Innuttaasunut

Kommunimut pilersaarummut tapiliussaq 3E5-2, Nuuk Airport, pillugu siunnersuut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Aningaasaqarnermut Inuussutissarsiornermullu Ataatsimiititaq ulloq 26. apriili 2018 aalajangerpoq, Kommunimut pilersaarummut tapiliussaq 3E5-2 sapaatip akunnerini arfineq pingasuni tamanut tusarniutigineqassasoq.

Siunertaq
Naalakkersuisut Nuummi mittarfiup 2200 meterimut tallinissaanut siunertaata qulakkeernissaanut Kommuneqarfik Sermersuumit kissaatigineqarnera tunngavigalugu, kommunimut pilersaarummut tapiliussatut siunnersuummik suliaqartoqarpoq. Pingaarnerusumik mittarfeqarfimmut atugassiaasunik nutaanik inuussutissarsiuteqarfiliornissaq kiisalu mittarfimmut aqquserngup allanngortinneqarnissaa tapiliussakkut qulakkeerneqassaaq.

Nuummi mittarfimmik alliliinissamut pilersaarutaasut tunngavigalugit kommunimut pilersaarummut tapiliussaq suliarineqarpoq.  Kalaallit Airport-imiit pilersaarutit kingulliit naapertuuttumik inissisimalissappata, pilersaarutit kommunimut saqqummiunneqartut inissaqartinneqassappata immikkoortup ilaata killeqarfia iluarsineqassaaq.

Kalaallit Nunaanni illoqarfiit annersaata ineriartorfiusutullu nangittumik kiffartuunneqarnissaanut periarfissat pisariaqartut pigilerlugit imarpik qulaallugu silaannakkut angallassisalernissamut sulissuteqartoqarnissaanut sinaakkutissat pilersinneqassapput, tassami mittarfik ingerlalluartillugu nunami namminermi avataanullu attaveqartillugu Kommuneqarfik Sermersuumi inuussutissarsiutitigut attassiinnarnissamut siuarsaaqqinnissamullu pingaaruteqarsinnaaqaaq.

Kommunimut pilersaarummut tapiliussaq Kommuneqarfik Sermersuup Illoqarfiit Pingaarnersaannut Periusissiamut  aammalu kujataa´tungaani talittarfissuarmiit avannamut mittarfiup tungaanut inuussutissarsiuteqarnermut ilusilersukkamik nukittuumik ataqatigiissumillu ikorfartuisoqarnissaa naapertuulluinnarpoq.

Tamanut saqqummiussineq
Siunnersuut tamanut tusarniaassutigineqassaaq sap.ak. 8-ni piffissami 26.04.2018 – 21.06.2018.

Tusarniaassutigineqarnerata nalaani siunnersuummut oqaaseqaateqarnissamut akerliliissuteqarnissamullu periarfissaavoq.

Oqaaseqaatit akerliliissutillu Kommuneqarfik Sermersuumi ulloq  21. 06 2018  nallertinnagu tiguneqareersimassapput nassiunneqassappullu uunga Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut: plan@sermersooq.gl

Oqaaseqaatit akerliliissutillu piffissaagallartillugu tiguneqartut Kommunalbestyrelsimi inaarutaasumik kommunimut pilersaarummik suliarinninnermi ilaatinneqassapput.

Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut sanaartorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.

Pilersaarut uani takuneqarsinnaavoq
Kommunimut pilersaarummut tapiliussatut siunnersuutit kommunip nittartagaani sermsersooq.gl-imi (tusarniasutit akissutillu) tusarniaanernut iserluni aaneqarsinnaavoq, kommunip saaffiginnittarfiani pissarsiarineqarsinnaalluni imaluunniit Sanarfinermut Avatangiisinullu ingerlatsivimmut uunga sianerluni 36 74 00 saaffiginninnikkut pissarsiarineqarsinnaalluni.