Innuttaasunut

Tasiilami meeqqat inuusuttullu atornerlugaasimasut angalallutik katsorsaasartunit katsorsarneqartassasut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Suliniutip nutaap Tasiilami meeqqat inuusuttullu atornerlugaasimasut katsorsaasartunit pilertortumik katsorsarneqartarnissaat qulakkiissavaa.

Tasiilami meeqqat atornerlugaasimasut ikiorneqalerput. Kommuneqarfik Sermersooq Kalaallit Nunaanni Isumaginninnermi Aqutsisoqarfik suleqatigalugu angalallutik katsorsaajartortartunik pilersitsivoq, taakku meeqqanik inuusuttunillu atornerlunneqarnermik kinguneranik tarnimikkut atugarliuuteqartunik katsorsaasassapput.

”Namminersorlutik Oqartussat suleqatigalugit suliniut taanna aallartissimagatsigu nuannaarutigaara. Angalallutik katsorsaasartut taama suliaqarnissaat pillugu annertoorujussuarmik pisariaqartitsisoqarnera qularutissaanngilaq”, Kommuneqarfik Sermersuummi Meeqqanut Ilaqutariinnillu Ataatsimiititap siulittaasua Uju Petersen oqarpoq.

Angalallutik katsorsaajartortartussat tassaapput avataanit katsorsaasartut qaammatit tamaasa sapaatit akunnera ataaseq Tasiilamiittartussat. Tasiilami meeqqat inuusuttullu atornerlunneqarsimasut 6-init 17-inut ukiullit tapersersorlugillu katsorsartassavaat, aammali ulluinnarni meeqqanut attuumassutillit angajoqqaat sulisullu tapersersortassallugit. Tamatuma saniatigut angalallutik katsorsaajartortartut aamma meeqqanut angajoqqaanullu ammasumik siunnersuisassapput, kiisalu sulisunut meeqqanik inuusuttunillu sullissisunut pikkorissaasallutik.

”Tasiilami taama sulisoqarnissaanik annertuumik pisariaqartitsisoqarpoq. Soorunami illoqarfimmi katsorsaasartunik atorfinitsitsinissarput sulissutigaarput, kisianni maanna suliniut illoqarfimmi suliniutinut ilapittuutaavoq pitsaalluinnartoq” Uju Petersen oqarpoq.

Angalallutik katsorsaasartut suliniutaannik nangitsinissaq qulakkeerniarlugu suleqatigiinnik pilersitsisoqassaaq, taannalu atuarfimmit, peqqinnissaqarfimmit, politiinit, Meeqqanut Ilaqutariinnullu Ingerlatsivimmit aamma Tasiilami Ilaqutariinnut Sullissivimmit inuttalerneqassaaq.

Kommuneqarfik Sermersuup aamma Kalaallit Nunaanni Isumaginninnermi Aqutsisoqarfiup angalallutik katsorsaasartunut aningaasartuutit tamaasa matussusertassavaat. Suliniut siullermik misiliutitut ingerlanneqassaaq, juuni 2019-imilu naliliiffigineqarumaarpoq.