersinissaq tulliuttoq 2018-ip ukiaani ingerlanneqassaaq.