Kommuneqarfik Sermersuumi borgmesteri, Asii Chemnitz Narup, isumaqarpoq Pan Am naammasseqqammersoq Kalaallit Nunaata tulluusimaarnissaanut tunngavissiisoq – tunngavissaq Kalaallit Nunaata alliartorfigisinnaasaa.
Sapaatip akunnera tupinnaq! Assammik arsartartuutivut angutit pikkorissut angusaqarusussuseqartullu nunatta arsartartuisut ataatsimoorsimapput ataqqinassuseq, medaalia nunarsuarmilu pissartanngorniunnissamut billetsit unammissutigalugit. Unammineranni isiginnaartarfimmiit fjernsynillu saaviniit Kalaallit Nunaat tamarmi peqataavoq angutit nunarput sinnerlugu unammisartut angusaqarnissaannut ataqqineqarnissaannullu illersorlugit iggiinngarluni anersaarpiassanani illersorneqarmata. Pisut ikittuinnaat soorlu timersorneq inunnik nunamillu katersortitsisinnaapput, tamannalu Nuummi Pan Am-ertoqarnerani pivoq. Naak VM-imut anngutinngitsuulaannguaraluarluta oqaatigisinnaavarput Kalaallit Nunaat tamarmi ippassaq ajugaasoq. Bronzemedaalia nunarput sinnerlugu unammisartut ujaminnassutiginngikkaluarlugu uagut inuttut nunatullu ajugaavugut.
Nunarput sinnerlugu unammisartuvut malinnaavigalugit qaffattarlutalu nakkartarsimavugut. Ammaanersiornerup kusanarluinnartup kingornatigut Colombia ajugaaffigalugu aallarniivugut. Taassuma kingorna ajornaqutitaqanngitsumik Paraguay ajugaaffigaarput. Gruppemi pingaarutilimmik unammineq, Uruguay unammineqarmat, pissanganarpallaangajappoq, unamminerulIi naalernerani ajuunnerit marluk angutit semifinalernissaannut pissutaalluinnartuupput. Kingorna angutit Brasiliameersunut pikkorissunut ajorsarput, Canadamullu ajugaapput Argentinameersut mesterinngortut semifinalimi ajorsarfiginnginnerini. Naggataatigut Chilemeersut ippassaq ajorsarfigaavut taakku bronzemedaaliannammata.
Kalaallit Nunaata tulluussimaarutigissavaa assammik arsartartuuteqaratta taama qaffasitsigisumik inissisimasunik. Tulluusimaarutigissavarputtaaq illoqarfiit pingaarnersaanni nunat tamat timersornermik unammisitsisarnerisut taama annertutigisumik ingerlatsisinnaanerput takutikkatsigu.
Nammineq piumassusilittut, nunatut timersorfiusutut, nunatut illoqarfiillu pingaarnersaattut nunani tamalaani pitsaasumik takutitsivugut. Amerikap nunavittaa tamakkerlugu takutipparput nunaasugut angisooq inukitsunnguaq, nunanut angisuunut nallersuussinnaasoq.
Tamatuma takutippaanga Pan Am-imi alloqatigiissaarnerput ingerlateqqittariaqaripput. Kalaallit Nunaat timersornerup, inuussutissarsiornerup, takornariaqarnerup, attaveqaqatigiinnerup ilisimatusarnerullu iluani ineriartortilerutsigu pisimasut ajunngitsumik atorsinnaasariaqarpavut.
Ullumikkut isumaliorpunga Kalaalit Nunaanni ataasinnguamilluunniit innuttaasoqanngitsoq isumaliortumik Pan Am-ip iluatsilluinnartumik ingerlasimannginneranik. Kommuneqarfik Sermersooq, Namminersorlutik Oqartussat aammalu suliffeqarfiit namminersortut arlallit aaqqissuussineq aningaasatigut tapersersorpaat. Nukippassuit pitsaasut tamaasa qutsavigerusuppakka Pan Am annertuumik sulissutigisimammassuk aamma kusanartumik sapaatip akunnerani assammik arsarluni unamminermi atugassaqartitsinerat pillugu – aammali ataatsimoornerup aamma ataqatigiinnerup aqqani. Isiginnaartut, aaqqissuisut aamma nammineq kajumissutsiminnik ikiuuttut unamminerit sisuukalaaginnartutut ingerlassimavaat unamminerillu nuannaarninngortillugit.
Kommuneqarfik Sermersuummi illoqarfiit pingaarnersaannut iliuusissatut pilersaaruteqarpugut, tassanilu anguniagaavoq piumassuseqarfigineqarlunilu timersornermik aaqqissuussat annertuut amerlanerit Nuummi pisarnisaat, tamatumani timersornerup annertunerulersinneqarnissaanik timersornermillu pikkorivissunik ineriartortitsineq peqatigitillugit. Aaqqissuussinerit Pan Am-itut ittut illoqarfiit pingaarnersaattut inissisimanitsinnik aammalu nunatta nunarsuarmi ilisimaneqalernissaannut periarfissiilluartuupput.
Siunissami Pan Am-imi misilittakkavut pitsaasut atorluassavavut. Nunarsuarmiut qaaqqugaangatsigik uagut siusinnerusumut sanilliullugu piginnaasaqarnerulerlutalu pitsaanerulertarnerput aammaarluta uppernarsiseqqipparput. Kulturit, oqaatsit aamma ileqqut allat naapinneranni pisuunnguallappugut, tamatumanilu naligiinnerput aamma takutinneqarpoq, aamma naalagaaffit uagutsinniit untritileriaammik anginerusut eqqarsaatigalugit. Tamanna sapiissusermik imminullu tatiginermik kinguneqartariaqarpoq.
Kommuneqarfik Sermersuup illoqarfittut pingaarnersatut iliuusissatut pilersaarutaani inissiat, atuarfiit aamma mittarfik nutaaq pineqarput, aammali inuit amerliartornerannut tunngassuteqarpoq, sapaatillu akunnerani uani tamatta amerlisimavugut/allisimavugut. Taamaattumik tamassinnut aaqqissuussap tupinnarluinnartup piviusunngortinneranut peqataasimasunut qujajumavunga.
Aaqqissuisunut, arsartunut, isiginnaartunut, piumassutsiminnik ikiuiuttunut kattuffilerisunullu qujanaq! Kalaallit Nunaanniittunut tamanut qujanaq!
Timersorpalaartumik aammalu qujamasullunga inuulluaqqusivunga
Asii Chemnitz Narup
Kommuneqarfik Sermersuumi borgmesteri